దివాలా కంపెనీ.. బినామీ వైభవం!!

22 November 2026 - 06:30
0 0
దివాలా కంపెనీ.. బినామీ వైభవం!!
Klsr
  • రాష్ట్రంలోని కీలకమైన ఇన్‌ఫ్రా ప్రాజెక్టులన్నీ కేఎల్‌ఎస్‌ఆర్‌కే
  • తాజాగా ఎస్‌ఆర్‌ఎస్పీ స్టేజీ-2 పనులు కూడా అదే కంపెనీకి
  • అంచనా కన్నా ఎక్కువ కోట్‌ చేసినా కట్టబెట్టిన ప్రభుత్వం
  • మిగతా కంపెనీలు పోటీలో లేకపోవడంపై అనుమానాలు
  • జడ్జిపై ఒత్తిళ్లు, వ్యాపారి తల్లి అరెస్ట్‌ వంటి వివాదాల్లో సంస్థ
  • ఆర్థిక అవకతవకలు, దివాలా ఆరోపణలు ఎదుర్కొన్న కంపెనీ
  • అయినా వేల కోట్ల ప్రాజెక్టులు కట్టబెట్టడంపై బీఆర్‌ఎస్‌ ధ్వజం
  • ‘ముఖ్యనేత’ బినామీ కంపెనీ కావడమే కారణమంటూ తీవ్రస్థాయిలో ఆగ్రహం

దివాలా అంచుకు చేరిన కంపెనీకి ఎవరైనా రూ.వేల కోట్ల కాంట్రాక్టులు కట్టబెడతారా? ఉద్యోగులకు కనీసం జీతం కూడా ఇవ్వలేని స్థితికి దిగజారిపోయిన కంపెనీ భారీ ప్రాజెక్టులు నిర్మిస్తున్నదంటే ఎవరైనా నమ్ముతారా? ఆర్థిక అవకతవకలు, బ్యాంకులను మోసం చేసిందన్న ఆరోపణలు ఉన్నా.. ప్రభుత్వం పిలిచి మరీ పనులు అప్పగిస్తుందా? ఓ కేసులో తమకు అనుకూలంగా తీర్పు ఇవ్వాలంటూ ఏకంగా నేషనల్‌ కంపెనీ లా ట్రిబ్యునల్‌ (ఎన్‌సీఎల్‌ఏటీ) న్యాయమూర్తిపై ఒత్తిళ్లు తెచ్చిన ఘన చరిత్ర ఉన్న కంపెనీకి పోటీ లేకుండా టెండర్లు కట్టబెడతారా?.. సాధారణంగా అయితే ఇవేమీ జరగవు. కానీ తెలంగాణలో ఉన్నది కాంగ్రెస్‌ ప్రభుత్వం. పైపెచ్చు ఆ కంపెనీ ‘ముఖ్య’నేత బినామీదంటూ వార్తలు ఉండనే ఉన్నాయి. ఇంకేమున్నది? ఈ రెండు ప్రధాన అర్హతలున్న ఆ కంపెనీకి ప్రభుత్వం ఒకటి కాదు రెండు కాదు రూ.వేల కోట్ల టెండర్లు కట్టబెడుతున్నది.

హైదరాబాద్‌ కేంద్రంగా పనిచేస్తున్న ఆ ఇన్‌ఫ్రా కంపెనీనే ‘కేఎల్‌ఎస్‌ఆర్‌ ఇన్‌ఫ్రాటెక్‌ లిమిటెడ్‌’. ఒకానొక సందర్భంలో ఉద్యోగులకు జీతాలు ఇవ్వలేక దివాలా అంచుకు చేరింది. కానీ 2023 డిసెంబర్‌లో కాంగ్రెస్‌ ప్రభుత్వం ఏర్పడగానే ఆ కంపెనీ దశ తిరిగిపోయింది. ఒకప్పుడు ఆర్థిక ఇబ్బందుల్లో కూరుకుపోయిన ఆ కంపెనీకి.. ఇప్పుడు ఒకటి కాదు రెండు కాదు ఏకంగా రూ. 6 వేల కోట్ల పైచిలుకు విలువైన కాంట్రాక్టులు దక్కాయి. ఇందులో మెజార్టీ ప్రాజెక్టులను కాంగ్రెస్‌ ప్రభుత్వమే కట్టబెట్టింది. తాజాగా సూర్యాపేట జిల్లా మోతె పరిధిలో చేపడుతున్న ఎస్సారెస్పీ స్టేజీ 2 పనుల కాంట్రాక్టు కూడా ఎలాంటి పోటీ లేకుండా ఆ కంపెనీకే దక్కింది. దివాలా తీసిన ఓ కంపెనీకి ఇలా ప్రాజెక్టులన్నీ గంపగుత్తగా, అదీ ఎలాంటి పోటీ లేకుండా ఎందుకు దక్కుతున్నాయి? ఆ కంపెనీపై కాంగ్రెస్‌ సర్కారుకు అంత ప్రేమ ఎందుకు? అనేది తీవ్ర చర్చనీయాంశం అయ్యింది.

