అనుమతుల్లేకుండా నిర్మాణాలొద్దు

- ఏపీ, తెలంగాణకు కేఆర్ఎంబీ సూచన
- ఇరు రాష్ర్టాలకు లేఖలు రాసిన బోర్డు
హైదరాబాద్, నవంబర్19 (నమస్తే తెలంగాణ): అనుమతుల్లేని ప్రాజెక్టుల నిర్మాణంపై తొందరపాటు నిర్ణయాలు తీసుకోవద్దని ఏపీ, తెలంగాణ ప్రభుత్వాలకు కేఆర్ఎంబీ (కృష్ణా రివర్ మేనేజ్మెంట్ బోర్డు) సూచించింది. ఈ మేరకు కేఆర్ఎంబీ సూపరింటెండింగ్ ఇంజినీర్-2 నామ వెంకటరమణ ఇరు రాష్ర్టాల ప్రభుత్వాలకు లేఖలు రాశారు. ఏపీ సర్కార్ వాటర్గ్రిడ్ పేరిట నాగార్జునసాగర్ నుంచి 1.86 టీఎంసీలను తరలించేందుకు అనుమతిలేకుండానే ప్రాజెక్టు పనులను చేపట్టిన విషయమై బీఆర్ఎస్ నిలదీతల తర్వాత తెలంగాణ సర్కార్ కండ్లు తెరచింది.
ఆ తర్వాతే అభ్యంతరాలను వ్యక్తం చేస్తూ, బోర్డుకు ఫిర్యాదులు చేసింది. ఈ నేపథ్యంలో తాజాగా బోర్డు స్పందించింది. నీటి వాటాలు, వినియోగాలకు సంబంధించిన అంశాలు ప్రస్తుతం కృష్ణా జల వివాదాల ట్రిబ్యునల్-2 ఎదుట వాదనలు కొనసాగుతున్నాయని గుర్తుచేసింది. అవార్డు వెలువడాల్సి ఉన్నదని, అదీగాక బోర్డు అధికార పరిధిపై సుప్రీంకోర్టులో విచారణ కొనసాగుతున్నదని గుర్తుచేసింది. ఈ నేపథ్యంలో వివాదాస్పద అంశాల్లో ఆదేశాలు జారీచేసే విషయంలో తమకు పరిమితులున్నాయని స్పష్టంచేసింది.
బోర్డు అధికార పరిధిపై నోటిఫికేషన్ జారీ రాజ్యాంగ విరుద్ధమని అభ్యంతరం వ్యక్తంచేసిన తెలంగాన ప్రభుత్వం, అదే సమయంలో ఆ నోటిఫికేషన్ ఆధారంగా బోర్డు జోక్యాన్ని కోరడం పరస్పర విరుద్ధమైన వైఖరిగా పేర్కొన్నది. ప్రాజెక్టుల వారీగా నీటి కేటాయింపులను సంబంధిత ట్రిబ్యునల్ నిర్ణయించాల్సి ఉంటుందని పేరొన్నారు. ఇకనైనా కొత్త ప్రాజెక్టులపై తొందరపాటు వద్దని రాష్ర్టాలకు తెలిపింది.
Comments (0)