ఆగని ఆంధ్ర జలదోపిడీ

20 November 2026 - 05:30
0 0
ఆగని ఆంధ్ర జలదోపిడీ
08
  • సాగర్‌ వద్ద సాగుతున్న సొరంగం నిర్మాణం
  • బీఆర్‌ఎస్‌ ధర్నాతో ప్రభుత్వంలో కదలికలు
  • ఎందుకు సమాచారం ఇవ్వలేదని ఎన్నెస్పీ అధికారులపై జిల్లా మంత్రి మండిపాటు
  • ఏపీ పనులపై ఉన్నతాధికారులకు నివేదిక పంపాం: ఎన్నెస్పీ ఎస్‌ఈ

నందికొండ, నవంబర్‌ 19: ఉమ్మడి నదీజలాలపై ఆంధ్ర పాలకుల దోపిడీ కొనసాగుతూనే ఉన్నది. ఇప్పటికే శ్రీశైలం జలాశయం నుంచి అక్రమ ప్రాజెక్టుల ద్వారా ఏపీలోని 700 కిలోమీటర్ల దూరం కృష్ణా నదీజలాలను తరలించిన ఏపీ.. తాజాగా నాగార్జున సాగర్‌ వద్ద మరో జలదోపిడీకి భారీ కుట్రలు పన్నుతున్నది. సాగర్‌లో డెడ్‌స్టోరేజీ నుంచైనా నీటిని తరలించే ప్లాన్‌తో ఏపీ ప్రభుత్వం ఇన్‌టేక్‌ వెల్‌ నిర్మాణ పనులు చేపడుతున్నా ఇటు కాంగ్రెస్‌ ప్రభుత్వానికి, అటు తెలంగాణ ఇరిగేషన్‌ అధికారులకు పట్టింపే లేకుండాపోయింది.

బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ హెచ్చరికలు, పార్టీ ఆధ్వర్యంలో సాగర్‌లోని ఆంధ్రా సరిహద్దుపై భారీ ధర్నా నిర్వహించడంతో సర్కార్‌లో కదలిక వచ్చింది. అయినా అసంబద్ధ ప్రకటనలతోనే కాలం వెల్లబుచ్చుతున్నారని తెలంగాణ వాదులు, సాగునీటి రంగ నిపుణులు ఆందోళన వ్యక్తంచేస్తున్నారు. ఇటీవల నాగార్జునసాగర్‌ రిజర్వాయర్‌ నుండి కుడివైపున జల్‌జీవన్‌ పథకం పేరుతో ఏపీ గత 9 నెలలుగా పనులు చేపడుతున్నది. ఆంధ్ర ప్రభుత్వం చేపడుతున్న జలదోపిడీపై బీఆర్‌ఎస్‌ పిలుపు మేరకు ఎమ్మెల్సీ ఎంసీ కోటిరెడ్డి, మాజీ ఎమ్మెల్యే నోముల భగత్‌ నేతృత్వంలో భారీ శ్రేణులతో బుధవారం నాగార్జునసాగర్‌లోని తెలంగాణ, ఆంధ్ర సరిహద్దు కొత్త వంతెన వద్ద ధర్నా చేపట్టారు.

ఈ ధర్నాతో కాంగ్రెస్‌ ప్రభుత్వ యంత్రాంగలో కదలిక వచ్చి ఆంధ్ర ప్రభుత్వం చేపడుతున్న జల్‌జీవన్‌ పథకంపై ఆరా తీశారు. రూ.1,200 కోట్లతో పల్నాడు, గుంటూరు జిల్లాలకు తాగునీటి కోసం నాగార్జునసాగర్‌లో కుడి వైపు చేపడుతున్న నిర్మాణానికి, కేఆర్‌ఎంబీ, జలవనరుల మండలి అనుమతులు లేవని తెలుసుకుననారు. ఆంధ్ర రాష్ట్రం తమ ఇష్టానుసారం పనులు చేపడుతున్నట్టు గ్రహించిన పభుత్వం.. పనుల నిలుపుదలకు కార్యాచరణ చేపట్టినట్టు తెలిపింది. 9 నెలలుగా పనులు జరుగుతున్నా తమకు సమాచారం ఎందుకివ్వలేదని, బీఆర్‌ఎస్‌ నాయకుల ధర్నాతో తమకు సమాచారం తెలిసిందని అంటూ స్థానిక జిల్లా కాంగ్రెస్‌ మంత్రి ఎన్నెస్పీ అధికారిపై ఆగ్రహం వ్యక్తం చేసినట్టు సమాచారం