Sagar2

(స్పెషల్‌ టాస్క్‌ బ్యూరో)హైదరాబాద్‌, నవంబర్‌ 21 (నమస్తే తెలంగాణ): కాంగ్రెస్‌ ప్రభుత్వం అధికారంలోకి రాగానే హైదరాబాద్‌ కేంద్రంగా పనిచేస్తున్న కేఎల్‌ఎస్‌ఆర్‌ ఇన్‌ఫ్రాటెక్‌ లిమిటెడ్‌ కంపెనీకి గంపగుత్తగా ప్రాజెక్టులు కట్టబెడుతుండటంపై సర్వత్రా చర్చ జరుగుతున్నది. తాజాగా సూర్యాపేట జిల్లాలో మోతె పరిధిలో చేపడుతున్న ఎస్సారెస్పీ స్టేజీ 2 పనుల కాంట్రాక్టు కూడా ఎలాంటి పోటీ లేకుండా ఆ కంపెనీకే దక్కడంతో ‘ముఖ్య’నేత పాత్రపై అనుమానాలు వ్యక్తమవుతున్నాయి. ఎస్సారెస్పీ స్టేజీ-2లో భాగంగా మోతె పరిధిలో డిస్ట్రిబ్యూటరీ పనుల నిమిత్తం నీటిపారుదల శాఖ గత ఆగస్టు 17న టెండర్‌ నోటిఫికేషన్‌ జారీ చేసింది. రూ. 180.25 కోట్ల అంచనా వ్యయంతో పనుల కోసం బిడ్లను ఆహ్వానించింది. సెప్టెంబర్‌ 5న టెండర్ల గడువు ముగిసింది.

అయితే, అనూహ్యంగా హైదరాబాద్‌కు చెందిన కేఎల్‌ఎస్‌ఆర్‌ ఇన్‌ఫ్రాటెక్‌ లిమిటెడ్‌ కంపెనీ ఒక్కటి మాత్రమే ఈ టెండర్‌కు బిడ్‌ వేసింది. పైగా ప్రాజెక్టు అంచనా వ్యయం కంటే, 4.89 శాతం ఎక్కువ అంటే రూ. 189.06 కోట్లకు బిడ్‌ దాఖలు చేసింది. గత గురువారం టెండర్లను తెరిచారు. ఇంకేముంది? కేఎల్‌ఎస్‌ఆర్‌ కంపెనీకే టెండర్‌ దక్కినట్టు ప్రభుత్వం ప్రకటించింది. అయితే, ఎలాంటి పోటీలేకుండా సింగిల్‌ బిడ్‌లో, అందునా ప్రాజెక్టు అంచనా వ్యయం కంటే 4.89 శాతం ఎక్కువగా కోట్‌ చేసిన కంపెనీకి టెండర్‌ను ప్రభుత్వం కట్టబెట్టడంపై సర్వత్రా విమర్శలు వ్యక్తమవుతున్నాయి. అన్నింటికంటే ముఖ్యంగా, దివాలా తీసి కోర్టు కేసులు ఎదుర్కొన్న కంపెనీకి కాంట్రాక్ట్‌ ఇవ్వడమేంటని తెలంగాణవాదులు ప్రశ్నిస్తున్నారు. అయితే, ఈ ఒక్క ప్రాజెక్టే కాదు.. కాంగ్రెస్‌ ప్రభుత్వం అధికారంలోకి వచ్చిన తర్వాత పలు కీలక ప్రాజెక్టులన్నింటినీ కేఎల్‌ఎస్‌ఆర్‌ కంపెనీనే దక్కించుకోవడం గమనార్హం.

