కేబీఆర్‌ ప్రాజెక్టుపై యూటర్న్‌

హైదరాబాద్‌లోని కేబీఆర్‌ పార్క్‌ ఫ్లైఓవర్‌, అండర్‌పాస్‌లకు సంబంధించి పనులు మొదలు పెట్టిన ప్రాజెక్టుపై ప్రభుత్వం యూటర్న్‌ తీసుకున్నది. ఈ మేరకు గుట్టుచప్పుడు కాకుండా ఉత్తర్వులు జారీ చేసింది. కేబీఆర్‌ పార్క్‌ చుట్టూరా ఎదురయ్యే ట్రాఫిక్‌ సమస్య పరిష్కారానికి ఏడు ఫ్లైఓవర్లు, ఏడు అండర్‌పాస్‌లు కలిపి 14 నిర్మాణాలతో కూడిన సుమారు రూ.1,090 కోట్ల ప్రాజెక్టును అట్టహాసంగా మొదలుపెట్టిన సంగతి తెలిసిందే. పర్యావరణవేత్తలు వద్దని వారిస్తున్నా వినకుండా అధికారులు వందల సంఖ్యలో చెట్లను అత్యుత్సాహంతో అడ్డగోలుగా నరికివేశారు.

పార్క్‌ చుట్టూ ఉండే రోడ్డును ఎడాపెడా తవ్విపోశారు. ఇప్పుడు ఆ ప్రణాళికను అటకెక్కించి, జూబ్లీహిల్స్‌ చెక్‌పోస్ట్‌ నుంచి నాగార్జునసర్కిల్‌ వరకు 4.3 కిలోమీటర్ల ఆరు లేన్ల ఎలివేటెడ్‌ కారిడార్‌ మాత్రమే సరిపోతుందని సర్కార్‌ కొత్తపాట ఎత్తుకున్నది. ఉన్నపళంగా ఈ యూటర్న్‌ ఎందుకు తీసుకున్నారో ఊహించడం పెద్ద కష్టమేమీ కాదు. పేదల భూముల పైకి బుల్డోజర్లు నడిపించే సర్కార్‌కు పెద్దల భూముల దగ్గరకు వచ్చేసరికి బ్రేకులు పడ్డాయనేది బహిరంగ రహస్యమే. కానీ సర్కార్‌ చెప్తున్న కారణాలు వేరు. ఆగస్టులో ప్రవేశపెట్టిన వన్‌వే ట్రాఫిక్‌ విధానం సత్ఫలితాలు ఇవ్వడం వల్ల మొత్తం ప్రాజెక్టుపై పునఃసమీక్ష జరిపి ఒక్క ఫ్లైఓవర్‌కే పరిమితం చేసినట్టు సర్కార్‌ విచిత్రమైన వాదనను తెరమీదికి తెచ్చింది. పైగా ఈ కుదింపు వల్ల భూసేకరణ కింద ఖర్చుపెట్టాల్సిన రూ.800 కోట్లు, నిర్మాణానికి అవసరమయ్యే రూ.400 కోట్లు మిగిలిపోతాయని వాదించడం అతితెలివికి పరాకాష్ట.

జరుగబోయే ఖర్చు మాట అటుంచి ఇప్పటిదాకా జరిగిన ఖర్చు మాటేమిటనేది అసలు ప్రశ్న. కేవలం వన్‌వేతో తీరిపోయే సమస్యను భూతద్దంలో చూసి, ఆర్భాటపు ప్రణాళికలు వేసి, కోట్లాది రూపాయలు మట్టిలో పోసి ఇప్పుడు తాపీగా అంతంత ప్రాజెక్టు వద్దు.. ఒక్క ఫ్లైఓవరే ముద్దు’ అని తీర్మానించడం ఏంది? ఇవన్నీ ఒకెత్తు, కూల్చిన భారీ వృక్షాల సంగతి ఏంది? దీనికంతటికీ ఎవరు జవాబుదారీ? ఈ తతంగమంతా అధికారులను ముందుపెట్టి నడిపిస్తుండటం గమనార్హం.

