రేరా రియల్ డ్రామా

- కాగితపు పులుల గర్జనలా ‘రేరా’ కంటితుడుపు చర్యలు
- కొనుగోలుదారులను ముంచుతున్న బిల్డర్లపై ఉదాసీనత
- నామమాత్రపు జరిమానాలతో చేతులు దులుపుకున్న అథారిటీ
సిటీబ్యూరో, నవంబర్ 17(నమస్తే తెలంగాణ) : కొనుగోలుదారుల కష్టార్జితాన్ని కొల్లగొడుతూ, నిబంధనలను తుంగలో తొకుతున్న రియల్ ఎస్టేట్ మోసగాళ్లపై కొరడా ఝళిపించాల్సిన తెలంగాణ రియల్ ఎస్టేట్ రెగ్యులేటరీ అథారిటీ తీరుపై ఇప్పుడు మరోసారి చర్చనీయాంశంగా మారింది. నగరంలో ఇళ్ల కోసం, వాణిజ్య సముదాయాల కోసం కోట్లు కుమ్మరించి సర్వం కోల్పోతున్న వేలాది మంది బాధితుల ఆర్తనాదాలను పక్కనపెట్టి, రేరా మాత్రం కేవలం కొన్ని ఎంపిక చేసిన సంస్థలపై నామమాత్రపు జరిమానాలు విధించి, అక్రమార్కుల ఆటకట్టించినట్లుగా ప్రచారం చేసుకుంటున్నది.
పెద్ద రియల్ ఎస్టేట్ దిగ్గజాలను కాపాడుతూ, కంటితుడుపు చర్యలతో చేతులు దులుపుకొన్న రేరా వైఖరి కాగితపు పులుల గర్జనల మారిందనే విమర్శలు వస్తున్నాయి. రేరా పనితీరుపై తీవ్ర అసహనం వ్యక్తం అవుతున్న నేపథ్యంలో కొన్ని నిర్మాణ సంస్థలపై మాత్రమే చర్యలు తీసుకోవడం ఇప్పుడు చర్చనీయాంశంగా మారింది. భారీ ప్రాజెక్టులు, బడా సంస్థలు తప్పులు చేస్తున్నా కేవలం నామమాత్రపు జరిమానాలతో సరిపెట్టిన రేరా.. రియల్టర్ల చేతిలో ఇరుక్కుపోయిన కొనుగోలుదారులకు పూర్తి భరోసానివ్వడంలో విఫలమైందని అభిప్రాయం వ్యక్తం అవుతున్నది.
బిల్డర్ల అక్రమాలను పూర్తిస్థాయిలో కట్టడి చేయలేకపోతోందనే విమర్శలకు తావిస్తోంది. వేలాది ఫిర్యాదులు మూలుగుతుంటే, కేవలం కొన్నింటిపైనే జరిమానాలు విధించి కంటి తుడుపు చర్యలకు దిగిందనే అనుమానం వ్యక్తమవుతున్నాయి.
వాసవి బాధితులకు ఊరట…
ఇక నగరంలో భారీ ప్రాజెక్టులతో విస్తరించిన వాసవి గ్రూప్ (వాసవి ఎల్ఎల్ పీ) తీరు కొనుగోలుదారులకు శాపంగా మారింది. వాసవి ఎల్ఎల్పీ సంస్థ చేపడుతున్న ప్రాజెక్టుల్లో వినియోగదారులు పడుతున్న నరకం అంతా ఇంతా కాదు. కేవలం అందమైన బ్రోచర్లను చూసి కోట్ల రూపాయలను వాసవి ఖాతాలో జమా చేసినా.. ఒప్పందాల ప్రకారం నిర్ణీత గడువులోగా కొనుగోలుదారులకు అందివ్వకుండా వేధింపులకు పాల్పడుతుంది.