రూ.6వేల కోట్ల ప్రాజెక్టులు
దివాలా అంచుకు చేరిన కేఎల్‌ఎస్‌ఆర్‌ ఇన్‌ఫ్రా కంపెనీకి ఇప్పటివరకు రూ.6 వేల కోట్లకు పైగా కాంట్రాక్టులు దక్కాయి. ఇందులో మెజార్టీ ప్రాజెక్టులను కాంగ్రెస్‌ ప్రభుత్వమే కట్టబెట్టడం గమనార్హం. కోదాడ మున్సిపాలిటీ అండర్‌ గ్రౌండ్‌ డ్రైనేజీ స్కీమ్‌ (టెండర్‌ ఐడీ 611748), కొడంగల్‌లో వెటెర్నరీ సైన్స్‌ కాలేజీ నిర్మాణం (టెండర్‌ ఐడీ 580455), కొడంగల్‌లో మహబూబ్‌నగర్‌-చించోలీ రోడ్డు వెడల్పు పనులు (టెండర్‌ ఐడీ 568421), పరిగి-షాద్‌నగర్‌ రోడ్డు వెడల్పు పనులు (టెండర్‌ ఐడీ 568503), మోతే సమీపంలో లిఫ్ట్‌ ఇరిగేషన్‌ ప్రాజెక్టు పనులు (టెండర్‌ ఐడీ 599732), రాజీవ్‌గాంధీ లిఫ్ట్‌ ఇరిగేషన్‌ స్కీమ్‌-చింతలపాలెం (టెండర్‌ ఐడీ 543384), కొమురవెల్లి మల్లన్నసాగర్‌ రిజర్వాయర్‌ హెచ్‌ఎండబ్ల్యూఎస్‌ వర్క్స్‌ (టెండర్‌ ఐడీ 536660), కొడంగల్‌లో ప్రభుత్వ మెడికల్‌ కాలేజీ నిర్మాణం (టెండర్‌ ఐడీ 557340)తో పాటు మెదక్‌లో ఆర్‌అండ్‌బీ వర్క్స్‌, అమృత్‌, జల్‌జీవన్‌, యంగ్‌ ఇండియా స్కూల్‌ ప్రాజెక్టులతో కలిపి పలు కీలక ప్రాజెక్టులు కేఎల్‌ఎస్‌ఆర్‌ కంపెనీకి తెలంగాణ ప్రభుత్వం కట్టబెట్టినట్టు ఈజీపీ (ఎలక్ట్రానిక్‌ గవర్నమెంట్‌ ప్రొక్యూర్‌మెంట్‌) టెండర్‌ పోర్టల్‌లోని వివరాలను బట్టి అర్థమవుతున్నది.

Re2

ముఖ్యనేత కీలకపాత్ర
రాష్ట్రంలోని మెజార్టీ ప్రాజెక్టులను గంపగుత్తగా కేఎల్‌ఎస్‌ఆర్‌ కంపెనీకి ప్రభుత్వం కట్టబెట్టడం వెనుక ‘ముఖ్యనేత’ కీలక పాత్ర పోషిస్తున్నట్టు వార్తలు వస్తున్నాయి. ‘ముఖ్య’నేతకు ఈ కంపెనీలో పరోక్ష పెట్టుబడులు ఉన్నట్టు ప్రతిపక్ష నేతలు విమర్శిస్తున్నారు. దీన్ని ధ్రువపరుస్తూ, అధికారంలోకి రాకముందు ప్రతిపక్షంలో ఉన్నప్పుడు ‘ముఖ్య’నేత వాడిన టీఎస్‌ ఓ7ఎఫ్‌ ఎఫ్‌0009 నంబర్‌ కలిగిన టొయోటా ల్యాండ్‌ క్రూజర్‌ నలుపు రంగు కారు కేఎల్‌ఎస్‌ఆర్‌ కంపెనీ పేరు మీదే రిజిస్టరై ఉండటం గమనార్హం. అంతేకాదు, 2018లో ‘ముఖ్య’నేత బంధువులకు చెందిన భూపాల్‌ ఇన్‌ఫ్రా, సాయి మౌర్య కంపెనీలతో పాటు కేఎల్‌ఎస్‌ఆర్‌ ఇన్‌ఫ్రా కంపెనీపై కూడా ఐటీ దాడులు జరిగాయి. సాయి మౌర్య, కేఎల్‌ఎస్‌ఆర్‌ కంపెనీ మధ్య పెద్దయెత్తున డబ్బులు చేతులు మారినట్టు, ఈ కంపెనీలు ట్యాక్స్‌ ఎగవేతలకు పాల్పడినట్టు రైడ్స్‌ సందర్భంగా అధికారులు గుర్తించారని మీడియాలోనూ కథనాలు వెలువడ్డాయి. మొత్తంగా ‘ముఖ్య’నేత బినామీ కంపెనీ కాబట్టే, కేఎల్‌ఎస్‌ఆర్‌కు కాంగ్రెస్‌ ప్రభుత్వం గంపగుత్తగా ప్రాజెక్టులు కట్టబెట్టుతున్నదని ప్రతిపక్ష నాయకులు విమర్శిస్తున్నారు.

