పైలేట్స్‌ చేసేద్దామా!?

19 November 2026 - 07:00
0 0
పైలేట్స్‌ చేసేద్దామా!?
Pilates

ప్రస్తుతం సోషల్‌ మీడియాలో ఓ సరికొత్త వ్యాయామ పద్ధతి ట్రెండింగ్‌లో ఉన్నది. సెలెబ్రిటీల నుంచి సామాన్యుల వరకూ.. ప్రతి ఒక్కరినీ ఆకర్శిస్తున్నది. శరీరాన్ని దృఢంగా, ఆరోగ్యంగా ఉంచడంతోపాటు మనస్సును కూడా ప్రశాంతంగా మార్చడంలో సహాయపడుతున్నది. అదే.. ‘పైలేట్స్‌’!

20వ శతాబ్దపు ప్రారంభంలో జోసెఫ్‌ పైలేట్స్‌ ఈ వ్యాయామ విధానాన్ని రూపొందించాడు. అందుకే ఆయన పేరుమీదే.. దీన్ని ‘పైలేట్స్‌’ అని పిలుస్తున్నారు. ఈ వ్యాయామం శరీరం లోపలి కండరాలపై (పొత్తికడుపు, వీపు, నడుము భాగం) ప్రత్యేకంగా దృష్టి పెడుతుంది. యోగా, జిమ్నాస్టిక్స్‌ కలయికలా ఉండే ఈ పద్ధతిలో కండరాలను అతిగా పెంచకుండా, వాటికి మంచి ఆకృతిని తీసుకురావడానికి సహాయపడుతుంది.

ప్రత్యేకతలు-ప్రయోజనాలు

  • రోజూ కంప్యూటర్ల ముందు గంటల తరబడి కూర్చునేవారికి వచ్చే వంకర భంగిమలను సరిచేయడంలో ఇది అద్భుతంగా పనిచేస్తుంది.
  • శరీరానికి ముఖ్య ఆధారమైన పొత్తికడుపు, వెన్నెముక కండరాలను పైలేట్స్‌ బలంగా మారుస్తుంది. దీనివల్ల వెన్నునొప్పి తగ్గుతుంది.
  • కీళ్ల నొప్పులు దరిచేరకుండా శరీరాన్ని తేలికగా, సాగే గుణంతో ఉంచుతుంది.
  • శ్వాస నియంత్రణపై దీనిలో ఎక్కువ దృష్టి పెడతారు. ఇది శారీరక బలాన్నే కాకుండా మానసిక ప్రశాంతతను, ఏకాగ్రతను పెంచుతుంది.
  • కండరాలపై అతిగా భారం పడకుండా చేయడం వల్ల క్రీడాకారులు త్వరగా కోలుకోవడానికి ఇది సహాయపడుతుంది.

ఎన్ని రకాలు?
పైలేట్స్‌ను ప్రధానంగా రెండు పద్ధతుల్లో చేయవచ్చు.
మ్యాట్‌ పైలేట్స్‌ : ప్రత్యేకంగా యోగా మ్యాట్‌ మీద పడుకుని, శరీర బరువుతోనే వివిధ రకాల భంగిమలు చేయడం. దీనికి ఎలాంటి పరికరాలు అవసరం లేదు.
రిఫార్మర్‌ పైలేట్స్‌ : ఇది ‘రిఫార్మర్‌’ అనే ప్రత్యేకమైన యంత్రం సహాయంతో చేసే వ్యాయామం. ఇందులో స్ప్రింగ్‌లు,
తాళ్లు ఉంటాయి. ఇవి కండరాలపై తగినంత ఒత్తిడిని కలిగించి మరింత మెరుగైన ఫలితాలను ఇస్తాయి.

ఎవరికి సరిపోతుంది?
వయసుతో సంబంధం లేకుండా ప్రతి ఒక్కరూ పైలేట్స్‌ చేయవచ్చు. మహిళలు, పురుషులు, వృద్ధులు, ఫిట్‌నెస్‌ ప్రారంభించే వాళ్లు, గర్భిణులు (వైద్యుల సలహాతో) కూడా దీన్ని సులభంగా చేయొచ్చు. డ్యాన్సర్లు, అథ్లెట్లు తమ ఫిట్‌నెస్‌ కాపాడుకోవడానికి దీన్ని విధిగా చేస్తుంటారు.

Comments (0)

User