చదువుల బాట పట్టనున్న చెంచు యువతి

- ఎంసెట్ కోచింగ్ సెంటర్కు రావాలని ఫోన్
- ఆనందం వ్యక్తం చేసిన విద్యార్థిని వెంకటలక్ష్మి
- ప్రత్యేక చొరవ తీసుకున్న సబ్ కలెక్టర్ సలోనిఛాబ్రా
అచ్చంపేట, నవంబర్ 14 : ‘నమస్తే తెలంగాణ’ ప్రచురించిన కథనం ఓ చెంచు యువతి జీవితంలో కొత్త వెలుగులు నింపింది. పేదరికంతో చదువుకు దూరమై అడవిబాట పట్టిన ఆదివాసీ విద్యార్థిని ఆర్తి వెంకటలక్ష్మి మళ్లీ చదువుల బాట పట్టేందుకు మార్గం సుగమవైంది. ఆమె ఉన్నత చదువుల ఆకాంక్షను గుర్తించిన నాగర్కర్నూల్ జిల్లా అచ్చంపేట సబ్ కలెక్టర్, మన్ననూర్ ఐటీడీఏ పీవో సలోనిఛాబ్రా ప్రత్యేక చొరవ తీసుకొని ప్రభుత్వపరంగా నీట్ కోచింగ్ ఇప్పించేందుకు చర్యలు చేపట్టారు.
ఇందులో భాగంగా శనివారం వెంకటలక్ష్మికి కోచింగ్ సెంటర్ నుంచి ఫోన్కాల్ వచ్చింది. నీట్ కోచింగ్లో చేరేందుకు సోమవారం హైదరాబాద్లోని సెంటర్కు రావాలని సంబంధిత అధికారులు ఫోన్ద్వారా సమాచారం ఇచ్చినట్టు వెంకటలక్ష్మి ‘నమస్తే’కు తెలిపింది. చదువుకు దూరమై భవిష్యత్తుపై ఆందోళన చెందుతున్న తనకు తిరిగి చదువుకునే అవకాశం రావడంతో ఆనందం వ్యక్తం చేసింది. తన చదువుకు అండగా నిలిచిన, ప్రత్యేక చొరవ తీసుకున్న అచ్చంపేట సబ్ కలెక్టర్ సలోని ఛాబ్రాకు కృతజ్ఞతలు తెలిపింది.
‘నమస్తే’ కథనంతో మొదలైన మార్పు
నల్లమల అటవీ ప్రాంతంలోని అమ్రాబాద్ మండలం కొమ్మెన్పెంట చెంచు గ్రామానికి చెందిన ఆర్తి వెంకటలక్ష్మి ఇంటర్ బైపీసీ పూర్తి చేసినప్పటికీ కార్పొరేట్ కళాశాల యాజమాన్యం ఒరిజినల్ సర్టిఫికెట్లు ఇవ్వకపోవడంతో ఉన్నత చదువులకు దూరమైంది. చివరకు స్వగ్రామానికి చేరుకొని వ్యవసాయకూలీగా జీవనం సాగిస్తున్న ఆమె దీనస్థితిపై ఈనెల ఒకటో తేదీన ‘నమస్తే తెలంగాణ’ ప్రధాన పత్రికలో ప్రత్యేక కథనం ప్రచురితమైంది. స్పందించిన అచ్చంపేట సబ్ కలెక్టర్, ఐటీడీఏ పీవో సలోనిఛాబ్రా విద్యార్థిని పరిస్థితి తెలుసుకొని కార్పొరేట్ కళాశాల నుంచి ఒరిజినల్ సర్టిఫికెట్లు తెప్పించి అందజేశారు. అంతటితో ఆగకుండా ఉన్నత విద్యకు అవసరమైన సహకారం అందించేందుకు ముందుకొచ్చారు. ప్రభుత్వంతో మాట్లాడి కోచింగ్ ఇప్పిస్తామని ఇచ్చిన హామీని కార్యరూపంలోకి తీసుకొచ్చే దిశగా చర్యలు చేపట్టారు.
Comments (0)