గ్రీన్క్యాబ్.. గో బ్యాక్

- అనుమతులు రద్దు చేయాలని తెలంగాణ క్యాబ్ డ్రైవర్ల డిమాండ్
- సీఎం రేవంత్ స్వప్రయోజనాల కోసమని ఆగ్రహం
- ఇతర రాష్ర్టాల్లో స్థానిక క్యాబ్ డ్రైవర్లకు అండగా సర్కార్
- గ్రీన్ క్యాబ్లను రిజిస్ట్రేషన్ చేయొద్దని కర్ణాటక ఆదేశాలు
- తమిళనాడు, మహారాష్ర్టాల్లోనూ సేవల ప్రారంభానికి నో..
- పట్టించుకోని సీఎం.. స్పందించని రవాణా శాఖ మంత్రి
- క్యాబ్ల రాకపై సీఎం రేవంత్ రెడ్డి ఇలా..
‘విన్ గ్రూప్ చేసిన 3 బిలియన్ డాలర్ల పెట్టుబడి, తెలంగాణ రైజింగ్ విజన్ పై, ముఖ్యంగా సుస్థిర పట్టణాభివృద్ధి,హరిత మౌలిక సదుపాయాలపై మాకున్న దృష్టికి నిదర్శనం. ఇది ఒక భారీ విశ్వాస ప్రకటన. ఇది కేవలం మూలధనం మాత్రమే కాదు, ఇది ఒక భవిష్యత్ తరానికి చెందిన, నెట్-జీరో నగరాన్ని నిర్మించడానికి దేశపు మొట్టమొదటి భారీ స్థాయి ఎలక్ట్రిక్ ట్యాక్సీల సముదాయాన్ని ప్రవేశపెట్టడానికి ఒక భాగస్వామ్యం. ఇది మన పౌరుల జీవన నాణ్యతను నేరుగా మెరుగుపరుస్తుంది. ఈ విజన్ను స్థానిక వాస్తవికతగా మార్చేందుకు, దీని అమలును వేగవంతం చేస్తామని మా ప్రభుత్వం హామీ ఇస్తుంది.’
ఇది కర్ణాటక ప్రభుత్వం అభిప్రాయం..
కర్ణాటక రాష్ట్ర రవాణా శాఖ మంత్రి బైరతి సురేశ్ మాట్లాడుతూ.. వియత్నం గ్రీన్ఎస్ఎం కంపెనీ ప్రతిపాదించిన తకువ ఛార్జీలు స్థానిక ట్యాక్సీ డ్రైవర్లకు నష్టం కలిగిస్తాయనే ఆందోళనతో, దాని విస్తరణకు అనుమతి నిరాకరించినట్లు తెలిపారు.గ్రీన్ ఎస్ఎమ్ కు అనుమతి ఇవ్వవద్దని అధికారులకు చెప్పానన్నారు. వారు రూ. 8కే సేవలు అందిస్తే, మా డ్రైవర్లు నష్టపోతారని వివరించారు. తుది నిర్ణయం తీసుకునే ముందర సీఎంతో చర్చిస్తామని అన్నారు.
సిటీబ్యూరో, నవంబర్ 17 (నమస్తే తెలంగాణ) : తెలంగాణలో ఆటో, క్యాబ్ రంగాలపై ఆధారపడి లక్షలాది మంది డ్రైవర్లు ఉపాధి పొందుతున్నారు. ఇటువంటి పరిస్థితుల్లో కాంగ్రెస్ ప్రభుత్వం అధికారంలో కొలువుదీరినప్పటి నుంచి డ్రైవర్ల ఉపాధిని దెబ్బతీసే నిర్ణయాలతో సీఎం రేవంత్ రెడ్డి చెలరేగిపోతున్నారు. మొన్నటి వరకు ఉచిత బస్సుతో ఆటో డ్రైవర్లను రోడ్డున పడేసి ఆత్మహత్యలు చేసుకునేలా చేసిన ప్రభుత్వం.. తాజాగా వియత్నంకు చెందిన గ్రీన్ క్యాబ్లను రాష్ట్రంలోకి ఆహ్వానించి క్యాబ్ డ్రైవర్లను రోడ్డున పడేశారు. కాంగ్రెస్ పాలనలో ఆటో, క్యాబ్ డ్రైవర్ల పరిస్థితి అధ్వానంగా మారింది. దేశంలో తెలంగాణ, తమిళనాడు, ఢిల్లీ, మహారాష్ట్ర, హర్యానా, ఉత్తరప్రదేశ్ కర్ణాటక రాష్ర్టాలో గ్రీన్ ఎస్ఎం క్యాబ్ సేవల ఎంఓయూలు ఉన్నాయి.
