కమీషన్‌ కొట్టు.. టెండర్‌ పట్టు!

16 November 2026 - 05:00
0 0
కమీషన్‌ కొట్టు.. టెండర్‌ పట్టు!
01
  • దవాఖాన పరికరాల టెండర్లలో గోల్‌మాల్‌!
  • రూ.175 కోట్ల టెండర్లలో భారీగా అవకతవకలు
  • టీజీఎంఎస్‌ఐడీసీలో ఓ అధికారిణి చేతివాటం
  • వెంటిలేటర్లు, హై ఎండ్‌ అనస్థీషియా,  ఈఎస్‌డబ్ల్యూఎల్‌ మెషిన్ల కొనుగోలులో అక్రమాలు
  • ఇష్టారాజ్యంగా నిబంధనల సడలింపు  
  • బంజారాహిల్స్‌లోని కేఫ్‌లో డీలింగ్స్‌
  • ఏడాదిలో 20 కోట్లు కొల్లగొట్టిన్రు
  • విచారణకు పలువురి డిమాండ్‌ 

హైదరాబాద్‌, నవంబర్‌ 15 (నమస్తే తెలంగాణ) : రాష్ట్ర వైద్యారోగ్య శాఖలో మరో భారీ అవినీతి బాగోతం వెలుగుచూసింది. ప్రభుత్వ దవాఖానలకు మందులు, పరికరాలు, సర్జికల్స్‌, రీఏజెంట్లను సరఫరా చేసే తెలంగాణ రాష్ట్ర వైద్యసేవలు, మౌలిక సదుపాయాల అభివృద్ధి సంస్థ (టీజీఎంఎస్‌ఐడీసీ) టెండర్ల ప్రక్రియలో ఓ అధికారిణి భారీగా కమీషన్లు దండుకుంటున్నట్టు ఆరోపణలు వెల్లువెత్తుతున్నాయి. మొత్తం రూ.175 కోట్ల విలువైన టెండర్లను ఆమె తాను అనుకున్న కంపెనీలకు కట్టబెడుతున్నట్టు సమాచారం. ఇందులో వెంటిలేటర్లు (రూ.100 కోట్లు), కిడ్నీలో రాళ్లను బ్రేక్‌ చేసేందుకు ఉద్దేశించిన ఈఎస్‌డబ్ల్యూఎల్‌ మెషిన్లు (రూ.40 కోట్లు), హైఎండ్‌ అనస్థీషియా (రూ.35 కోట్లు)కు సంబంధించిన టెండర్లు ఉన్నాయి.  టీజీఎంఎస్‌ఐడీసీ గతంలో ఏనాడూ 40 వెంటిలేటర్లకు మించి టెండర్లు పిలిచేది కాదని తెలిసింది. కానీ, సదరు అధికారిణి ఒకేసారి కోట్ల రూపాయల కమీషన్‌ కొల్లగొట్టేందుకు పెద్ద మొత్తంలో వెంటిలేటర్ల టెండర్‌కు స్కెచ్‌ వేసినట్టు ఆరోపణలు వినిపిస్తున్నాయి.

వెంటిలేటర్లలో 12% కమీషన్‌

ఈ ఏడాది ఆగస్టులో హైఎండ్‌ వెంటిలేటర్లు (433), అడల్ట్‌ అండ్‌ పీడియాట్రిక్స్‌ వెంటిలేటర్లు (436) కొనుగోలుకు  టీజీఎంఎస్‌ఐడీసీ టెండర్లు పిలిచింది. ఐదు కంపెనీలు ఈ టెండర్‌ ప్రక్రియలో పాల్గొన్నట్టు సమాచారం. నిబంధనల ప్రకారం.. టెండరు దాఖలు చేసిన తర్వాత టెక్నికల్‌గా అర్హత పొందిన కంపెనీలు, ఏజెన్సీలకు డెమోలో పాల్గొనే అవకాశం కల్పించాల్సి ఉంటుంది. కానీ, టెండర్‌లో పాల్గొన్న ఏజెన్సీలన్నింటికీ డెమోలో పాల్గొనే అవకాశం కల్పించడం వివాదాస్పదంగా మారింది. తాము కోరుకున్న వారి కోసమే టెండర్‌ నిబంధనలు మార్చారనే ఆరోపణలు వెల్లువెత్తుతున్నాయి. ఒకవైపు, టెండర్‌ ప్రక్రియ జరుగుతుండగానే మరోవైపు, తాము కోరుకున్న ఏజెన్సీకే రూ.100 కోట్ల టెండర్‌ దక్కేలా చేస్తానని సదరు అధికారిణి ఒప్పందం కుదుర్చుకున్నారని తెలిసింది.