2024లో పరిపాలనా అనుమతులు పొందిన ప్రాజెక్టును రెండేండ్ల తర్వాత ఎందుకు పునఃపరిశీలించారు? ట్రాఫిక్‌ ఇంజినీరింగ్‌, పర్యావరణ ప్రభావం, భూసేకరణ, భవిష్యత్తు ట్రాఫిక్‌ పెరుగుదల వంటి అంశాలను మొదట్లోనే సమగ్రంగా అధ్యయనం చేశారా? పనులు ప్రారంభించి, ప్రజాధనం ఖర్చు చేసిన తర్వాతే ప్రత్యామ్నాయ పరిష్కారం గురించి మాట్లాడటం తలకిందుల పని విధానం కాదా? ఇక్కడ ప్రజాధనం ఒక్కటే సమస్య కాదు. పర్యావరణ పరంగానూ భారీ నష్టం జరిగింది. కేబీఆర్‌ పార్క్‌ చుట్టూ చేపట్టిన చెట్ల నరికివేత, లోతుగా తవ్వకాలు జరపడం వంటి పనులు పర్యావరణ ప్రభావంపై తీవ్ర చర్చకు దారితీశాయి.

కేబీఆర్‌ పార్క్‌ వ్యవహారం ప్రభుత్వం యూటర్నుల పరంపరలో తాజాది మాత్రమే. దుందుడుకుగా ముందుకు ఉరకడం, కోర్టు మొట్టికాయలు వేయడం వల్లనో, ప్రజలు తిరగబడటం వల్లనో యూటర్న్‌ తీసుకోవడం అనేది రేవంత్‌ సర్కారుకు పరిపాటిగా మారిపోయింది. కంచె గచ్చిబౌలి భూముల మీద కన్నేసి రాత్రికిరాత్రే పచ్చని అడవిని మరుభూమిగా మార్చేసి కోర్టు ఆగ్రహించడంతో వెనుకకు తగ్గడం మనం చూశాం. లగచర్లలోనూ ఫార్మా అంటూ, పార్క్‌ అంటూ భూమిని చెరబడితే కోర్టు అడ్డుకున్నది. ఇక తెలంగాణ జలప్రదాయిని అయిన మేడిగడ్డ బరాజ్‌లో స్వల్పమైన మరమ్మతులపైనా నిర్లక్ష్యం వహించి, పంటలు ఎండబెట్టింది.

నీటి కరువు రాగానే మరమ్మతులు అంటూ దాహం వేసినప్పుడు బావి తవ్వుతామని చెప్పినట్టు, మరమ్మతుల ఆలోచనను తాపీగా చెప్తున్నది. జాప్యంతో జరిగిన నష్టానికి బాధ్యులెవరు? అంతెందుకు 22-ఏ పేరిట ఇటీవల సాగించిన తుగ్లక్‌ చేష్టల నాటకానికి ప్రజాగ్రహంతో తెర పడింది. కేబీఆర్‌ పార్క్‌ ప్రాజెక్టు విషయంలో యూటర్న్‌తో కథ అయిపోయినట్టు కాదు. ఇప్పటివరకు పెట్టిన ఖర్చు, కాంట్రాక్టర్లకు చెల్లింపుల లెక్కలను పారదర్శకంగా వివరిస్తూ ప్రభుత్వం శ్వేతపత్రం జారీచేయాల్సిన అవసరమున్నది. వృథా ఖర్చుకు సీఎం, మంత్రులు, అధికారుల్లో బాధ్యులెవరో తేల్చాలి. నష్టాన్ని రాబట్టడానికి విచారణ జరపాలి. చెట్ల నరికివేతపై పర్యావరణ ఆడిట్‌ నిర్వహించాలి. సరైన అధ్యయనం లేకుండా ప్రాజెక్టును పట్టాలెక్కించి, ప్రజాధనం, పర్యావరణ నష్టం కావడానికి బాధ్యులైన వారిపై చర్యలు తీసుకోవాలి.