అయితే ఇందులో ఢిల్లీలో క్యాబ్ సేవలు ప్రారంభించిన విన్గ్రూప్ ఆ తర్వాతి స్థానంలో తెలంగాణలోనే సేవల ప్రారంభించింది. కాగా, మిగిలిన రాష్ర్టాల్లో గ్రీన్ ఎస్ఎంకు పూర్తిస్థాయి అనుమతులు రాలేదు. క్యాబ్లు వస్తే స్థానిక డ్రైవర్ల పరిస్థితిని అధ్యయనం చేశాక మిగిలిన అనుమతులపై యోచిస్తామని సంబంధిత రాష్ట్రాలు ప్రకటించాయి. కానీ తెలంగాణలో ఏం తొందరొచ్చిందో ఏమో గానీ ఇక్కడి లక్షలాది మంది డ్రైవర్ల పొట్టకొడుతూ గ్రీన్ ఎస్ఎంకు పూర్తిస్థాయి అనుమతులు ఇచ్చేసింది. ఇప్పటికే నగరంలో 2500 గ్రీన్ కార్లు రోడ్లపై చక్కర్లు కొడుతున్నాయని డ్రైవర్లు చెబుతున్నారు. సీఎం రేవంత్ నిర్ణయంపై క్యాబ్ డ్రైవర్లు భగ్గుమంటున్నారు. కనీస ఆలోచన లేకుండా అంతర్జాతీయ కంపెనీని తీసుకొచ్చి తమ పొట్ట కొట్టడమేంటని ఆగ్రహం వ్యక్తం చేస్తున్నారు. గ్రీన్ ఎస్ఎం క్యాబ్లు రద్దు చేసే వరకు ఉద్యమిస్తామని హెచ్చరించారు.
‘నో’ చెప్పిన కర్ణాటక..
కర్ణాటకలో గ్రీన్ ఎస్ఎం క్యాబ్ సేవలకు తొలుత అనుమతినిచ్చినా కేవలం వంద కార్ల వినియోగానికి గ్రీన్ సిగ్నల్ ఇచ్చింది. అయితే ఆ క్యాబ్ల విధానంపై అక్కడి ప్రభుత్వం అధ్యయనం చేసిన తర్వాత మిగిలిన వాహనాల ఎంట్రీకి ఆలోచన చేయనుంది. ఈ క్రమంలోనే కర్ణాటకలోని స్థానిక డ్రైవర్ల నుంచి నిరసన వ్యక్తమవడంతో 2031 వరకు చెల్లుబాటు అయ్యే అగ్రిగేటర్ అధికార పత్రం కంపెనీ వద్ద ఉన్నప్పటికీ, వియత్నాంకు చెందిన ఎలక్ట్రిక్ క్యాబ్ ఆపరేటర్ గ్రీన్ ఎస్ఎం కొత్త ట్యాక్సీల రిజిస్ట్రేషన్ను నిలిపివేయాలని అధికారులను ఆదేశిస్తూ, ఆ సంస్థ విస్తరణను అడ్డుకోవడానికి కర్ణాటక చర్యలు చేపట్టింది. కర్ణాటక రాష్ట్ర రవాణా శాఖ మంత్రి బైరతి సురేశ్ మాట్లాడుతూ..
ఆ కంపెనీ ప్రతిపాదించిన తకువ ఛార్జీలు స్థానిక ట్యాక్సీ డ్రైవర్లకు నష్టం కలిగిస్తాయనే ఆందోళనతో, దాని విస్తరణకు అనుమతి నిరాకరించినట్లు తెలిపారు. గ్రీన్ ఎస్ఎమ్ కు అనుమతి ఇవ్వవద్దని అధికారులకు చెప్పానన్నారు. వారు రూ.8 లకే సేవలు అందిస్తే, తమ డ్రైవర్లు నష్టపోతారని వివరించారు. తుది నిర్ణయం తీసుకునే ముందర సీఎంతో చర్చిస్తామన్నారు. కానీ తెలంగాణలో సీఎం రేవంత్ రెడ్డి, మంత్రి పొన్నం ప్రభాకర్ మాత్రం ఇక్కడి స్థానిక డ్రైవర్ల కష్టాలు ట్టించుకోకపోవడం గమనార్హం.
తక్కువ ఫేర్తో ఎక్కువ ప్రచారం..
గ్రీన్ ఎస్ఎం క్యాబ్లు కిలో మీటర్కు రూ.9 అంటూ చేసిన ప్రచారంతో ఆ క్యాబ్లపై అందరి దృష్టి పడింది. డ్రైవర్కు నెలకు రూ.35వేల వరకు సంపాదించుకునే అవకాశం ఉందని కంపెనీ ప్రతినిధులు తెలిపారు. క్యాబ్లో అందించే మౌలిక వసతులు సైతం వివరించారు. దీంతో కస్టమర్లు సైతం గ్రీన్ఎస్ఎం యాప్ డౌన్లోడ్ చేస్కొని వినియోగించడం మొదలెట్టారు. అయితే ఇందులో కిలో మీటర్కు రూ.9 కన్నా అధికంగానే ధరలు చూపిస్తున్నాయి. ఇలాంటి తరుణంలో చాలా మంది నుంచి వ్యతిరేకత రావడంతో కంపెనీయే కిలో మీటర్ రూ.9 ప్రకటన తాము చేయలేదని స్పష్టం చేసింది.
