ఎఫ్‌ఎంజీలపై పోలీస్‌ జులుం

• శాంతియుతంగా నిరసన తెలుపుతున్న వారిపై దౌర్జన్యం
• ఇంటర్న్‌లను ఈడ్చుకెళ్లి అరెస్ట్‌
• ఇద్దరికి గాయాలు.. చికిత్స కోసం ఉస్మానియా హాస్పిటల్‌కు తరలింపు

హైదరాబాద్‌, నవంబర్‌ 10(నమస్తే తెలంగాణ): తమ ైస్టెపెండ్‌ పెంచాలని ఆందోళన చేపట్టిన ఫారెన్‌ మెడికల్‌ గ్రాడ్యుయేట్స్‌ (ఎఫ్‌ఎంజీ) ఇంటర్న్‌లపై పోలీసులు జులుం ప్రదర్శించారు. ఐఎంజీ ఇంటర్న్‌లతో సమానంగా ఫారెన్‌ మెడికల్‌ గ్రాడ్యుయేట్స్‌ (ఎఫ్‌ఎంజీ) ఇంటర్న్‌లకు ప్రతినెలా రూ.29,792 ైస్టెపెండ్‌ చెల్లించాలని 34 రోజులుగా ఆందోళన బాటపట్టారు. ఈ ఏడాది జనవరి నుంచి పెండింగ్‌ లో ఉన్న ైస్టెపెండ్‌ బకాయిలన్నింటినీ తక్షణమే విడుదల చేయాలని కోఠి హెల్త్‌ క్యాంపస్‌లో చేపట్టిన రిలే దీక్షలు మంగళవారం ఐదో రోజుకు చేరాయి.

ఈ క్రమంలో డీఎంఈని కలిసేందుకు యత్నిస్తున్న సమయంలో నిరసన తెలుపుతున్న ఎఫ్‌ఎంజీలపై పోలీసులు ఒక్కసారిగా విరుచుకుపడి రోడ్లపైకి ఈడ్చుకెళ్లారు. ఈ క్రమంలో శశాంక్‌కు, వైష్ణవికి గాయాలు కాగా, ఉస్మానియా దవాఖానకు తరలించా రు. మిగతా వారిని పోలీస్‌ వాహనాల్లో మలక్‌పేట్‌, సైదాబాద్‌, డబీర్‌పురా స్టేషన్లకు తరలించారు. పోలీసులు దౌర్జన్యంపై విచారణ జరిపించాలని ఎఫ్‌ఎంజీలు డిమాండ్‌ చేశారు. తమ సమస్యలకు పరిష్కారం చూపేవరకు పోరాటం ఆగదని తేల్చిచెప్పారు. ఈ ఆందోళనలో 100 మంది ఎఫ్‌ఎంజీలు పాల్గొన్నారు.