ఏడాది కనిష్ఠానికి వెండి ధర

18 November 2026 - 03:00
0 0
ఏడాది కనిష్ఠానికి వెండి ధర
Silver
  • ఒక్కరోజే రూ.9,500 డౌన్‌
  • కిలో రూ.1.69 లక్షలకు పతనం
  • బంగారం రేట్లలోనూ క్షీణత

న్యూఢిల్లీ, నవంబర్‌ 17: బంగారం, వెండి ధరలు క్రమేణా పడిపోతున్నాయి. అంతర్జాతీయ మార్కెట్లలో బలహీన ధోరణి, డాలర్‌తో పోలిస్తే రూపాయి మారకం విలువ బలపడటంతో మంగళవారం ఢిల్లీలో గోల్డ్‌, సిల్వర్‌ రేట్లు మరింతగా క్షీణించాయి. అఖిల భారత సరఫా అసోసియేషన్‌ వివరాల ప్రకారం.. పసిడి ధర వరుసగా ఆరో సెషన్‌లోనూ దిగింది. మరో రూ.1,400 తగ్గి 24 క్యారెట్‌ (99.9 స్వచ్ఛత) 10 గ్రాములు రూ.1,38,600 పలికింది. వెండి ధర సైతం 5 శాతం పతనమై కిలో రూ.1.69 లక్షలకు చేరింది. కాగా, ఈ నెల 9 నుంచి ఇప్పటిదాకా పుత్తడి ధర రూ.8,300 లేదా దాదాపు 6 శాతం తగ్గడం గమనార్హం. వెండి ధర కూడా అమ్మకాల ఒత్తిడికి గురై ఒక్కరోజే కిలోకు రూ.9,500 లేదా 5.3 శాతం తగ్గి రూ.1,69,500కు దిగింది.

ఇది ఏడాది కనిష్ఠ స్థాయి. సోమవారం రూ.1.79 లక్షల వద్ద ముగిసింది. గత ఏడాది నవంబర్‌ 13న దేశీయ మార్కెట్‌లో వెండి కిలో ధర దాదాపు రూ.1,69,000గా నమోదైంది. ఆ తర్వా త మళ్లీ ఇప్పుడే ఆ స్థాయి దరిదాపుల్లోకి వచ్చింది. ఇక ఈ నెల 5 నుంచి 8 సెషన్లలో వెండి ధర రూ.25,000 లేదా 13 శాతం క్షీణించింది. మరోవైపు అంతర్జాతీయ మార్కెట్లో స్పాట్‌ గోల్డ్‌ రేటు ఔన్స్‌కు 3,856.61 డాలర్లుగా స్థిరంగానే ఉన్నది. వెండి 1 శాతం పెరిగి ఔన్సుకు 47.44 డాలర్లకు చేరింది. ఇక హైదరాబాద్‌లో 22 క్యారెట్‌ (99.5 స్వచ్ఛత) గోల్డ్‌ రేటు 700 తగ్గి రూ.1,24,700గా ఉన్నది.

Comments (0)

User