ప్రగతి సాధకుడు కేసీఆరే!

కరువుకు మారుపేరైన తెలంగాణ రాష్ర్టాన్ని దేశానికే అన్నపూర్ణగా మలచిన కేసీఆర్ పరిపాలనా నైపుణ్యానికి జాతీయంగా, అంతర్జాతీయంగా ఎంతో గుర్తింపు, ఎన్నో అవార్డులు, రివార్డులు లభించాయి. అది చెరిపేస్తే చెరిగే చరిత్ర కాదు. తాజాగా ప్రముఖ పరిశోధనా సంస్థ సెంటర్ ఫర్ ఎకనామిక్ అండ్ సోషల్ స్టడీస్ (సెస్) తొలి దశాబ్దకాలపు రాష్ట్ర ప్రగతిపై వెలువరించిన అధ్యయన నివేదిక ఆ చరిత్రకు నిలువుటద్దం పట్టింది. 2014లో ప్రత్యేక రాష్ట్రంగా ఆవిర్భవించిన తెలంగాణ పదేండ్లలో సాధించిన ఆర్థిక విస్తరణ, ఆదాయ వనరుల పెరుగుదల, మౌలిక సదుపాయాల అభివృద్ధి అనితర సాధ్యమైనవి. వాటి గురించిన గణాంకాల విశ్లేషణలు సెస్ నివేదికలో చోటుచేసుకున్నాయి. రాష్ట్ర ఏర్పాటు సమయంలో తెలంగాణ ఎదుర్కొన్న పరిస్థితులు సాధారణమైనవి కావు. సాగునీరు, విద్యుత్తు, తాగునీరు, పారిశ్రామిక మౌలిక సదుపాయాలు, గ్రామీణ ఆర్థిక వ్యవస్థ, హైదరాబాద్ వెలుపల ప్రాంతీయ అభివృద్ధి వంటి అనేక రంగాల్లో భారీ లోటు ఉండేది. ఈ నేపథ్యంలో తొలి ముఖ్యమంత్రి కేసీఆర్ నాయకత్వంలోని బీఆర్ఎస్ ప్రభుత్వం అభివృద్ధి, సంక్షేమం, మౌలిక సదుపాయాల నిర్మాణాన్ని ప్రాధాన్యాంశాలుగా తీసుకున్నది. కాళేశ్వరం, మిషన్ భగీరథ, మిషన్ కాకతీయ, రైతుబంధు, రైతుబీమా, 24 గంటల విద్యుత్తు సరఫరా వంటి పథకాలు రాష్ట్ర అభివృద్ధి నమూనాలో కీలక పాత్ర పోషించాయి.
సెస్ నివేదిక ప్రకారం 2014-15 నుంచి 2024-25 మధ్యకాలంలో తెలంగాణ స్థూల రాష్ట్ర ఉత్పత్తి (జీఎస్డీపీ) రూ.5,05,484 కోట్ల నుంచి 219%తో రూ.16,09,902 కోట్లకు పెరిగింది. దేశంలో తలసరి ఆదాయంలో గోవా తర్వాత రెండో స్థానానికి చేరుకోవడం రాష్ట్ర ఆర్థిక ప్రస్థానంలో చెప్పుకోదగిన అంశం. దశాబ్ద కాలంలో రాష్ట్ర సొంత ఆదాయ వనరుల వాటా మొత్తం రాబడుల్లో 76 శాతంగా ఉండగా, సొంత పన్ను ఆదాయం ఏటా సగటున 11.6 శాతం పెరిగి 2024-25 నాటికి రూ.1,09,233 కోట్లకు చేరింది. ఇవి తెలంగాణ తన కాళ్లపై తాను నిలబడే ఆర్థిక సామర్థ్యాన్ని పెంచుకున్నదనడానికి సూచికలు. హైదరాబాద్ ఐటీ, ఫార్మా, లైఫ్ సైన్సెస్ రంగాల వృద్ధి కూడా రాష్ట్ర ఆర్థిక విస్తరణకు దోహదపడింది. ఈ గణాంకాల వెనుక కేసీఆర్ దార్శనిక నాయకత్వం అందించిన విధాన నిర్ణయాలు, పెట్టుబడుల సమీకరణ, సాగునీటి ప్రాజెక్టులు, విద్యుత్తు మౌలిక సదుపాయాల విస్తరణ, పారిశ్రామిక చొరవల వంటి అంశాలు ఉన్నాయనేది విస్మరించలేం. ముఖ్యంగా కేంద్రం నుండి ఎలాంటి చేయూత లేకపోవడంతో రాష్ట్ర సొంత ఆదాయాన్ని పెంచుకోవడం, అభివృద్ధి కార్యక్రమాలకు వనరులను సమీకరించడం తొలి దశాబ్దపు పాలనలో కీలక అంశాలుగా నిలిచాయి.