ఇందుకు తొలుత ఒక ఏజెన్సీతో 10% కమీషన్‌ ఇచ్చేలా అగ్రిమెంట్‌ చేసుకున్నారని సమాచారం. ఇంతలో మరో ఏజెన్సీ 12% కమీషన్‌ ఇస్తామనడంతో తొలుత ఒప్పందం కుదుర్చుకున్న కంపెనీని సైతం రేస్‌ నుంచి తప్పించేందుకు పావులు కదుపుతున్నారని తెలిసింది. ఈ విషయంలో 10% కమీషన్‌ అగ్రిమెంట్‌ కుదుర్చుకున్న ఏజెన్సీ సైతం గుర్రుగా ఉన్నట్టు సమాచారం. ఈ వ్యవహారాలన్నింటినీ చక్కదిద్దేందుకు సదరు అధికారిణి బంజారాహిల్స్‌లో ఓ కేఫ్‌ను అడ్డాగా మార్చుకున్నట్టు తెలిసింది. ఆయా పనుల నిమిత్తం తన వద్దకు వచ్చే ఏజెన్సీ నిర్వాహకులతో దురుసుగా ప్రవర్తించే సదరు అధికారిణి.. తాను కోరుకున్న ఏజెన్సీలతో మాత్రం ఆఫీసు వేళలు ముగిసిన తర్వాత సైతం సుదీర్ఘంగా చర్చలు నడుపుతున్నట్టు సమాచారం.

హై ఎండ్‌ అనస్థీషియా, ఈఎస్‌డబ్ల్యూఎల్‌ మెషిన్‌లో ఇలా..

హై ఎండ్‌ అనస్థీషియాకు సంబంధించి రూ.35 కోట్ల టెండర్‌లో సైతం ఓ కంపెనీకి లబ్ధి చేకూర్చేలా స్పెసిఫికేషన్లు, సర్టిఫిరెషన్లను సదరు అధికారిణి మార్చేసినట్టు ఆరోపణలు వెల్లువెత్తుతున్నాయి. ఇప్పటికే ఈఎస్‌డబ్ల్యూఎల్‌ మెషిన్‌ (కిడ్నీలో రాళ్లను బ్రేక్‌ చేసే పరికరం)కు సంబంధించి రూ.40 కోట్ల టెండర్‌ ప్రక్రియ ముగియగా భారీగా కమీషన్‌ రూపంలో కొల్లగొట్టినట్టు ఆరోపణలు గుప్పుమంటున్నాయి. టెండర్‌ దక్కించుకున్న ఏజెన్సీని కాదని తాను కోరుకున్న ఏజెన్సీకి టెండర్‌ను కట్టబెట్టేందుకు యత్నించినట్టు తెలిసింది. ఈ విషయంలో అర్హత పొందిన ఏజెన్సీ కోర్టుకు వెళ్లేందుకు సిద్ధం కాగా, తాను కోరుకున్న ఏజెన్సీతోపాటు కలిసి వస్తేనే టెండర్‌ ప్రక్రియ ముందుకు సాగుతుందని కండిషన్‌ పెట్టినట్టు సమాచారం.

తమ కండిషన్‌కు ఒప్పుకున్న రెండు కంపెనీలతో 60:40 నిష్పత్తిలో ఆర్డర్లు ఇచ్చి భారీగా కమీషన్‌ కొల్లగొట్టినట్టు ఆరోపణలున్నాయి. తనతో అగ్రిమెంట్‌ కాని పరికరాల టెండర్లను సదరు అధికారిణి ఉద్దేశపూర్వకంగా తొక్కి పెడుతున్నట్టు ఆరోపణలు గుప్పుమంటున్నాయి. త్రీపారా మానిటర్‌, ఫైపారా మానిటర్ల కొనుగోలు ప్రక్రియను అగ్రిమెంట్‌ కాలేదని పక్కన పెట్టినట్టు సమాచారం. మొత్తంగా ఆంధ్రప్రదేశ్‌లో కూటమి సర్కార్‌ పెద్దలు, రాష్ట్రంలో కాంగ్రెస్‌ పెద్దల పైరవీలతో పోస్టును దక్కించుకున్న సదరు అధికారిణి ఏడాది కాలంలోనే రూ.20 కోట్ల మేర కమీషన్‌ రూపంలో దండుకున్నారనే ఆరోపణలున్నాయి. టీజీఎంఎస్‌ఐడీసీలో ఈ స్థాయిలో అవినీతికి పాల్పడుతున్న సదరు అధికారిణిపై సమగ్ర విచారణ జరిపించాలని పలువురు డిమాండ్‌ చేస్తున్నారు.

Comments (0)

User