రియల్‌ ఎస్టేట్‌లోనూ అక్రమాలు
‘ముఖ్యనేత’ అండతో ఒకవైపు ఇన్‌ఫ్రా ప్రాజెక్టులను చేజిక్కించుకొంటున్న కేఎల్‌ఎస్‌ఆర్‌ కంపెనీ.. రియల్‌ ఎస్టేట్‌ రంగంలోనూ భారీగా అక్రమాలకు పాల్పడుతున్నట్టు వార్తలు వస్తున్నాయి. ఇందుకు జవహర్‌నగర్‌ భూ వివాదాన్ని ఉదహరిస్తున్నారు. జవహర్‌నగర్‌లో సర్వే నంబర్‌ 12బీలోని 50 ఎకరాలను 2008లో అప్పటి కాంగ్రెస్‌ ప్రభుత్వం జెన్‌ప్యాక్ట్‌ అనే ఐటీ సంస్థకు కేటాయించింది. సుమారు రూ. 5 వేల కోట్ల విలులైన ఈ భూములను కేఎల్‌ఎస్‌ఆర్‌ ఇన్‌ఫ్రా కబ్జా చేసినట్టు బీఆర్‌ఎస్‌ నేత మన్నె క్రిశాంక్‌ ఇటీవల ఆరోపించారు. ఈ భూముల్లో జెన్‌ప్యాక్ట్‌ బోర్డులతో పాటు కేఎల్‌ఎస్‌ఆర్‌కు చెందిన కంటైనర్లు కూడా ఉన్నాయని మండిపడ్డారు. జెన్‌ప్యాక్ట్‌కు చెందిన భూములను ‘ముఖ్య’నేత కేఎల్‌ఎస్‌ఆర్‌కు బదిలీ చేశారా? అని ప్రశ్నించారు. ఇదొక్కటే కాదు.. నగర పరిధిలోని కొన్ని చెరువులను చెరబట్టి కేఎల్‌ఎస్‌ఆర్‌ అక్రమంగా భూకబ్జాలకు పాల్పడుతున్నట్టు సోషల్‌మీడియాలో పలువురు కామెంట్లు కూడా చేస్తున్నారు.

తోటి కంపెనీలపై వేధింపులు కూడా..
‘ముఖ్య’నేత అండతో తోటి వ్యాపారవేత్తలను, కంపెనీలను కూడా కేఎల్‌ఎస్‌ఆర్‌ ప్రతినిధులు వేధింపులకు గురిచేస్తున్నట్టు ఆరోపణలు వినిపిస్తున్నాయి. ఈ ఏడాది మొదట్లో జరిగిన ఘటనే దీనికి ఉదాహరణగా ప్రతిపక్ష నేతలు చెప్తున్నారు. కేఎల్‌ఎస్‌ఆర్‌ కంపెనీ తనను, తన కుటుంబాన్ని వేధిస్తున్నదని హైదరాబాద్‌కు చెందిన వ్యాపారవేత్త, బెంగాల్‌ కోల్డ్‌ రోలర్స్‌ ప్రైవేట్‌ లిమిటెడ్‌ డైరెక్టర్‌ సౌరభ్‌ అగర్వాల్‌ గత ఫిబ్రవరిలో సుప్రీంకోర్టులో పిటిషన్‌ దాఖలు చేశారు. చెన్నైలోని ఎన్‌సీఎల్‌ఏటీలో కొనసాగుతున్న కేసులో తాను కూడా పిటిషనర్‌గా ఉన్నానని, అయితే, ఈ కేసును ఉపసంహరించుకోవాలని పోలీసులతో కేఎల్‌ఎస్‌ఆర్‌ కంపెనీ ప్రతినిధులు వేధిస్తున్నారని అగర్వాల్‌ ఆరోపించారు. 75 ఏండ్ల వయసున్న తన తల్లిని ఇదే విషయమై అరెస్ట్‌ చేసి వేధించినట్టు పిటిషన్‌లో ఆవేదన వ్యక్తం చేశారు. కేఎల్‌ఎస్‌ఆర్‌ కంపెనీ కోసం‘ముఖ్య’నేత సామాన్యులపై పోలీసుల బలగాలను ప్రయోగిస్తున్నారని బీఆర్‌ఎస్‌ నేతలు మండిపడ్డారు.

న్యాయమూర్తిపైనే ఒత్తిళ్లు..