అదే సమయంలో కాంగ్రెస్ ప్రభుత్వం అధికారంలోకి వచ్చిన తర్వాత రాష్ట్ర ఆర్థిక పరిస్థితి అతలాకుతలమైంది. 2024-25లో రాష్ట్ర పన్ను ఆదాయ వృద్ధి కేవలం 2.2 శాతానికి, మొత్తం ఆదాయ రాబడుల వృద్ధి 2.5 శాతానికి పరిమితమైనట్లు గణాంకాలు సూచిస్తున్నాయి. అంతకుముందు సంవత్సరాలతో పోలిస్తే ఈ మందగమనం స్పష్టంగా కనిపిస్తున్నది. 2025-26లో కూడా పన్ను రాబడుల వృద్ధిపై ఆందోళనలు వ్యక్తమయ్యాయి. ఆర్థిక వ్యవస్థలో చైతన్యం తగ్గితే దాని ప్రభావం ప్రభుత్వ పెట్టుబడులు, సంక్షేమ పథకాలు, ఉద్యోగాల కల్పన, రైతులకు అందాల్సిన సాయం వంటి అన్ని రంగాలపై పడుతుంది. ప్రస్తుత పరిస్థితికి కాంగ్రెస్ ప్రభుత్వ అసమర్థ ఆర్థిక విధానాలే కారణం. రైతులను అప్పుల ఊబి నుంచి బయటపడేసేందుకు కేసీఆర్ అమలు చేసిన రైతుబంధు పథకాన్ని కాంగ్రెస్ సర్కార్ పాతరేసింది. పథకం లక్ష్యాలను నీరుగారుస్తూ రైతులను నానా ఇబ్బందులకు గురిచేస్తున్నది.
తెలంగాణ తొలి దశాబ్దపు ప్రస్థానం ఒక విషయాన్ని స్పష్టం చేస్తున్నది. బలమైన నాయకత్వం, స్పష్టమైన లక్ష్యాలు, దీర్ఘకాలిక ప్రణాళిక, ఆదాయ వనరుల సమీకరణ ఉంటే కొత్త రాష్ట్రం కూడా తక్కువ కాలంలో అభివృద్ధి పథంలో ముందుకు సాగగలదు. కేసీఆర్ పాలనలో ఏర్పడిన అభివృద్ధి పునాదులను ప్రస్తుత ప్రభుత్వం కొనసాగించి, చేతనైతే అంతకుమించి సాధించి చూపాలి. కానీ అది సాధ్యం కాదని ఇప్పటికే తేలిపోయింది. అయిందానికీ, కానిదానికీ గత ప్రభుత్వాన్ని విమర్శించడం వల్ల ఒరిగేదేమీ ఉండదు. గత ప్రభుత్వ అభివృద్ధి కార్యక్రమాలను రాజకీయ కారణాలతో పక్కనపెట్టడం రాష్ట్ర ప్రయోజనాలకు ఏమాత్రం మంచిది కాదు.
Comments (0)