ఏళ్ల తరబడి కొనుగోలుదారులను కార్యాలయాల చుట్టూ తిప్పుతూ మానసిక క్షోభకు గురిచేస్తోంది. ఈ క్రమంలో ఇటీవల రోడ్డెక్కిన వాసవి బాధితులకు ఊరటనిచ్చేలా కొనుగోలుదారులు చెల్లించిన మొత్తానికి 2025 ఫిబ్రవరి 7 నుంచి ఫ్లాట్ అప్పగించే వరకు సంవత్సరానికి 10.85 శాతం వడ్డీ చెల్లించాలని ఆదేశించింది. కానీ తమ నమ్మకాన్ని సొమ్ము చేసుకుని, ఏళ్లుగా మానసిక క్షోభను లెక్కించలేకపోయిందని బాధితులు వాపోయారు.
సాస్ మోసాలపై మౌనమేలా?
ఇక నగరంలో మరో సంచలన మోసానికి కేంద్రమైన సాస్ ఇన్ఫ్రా చేపట్టిన భారీ కమర్షియల్ ప్రాజెక్ట్ ‘సాస్ ఐటవర్’ వ్యవహారం పలు అనుమానాలకు తావిస్తోంది. బిల్డర్ చేతిలో ఆక్యుపెన్సీ సర్టిఫికెట్ ఉన్నప్పటికీ, కొనుగోలుదారులకు కమర్షియల్ స్థలాన్ని రిజిస్ట్రేషన్ చేయకుండా సాస్ ఇన్ ఫ్రా యాజమాన్యం కొనగోలుదారులను తీవ్ర వేధింపులకు గురిచేస్తోంది. ఒప్పందం ప్రకారం నిర్ణీత గడువు నుంచి చెల్లించాల్సిన చదరపు అడుగుకు చొప్పున చెల్లించాల్సిన అద్దెలను ఎగ్గొడుతూ, స్పేస్ను హ్యాండోవర్ చేయకుండా, బాధితులు అమ్ముకునే వీలులేకుండా వ్యవహారిస్తోంది.
దీనిపై పదుల సంఖ్యలో ఫిర్యాదులు ఉన్నాయి. ఇంత జరుగుతున్నా, బాధితులు లబోదిబోమంటూ రెరా గడప తొకినా.. అథారిటీ మాత్రం ఆ బడా సంస్థపై చర్యలు తీసుకోవడానికి వెనకడుగు వేస్తోంది. ఆ ప్రాజెక్టుకు కాలపరిమితిని పెంచుతూ, అక్రమాలకు మినహాయింపులు ఇస్తూ కొనుగోలుదారులను నిండా ముంచడానికి పరోక్షంగా సహకరిస్తోందనే ఆరోపణలు బలంగా వినిపిస్తున్నాయి. బాధితుల పక్షాన నిలవాల్సిన రేరా, నిబంధనలకు విరుద్ధంగా, సామాన్యుల రక్తాన్ని పీల్చుకుంటూ వ్యాపారం చేస్తున్న రియల్ ఎస్టేట్ వ్యాపారులకు జారీ చేస్తున్న హెచ్చరికలు కేవలం కాగితపు పులుల గర్జనల్లాగే మిగులుతున్నాయనే అభిప్రాయం వ్యక్తం అవుతున్నది.
చట్టంలోని సెక్షన్ 63 ప్రకారం అదనపు జరిమానాలు విధిస్తామంటూ ఇస్తున్న హెచ్చరికలు క్షేత్రస్థాయిలో ఎకడా అమలవుతున్న దాఖలాలు లేవు. సాస్ ఇన్ ఫ్రా, వాసవి గ్రూప్ వంటి బడా సంస్థల అక్రమాలపై వెంటనే సమగ్ర విచారణ జరిపి, బాధితులకు న్యాయం చేయకపోతే.. రేరా అంటేనే రియల్టర్లకు అండగా ఉండే ఒక రక్షణ కవచంలా నిలుస్తుందని వాదన బలపడుతుంది. ఇప్పటికైనా నిద్రమత్తు వీడి, పెండింగ్లో ఉన్న వేలాది ఫిర్యాదులన్నింటినీ పరిశీలించి, మోసగాళ్లపై ఉకుపాదం మోపకపోతే ప్రజాగ్రహం మూటగట్టుకోక తప్పదంటున్నారు.
