నీటి పారుద‌ల‌శాఖ మంత్రిగా ఉత్త‌మ్ అన‌ర్హుడు : మాజీ మంత్రి జ‌గ‌దీశ్‌రెడ్డి

19 November 2026 - 20:00
0 0
నీటి పారుద‌ల‌శాఖ మంత్రిగా ఉత్త‌మ్ అన‌ర్హుడు : మాజీ మంత్రి జ‌గ‌దీశ్‌రెడ్డి
నీటి పారుద‌ల‌శాఖ మంత్రిగా ఉత్త‌మ్ అన‌ర్హుడు : మాజీ మంత్రి జ‌గ‌దీశ్‌రెడ్డి

న‌ల్ల‌గొండ‌, న‌వంబ‌ర్ 19 : నీటి పారుద‌ల‌శాఖ మంత్రి ఉత్త‌మ్ కుమార్ రెడ్డి అన‌ర్హుడ‌ని మాజీ మంత్రి, సూర్యాపేట ఎమ్మెల్యే గుంట‌కండ్ల జ‌గ‌దీశ్‌రెడ్డి అన్నారు. ఏపీ సాగ‌ర్ నీటి దోపిడీపై మంత్రులు ఉత్త‌మ్‌కుమార్‌రెడ్డి, కోమ‌టిరెడ్డి వెంక‌ట్‌రెడ్డి ప‌ర‌స్ప‌ర విరుద్ధ వ్యాఖ్య‌లు చేయ‌డంపై ఆయ‌న ఫైర్ అయ్యారు. గురువారం నల్ల‌గొండ జిల్లా గట్టుప్పల్ మండల కేంద్రంలో మీడియాతో ఆయ‌న మాట్లాడారు. సాగర్ నుండి ఆంధ్రా నీటి దోపిడీపై మంత్రి ఉత్తమ్ కుమార్ రెడ్డి కేఆర్ఎంబీకి లేఖ ఎప్పుడు రాశాడో బహిర్గతం చేయాల‌న్నారు. లేదంటే ముక్కు నేలకు రాసి జిల్లా ప్రజలకు క్షమాపణలు చెప్పాల‌న్నారు. జిల్లా ఉన్న ఇద్దరు మంత్రులు చెరో ప్రకటన ఇచ్చార‌ని, అందులో ఏది నిజమో చెప్పాల‌న్నారు. మన నీళ్లను ఆంధ్రాకు కట్టబెట్టి చరిత్ర హిణుడిగా ఉత్త‌మ్ మిగిలాడ‌న్నారు. జిల్లా ప్రజలు త‌న‌ను క్షమించర‌ని, ఉత్తమ్ కు రాజకీయ సమాధి తప్పద‌న్నారు. సమైక్యాంధ్రలో జరిగిన విధంగానే మన సాగర్ నీళ్లను ఆంధ్రావాళ్లు, చంద్రబాబు దోచుకొని పోతుంటే జిల్లాలో ఇద్దరు మంత్రులు ఏం చేస్తున్నట్లు అని ఆయ‌న ప్ర‌శ్నించారు.

క్రాప్ హాలిడే ప్ర‌క‌టిస్తానికి సిగ్గుండాలి

సంవత్సర కాలంగా పల్నాడు విజయపురి సౌత్ వద్ద ఆంధ్రా వాళ్లు పనులు చేస్తుంటే ఉత్త‌మ్‌ గుడ్డి గుర్రాల పళ్లు తోముతున్నాడా? ఉత్తమ్ లాంటి చేతకాని, అన్‌ ఫిట్ మంత్రిని తాను ఇప్పటివరకు చూడలేద‌న్నారు. ముఖ్యమంత్రికి, మంత్రులకు కో ఆర్డినేషన్ లేద‌ని, ఎవ్వరికి వారు దోచుకోవడం, కమీషన్లు మింగడం పనిగా పెట్టుకున్న‌ట్లు తెలిపారు. అస‌లు ఈ ప‌రిణామాల‌ను చూస్తుంఏ అసలు రాష్ట్రంలో పాలన ఉందా అనే సందేహం క‌ల‌గ‌క త‌ప్ప‌ద‌న్నారు. ఆంధ్రాలో క్రాప్ హాలిడే లేదు. మరి తెలంగాణలో ఎలా ప్రకటిస్తారు. రేవంత్ రెడ్డికి సిగ్గు అనిపియ్యడం లేదా అని ప్ర‌శ్నించారు. ఉన్న నీళ్లను ఆంధ్రాకు, నీ గురువు చంద్రబాబుకు తాకట్టు పెట్టి ఇక్కడ క్రాప్ హాలిడే అంటున్నావు, ముమ్మాటికీ ఇక్కడ చంద్రబాబు కనుసన్నల్లోనే పాలన నడుస్తోంద‌న్నారు. ప్రజలరా, రైతులారా తస్మాత్ జాగ్రత్త. కాంగ్రెస్ ఆడుతున్న నాటకాన్ని అర్థం చేసుకోవాల‌ని కోరారు. సాగర్ నీళ్ల కోసం బీఆర్ఎస్ పార్టీ ఎంతకైనా పోరాటం చేస్తోందని, భూ కంపం సృష్టించైనా మన నీళ్లను మన హక్కులను కాపాడుకుంటామ‌ని స్ప‌ష్టం చేశారు.

Comments (0)

User