ఎండిన వరి పైరుకు నిప్పు

- మంచిర్యాల జిల్లాలో రైతుల నిరసన
దండేపల్లి, నవంబర్ 17 : ఆరుగాలం కష్టపడి పండించిన పంటలు కండ్ల ముందే ఎండిపోతుండగా, కడుపు మండిన రైతులు వినూత్న నిరసనకు దిగారు. మంగళవారం మంచిర్యాల జిల్లా దండేపల్లి మండలం నర్సాపూర్ శివారుకు చెందిన రైతులు వరి పైరుకు పెట్రోల్ పోసి నిప్పు పెట్టారు. ఈ సందర్భంగా వారు మాట్లాడుతూ 28వ డిస్ట్రిబ్యూటరీ కాలువ చివరి ఆయకట్టుకు సాగు నీరందక పోవడంతో చేతికొచ్చిన పంటలు ఎండిపోతున్నాయని ఆవేదన వ్యక్తంచేశారు. నర్సాపూర్కు చెందిన సిరిపురం తిరుపతి, తొట్ల సత్తన్న 2 ఎకరాలు వరి సాగుచేశారు.
మామిడి రాజన్న, మిల్కూరి వెంకటేశ్ 2 ఎకరాలు కౌలుకు తీసుకొని సాగుచేశారు. నీరందక నెర్రెలు బారి పంట పూర్తిగా ఎండిపోయింది. పంట చేతికొచ్చే దశలో ఎండిపోవడంతో ఆందోళనకు గురయ్యారు. కడెంలో నీళ్లున్నా అధికారులు సకాలంలో వదలకపోవడంతోనే ఈ పరిస్థితి దాపురించిందని వాపోయారు. నష్టపోయిన రైతులకు పరిహారం అందించాలని ప్రభుత్వాన్ని డిమాండ్ చేశారు.
Comments (0)