రేరా ఆదేశాలివే…
- సనాలి ఐటీ పార్స్ (సనాలి ది ఎడ్జ్, మంచిరేవుల): రెరా రిజిస్ట్రేషన్, అనుమతులు లేకుండా ప్రచారం, బుకింగ్లు, విక్రయాలు (సెక్షన్లు 3, 4 ఉల్లంఘన) చేయడంతో రూ. 25 లక్షలు, జరిమానా(30 రోజుల్లో చెల్లించాలి). తక్షణమే ప్రాజెక్టు ప్రకటనలు, విక్రయాలు నిలిపివేయాలని ఆదేశించింది.
- శ్రీ ఆదిత్య స్వేర్స్ : ప్రాజెక్టు నిర్మాణంలో జాప్యం, కొనుగోలుదారుల బుకింగ్ రద్దు చేసుకున్నా నగదు వెనకి ఇవ్వకపోవడంతో కొనుగోలుదారు చెల్లించిన రూ.17లక్షలను వడ్డీతో సహా తిరిగి చెల్లించాలని ఆదేశం.
- త్రిపుర కన్స్ట్రక్షన్స్: భారీగా నగదు వసూలు చేసినా నిర్మాణాలు చేపట్టకపోవడం, నిర్ణీత గడువులోగా ఫ్లాట్ అప్పగించకుండా, వేధిస్తున్న ఈ నిర్మాణ సంస్థ కొనుగోలుదారులు చెల్లించిన రూ. 41.85 లక్షలను వడ్డీతో సహా తిరిగి చెల్లించాలని పేర్కొంది.
- వాసవి రియల్టర్స్ ఎల్ఎల్పీ: నిర్మాణంలో తీవ్ర జాప్యం, ఒప్పందం ప్రకారం సకాలంలో ఫ్లాట్ను కొనుగోలుదారులకు అప్పగించకుండా కాలయాపన చేస్తుండగా, కొనుగోలుదారులు చెల్లించిన రూ. 49.50 లక్షలపై 2025 ఫిబ్రవరి 7 నుంచి ఫ్లాట్ అప్పగించే వరకు సంవత్సరానికి 10.85 శాతం వడ్డీ చొప్పున చెల్లించాలి.
- ఎస్వీఎం ఆదిత్య హోమ్స్ : నగదు వసూలు చేసి నిర్మాణం చేపట్టకుండా, ఒప్పంద హామీలను ఉల్లంఘించిన నిర్మాణ సంస్థపై కొనుగోలుదారు చెల్లించిన రూ. 27.16 లక్షలను వడ్డీతో సహా తిరిగి చెల్లించాలని ఆదేశించింది.
- అరైన్ ఇన్ ఫ్రా (అరైన్ ఎమరాల్డ్, మియాపూర్): ఫ్లాట్ నంబర్ 502ను కొనుగోలుదారులకు అప్పగించకపోవడం (రూ. 6.58 లక్షల బకాయిలు ఉన్నాయన్న సంస్థ వాదనను రేరా తోసిపుచ్చింది). కొనుగోలుదారుకు తక్షణమే ఫ్లాట్ను అప్పగించాలని ఆదేశం.
- బీవీఆర్ ఇన్ఫ్రా డెవలపర్స్ ప్రైవేట్ లిమిటెడ్ : ప్లాట్ రిజిస్ట్రేషన్ చేయకపోవడం, స్థలం అప్పగించకపోవడం, డబ్బుల వాపస్కు ఇచ్చిన చెకులు చెల్లకపోవడం వంటి అక్రమాలకు పాల్పడగా, కొనుగోలుదారు చెల్లించిన రూ.7 లక్షలను వడ్డీతో సహా తిరిగి చెల్లించాలని స్పష్టం చేసింది.
- భువనతేజ ఇన్ఫ్రా : అడ్వాన్స్లు వసూలు చేసి ప్రాజెక్టు నిర్మాణం పూర్తిగా నిలిపివేయడం, ఫ్లాట్లు ఇవ్వకపోవడంపై కొనుగోలుదారులకు రూ. 26 లక్షలను వడ్డీతో సహా తిరిగి చెల్లించాలని పేర్కొంది.
Comments (0)