వేగవంతంగా పనులు

ఆంధ్రాలోని పల్నాడు, గుంటూరు జిల్లాకు మంచినీటిని అందించాడానికి ఆంధ్ర రాష్ట్రం ప్రభుత్వం 1,200 కోట్లతో నాగార్జుసాగర్‌ రిజర్వాయరకు కుడివైపు రైట్‌బ్యాంక్‌ ప్రాంతంలో జల్‌జీవన్‌ ఇన్‌టేక్‌ వెల్‌ నిర్మాణ పనులు వేగవంతంగా జరుగుతున్నాయి. నాగార్జునసాగర్‌ రిజర్వాయర్‌లో డేడ్‌ స్టోరేజ్‌లో నీరు ఉన్నా ఏడాదికి 1.8 టీఎంసీల నీటిని తోడుకొనే విధంగా ఏపీ ఈ నిర్మాణ పనులు చేపట్టింది. ఇన్‌టేక్‌ వెల, వాటర్‌ట్యాంక్‌ పనులను 2027లో పూర్తి చేసే ప్రణాళికతో ఆ ప్రభుత్వం ఉన్నది.

ఏపీకి కాంగ్రెస్‌ సర్కార్‌ దన్ను

తెలంగాణ రాష్ట్రం ఏర్పడే వరకు కృష్ణాజలాల్లో తమ వాట కంటే అధికంగానే వాడుకుంటూ ఆంధ్రా పాలకులు జల దోపిడీకి పాల్పడ్డారు. తెలంగాణ ఏర్పడిన తర్వాత తొలి ముఖ్యమంత్రి కేసీఆర్‌ తెలంగాణకు రావాల్సిన వాటాను కచ్చితంగా సొంత ప్రాంతానికి తరలిస్తూ తెలంగాణ రాష్ట్రంలో చివరి ఆయకట్టు వరకు సాగునీరు, ప్రతి మారుమూల ప్రాంతానికి తాగునీటిని అందించి కృష్ణా జలాల్లో ఆంధ్ర జల దోపిడీకి అడ్డుకట్ట వేశారు. తెలంగాణలో కాంగ్రెస్‌ ప్రభుత్వం అధికారంలోకి వచ్చిన అనంతరం పరిస్థితులు మారిపోయాయి.

కృష్ణా జలాలను ఏపీ ఇష్టానుసారంగా వాడుకొంటున్నా అధికారంలో ఉన్న కాంగ్రెస్‌ ప్రభుత్వం అడ్డుకోకపోవడంతో ఆంధ్రా పాలకులు మరింతగా రెచ్చిపోతున్నారు. ఇదిలా ఉండగా, ఏపీలో జరుగుతున్న జలజీవన్‌ పనులపై తమకు ఉన్నతాధికారుల నుంచి ఎటువంటి షోకాజ్‌ నోటీసులు అందలేదని, జల్‌జీవన్‌ పనులపై పూర్తిస్థాయిలో తాము రూపొందించిన నివేదికను ఉన్నతస్థాయి అధికారులకు పంపినట్టు ఎన్నెస్పీ ఎస్‌ఈ మల్లికార్జునరావు వెల్లడించారు.

Comments (0)

User