Re1

ప్రాజెక్టులు దక్కించుకోవడం, భూకబ్జా ఆరోపణలే కాదు.. ఆర్థిక వివాదాల్లో, దివాలా కేసుల్లో తమకు అనుకూలంగా తీర్పు ఇవ్వాలంటూ ఏకంగా న్యాయమూర్తిపైనే ఒత్తిళ్లు తీసుకొచ్చినట్టు కేఎల్‌ఎస్‌ఆర్‌ కంపెనీపై ఆరోపణలు కూడా ఉన్నాయి. కేఎల్‌ఎస్‌ఆర్‌ కంపెనీకి, ఏఎస్‌మెట్‌ కార్పొరేషన్‌ సంస్థల మధ్య ఆర్థిక లావాదేవీలకు సంబంధించిన వివాదం తలెత్తింది. దీంతో ఏఎస్‌మెట్‌ సంస్థ 2023 జూలై 14న హైదరాబాద్‌కు చెందిన ‘నేషనల్‌ కంపెనీ లా ట్రిబ్యునల్‌’ (ఎన్‌సీఎల్‌టీ)ని ఆశ్రయించింది. విచారణ అనంతరం కేఎల్‌ఎస్‌ఆర్‌ కంపెనీ బోర్డును సస్పెండ్‌ చేస్తూ ట్రిబ్యునల్‌ మధ్యంతర ఉత్తర్వులు ఇచ్చింది. దీన్ని సవాల్‌ చేస్తూ సస్పెండ్‌ అయిన కేఎల్‌ఎస్‌ఆర్‌ బోర్డు డైరెక్టర్‌ చెన్నైలోని ఎన్‌సీఎల్‌ఏటీని ఆశ్రయించారు.

జస్టిస్‌ శరద్‌కుమార్‌ శర్మ, టెక్నికల్‌ మెంబర్‌ జితేంద్రనాథ్‌తో కూడిన ధర్మాసం వాదనలు విన్నది. గత ఏడాది జూన్‌ 18న తుది వాదనలు ముగిశాయి. అనంతరం తీర్పును రిజర్వ్‌ చేసిన ధర్మాసనం.. గత ఏడాది ఆగస్టు 13న తుది తీర్పును ఇస్తానని వెల్లడించింది. అయితే, తుది తీర్పు వెలువరించాల్సిన రోజునే అనూహ్యంగా ఈ కేసు విచారణ నుంచి తాను తప్పుకొంటున్నట్టు ట్రిబ్యునల్‌లోని జస్టిస్‌ శరద్‌కుమార్‌ శర్మ ప్రకటించడం సంచలనాన్ని సృష్టించింది. ఉన్నత న్యాయవ్యవస్థకు చెందిన అత్యంత గౌరవనీయ సభ్యుల్లో ఒకరు సంప్రదించి, ఈ కేసులో ఒకరికి అనుకూలంగా ఉత్తర్వులు ఇవ్వాలని కోరారని ఆయన పేర్కొనడం దుమారాన్ని రేపింది. ఈ కారణంగానే ఎంతో బాధతో తాను కేసు విచారణ నుంచి తప్పుకొంటున్నట్టు న్యాయమూర్తి పేర్కొనడం చర్చనీయాంశంగా మారింది. అయితే, కేఎల్‌ఎస్‌ఆర్‌ తరుఫున ‘ముఖ్య’నేతే ఈ ఒత్తిళ్లకు కారణమని ప్రతిపక్ష నేతలు విమర్శించారు.

కారు ఇచ్చి.. కాంట్రాక్టు పట్టు!

Ktr

దివాలా తీసి, కోర్టు కేసులు ఎదుర్కొంటున్న కేఎల్‌ఎస్‌ఆర్‌ కంపెనీకి ఎలాంటి పోటీలేకుండా ఎస్‌ఆర్‌ఎస్పీ స్టేజీ-2 కాంట్రాక్ట్‌ను కట్టబెట్టడంపై బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ మండిపడ్డారు. కారును బహుమతిగా తీసుకొని, బినామీ కంపెనీకి వందల కోట్ల కాంట్రాక్ట్‌ను కట్టబెట్టడంపై రేవంత్‌ ప్రభుత్వాన్ని తప్పుబట్టారు. క్రోనీ క్యాపిటలిజమ్‌పై ఎప్పుడూ పెద్ద స్టేట్‌మెంట్లు ఇచ్చే రాహుల్‌గాంధీకి ఇది సిగ్గుచేటని ధ్వజమెత్తారు. ఈ మేరకు శనివారం ఎక్స్‌లో ట్వీట్‌ చేశారు.

Ppp

Re3

Re4

Re

Comments (0)

User