ప్రతి రైడ్ ధర కిలో మీటర్, ట్రాఫిక్ పరిస్థితి ఆధారంగా నిర్ణయించబడుతుందని పేర్కొంది. ఈ క్రమంలో ఆ కంపెనీ కూడా మిగిలిన యాప్ల మాదిరిగానే సేవలందించబోతుంది. కానీ ఆ కంపెనీ ప్రయోజనాల కోసం ఇష్టానుసారంగా నిబంధనలకు విరుద్ధంగా వ్యవహరిస్తున్నా ప్రభుత్వం స్పందించకపోవడం వెనుక ఎవరి ప్రయోజనాలున్నాయోనని క్యాబ్ డ్రైవర్లు విమర్శిస్తున్నారు. ఇప్పటికే నగరంలో పలు ప్రాంతాల్లో గ్రీన్ కంపెనీకి వ్యతిరేకంగా డ్రైవర్లు ఆందోళన బాట పట్టారు. 15 రోజుల్లోకి ప్రభుత్వం చర్యలు తీసుకోకపోతే ఛలో సెక్రటేరియెట్, అన్ని ఆర్టీఓల ముందర ఉద్యమం ఉధృతం చేస్తామని హెచ్చరించారు.
సీఎం రేవంత్ రెడ్డితోనే మాకు కష్టాలు
సిటీలో గ్రీన్ ఎస్ఎం క్యాబ్లకు అనుమతినిచ్చి లక్షల మంది క్యాబ్ డ్రైవర్లను రోడ్డున పడేసిన సీఎం రేవంత్ రెడ్డికి కనీస ఆలోచన లేదు. ఇక్కడి డ్రైవర్ల ఉపాధిని దెబ్బతీసే అంతర్జాతీయ కంపెనీకి ఎలా అనుమతిస్తారు.? కనీసం అధ్యయనం కూడా చేయలేదు. ఇప్పటికే గిరాకీ లేక ఈఎంఐలు చెల్లించలేక నష్టపోతున్న తమపై మరింత భారం రేవంత్ రెడ్డి వేయడం ఎంతవరకు సమంజసం. వియత్నంకు చెందిన విన్గ్రూప్ కంపెనీతో రూ.27వేల కోట్ల పెట్టుబడుల ఎంఓయూ చేసుకున్న అన్ని రంగాల్లో రేవంత్ రెడ్డి ప్రయోజనాలే తప్ప ఇక్కడి ప్రజలకు ఏం లాభం చేకూరడం లేదు.
నగేశ్, తెలంగాణ క్యాబ్ డ్రైవర్ల అసోసియేషన్ ప్రెసిడెంట్
ఉద్యమం తప్పదు
నిబంధనలకు విరుద్ధంగా గ్రీన్ ఎస్ఎం కార్యకలాపాలు ఉన్నాయి. స్థానిక ఆటో, క్యాబ్ డ్రైవర్ల ఉనికికే ప్రమాదం. ప్రభుత్వం ఏ మాత్రం ఆలోచన లేకుండా అంతర్జాతీయ కంపెనీ అనగానే డోర్లు తెరవడం మానుకోవాలి. విదేశీ పెట్టుబడులు రావాలి. కానీ ఆ పెట్టుబడుల ముసుగులో ఇక్కడి పౌరుల ఆదాయ వనరులను తుడిచిపెట్టేసేలా ఉండకూడదు. ప్రభుత్వం ఇప్పటికైనా గ్రీన్ ఎస్ఎంపై ఒక స్పష్టమైన ప్రకటన చేయాలి. ఆ కార్ల వినియోగంతో ఇక్కడి డ్రైవర్లపై పడే నష్టం అర్థం చేసుకోవాలి. ప్రభుత్వం మొండిగా వ్యవహరిస్తే డ్రైవర్లందరం ఒక్కటై ఉద్యమిస్తాం.
సత్తిరెడ్డి, ప్రెసిడెంట్, తెలంగాణ ఆటో డ్రైవర్స్ సమాఖ్య
గ్రీన్ ఎస్ఎంను రద్దు చేయాలి
లక్షలాది మంది ఆటో, క్యాబ్ డ్రైవర్ల ఉపాధిని దెబ్బతీస్తున్న గ్రీన్ ఎస్ఎం సర్వీసులను ప్రభుత్వం రద్దు చేయాలి. రద్దు చేయకపోతే రాష్ట్ర వ్యాప్తంగా ఉద్యమిస్తాం. పర్యావరణ పరిరక్షణ పేరుతో ఈవీ వాహనాల ముసుగులో కోట్లాది రూపాయల దందా కోసమే సీఎం రేవంత్ నిర్ణయాలు ఉంటున్నాయి. సొంతంగా ఆటోలు, క్యాబ్లు కొనుగోలు చేసి వాటి అప్పులను తీర్చే పరిస్థితిని కూడా ప్రభుత్వం అడ్డుకుంటుంది. ఇది చాలా ప్రమాదం.
రవి శంకర్, బీపీటీఎంఎం జాతీయ ప్రధాన కార్యదర్శి
Comments (0)