రేవంత్ ఓ పిచ్చి తుక్లక్

20 November 2026 - 05:30
0 0
రేవంత్ ఓ పిచ్చి తుక్లక్
Hr

సూర్యుడి చుట్టూ భూమి తిరిగినట్లు..భూముల చుట్టే రేవంత్‌ ప్రదక్షిణలు

ట్రక్‌ పార్కింగ్‌ భూమి వేలాన్ని రద్దు చేయాలి

లేదంటే 22, 23న నిరాహార దీక్ష..

25న హెచ్‌ఎండీఏ ముట్టడి

ఆయన చర్యలతో భవిష్యత్తులో భూమి కొరత

సిటీబ్యూరో, నవంబరు 19 (నమస్తే తెలంగాణ) :‘సూర్యుడి చుట్టూ భూమి తిరిగినట్లు, సీఎం రేవంత్‌ రెడ్డి ఎప్పుడూ భూముల చుట్టే తిరుగుతున్నారని మాజీ మంత్రి తన్నీరు హరీశ్‌రావు తీవ్ర స్థాయిలో మండిపడ్డారు. పాలనపై కంటే భూముల అమ్మకంపైనే ఆయనకు ఎకువ శ్రద్ధ ఉంది’ అని విమర్శించారు. గత ప్రభుత్వాలు ప్రజలకు ఉపయోగపడని నిరర్థక ఆస్తులను మాత్రమే విక్రయించేవని, కానీ ప్రస్తుత ప్రభుత్వం ప్రజా అవసరాల కోసం సేకరించిన భూములను కూడా అమ్మకానికి పెడుతోందని ఆరోపించారు. కూకట్‌ పల్లి ట్రక్‌ పారింగ్‌ భూమి ప్రభుత్వ భూమి కాదని, ప్రజా ప్రయోజనాల (పబ్లిక్‌ పర్పస్‌) కోసం ప్రత్యేకంగా సేకరించిన స్థలమని రికార్డుల్లో ఉందని గుర్తు చేశారు. భూసేకరణ చట్టం ప్రకారం ఆ అవసరం తీరితే తిరిగి రైతులకే ఇవ్వాలి తప్ప, ఇష్టానుసారంగా విక్రయించే అధికారం ప్రభుత్వానికి లేదని స్పష్టం చేశారు. ‘పబ్లిక్‌ పర్పస్‌’ భూమిని ఎలా అమ్ముతారని, భూముల వేలం నిలిపివేయకపోతే వామపక్షాలతో కలిసి ప్రత్యక్ష ఆందోళనలకు దిగుతామని హరీశ్‌రావు ప్రభుత్వాన్ని హెచ్చరించారు.

కూకట్‌పల్లి ట్రక్‌ పారింగ్‌ భూమి వేలాన్ని వ్యతిరేకిస్తూ వామపక్ష పార్టీల ఆధ్వర్యంలో సోమాజిగూడ ప్రెస్‌ క్లబ్‌లో గురువారం రౌండ్‌ టేబుల్‌ సమావేశం నిర్వహించారు. ముఖ్య అతిథిగా హాజరైన మాజీ మంత్రి, బీఆర్‌ఎస్‌ఎల్పీ డిప్యూటీ ఫ్లోర్‌ లీడర్‌ హరీశ్‌ రావు ముఖ్యమంత్రి రేవంత్‌రెడ్డి లక్ష్యంగా తీవ్రస్థాయిలో విమర్శలు గుప్పించారు. రాష్ట్రంలో భూమి కనిపిస్తే చాలు అమ్మేస్తున్నారని మండిపడ్డారు. ఇప్పటికే 26 వేల ఎకరాలు విక్రయించారని, మరో 20 వేల ఎకరాలను బాంబే స్టాక్‌ ఎక్స్ఛేంజ్‌లో తాకట్టు పెట్టి, బ్రోకర్లకు రూ. 500 కోట్ల కమీషన్‌ ఇచ్చి రూ. 20 వేల కోట్లు అప్పు తెచ్చారని ఆరోపించారు. హెచ్‌సీయూ భూములు, హెచ్‌ఎండీఏ పరిధిలోని 800 ఎకరాల విషయంలోనూ ఇదే తరహాలో వందల కోట్లు బ్రోకర్లకు కట్టబెట్టారని విమర్శించారు. ఈ ఏడాది రూ. 50 వేల కోట్ల విలువైన భూములు అమ్మాలని ప్రభుత్వం లక్ష్యంగా పెట్టుకుందని, మియాపూర్‌, మామిడిపల్లిలో 400 ఎకరాల చొప్పున, చివరకు కాప్రా, అమీన్‌ పూర్‌, బాచుపల్లిలో 300- 400 గజాల స్థలాలను కూడా వదలడం లేదని దుయ్యబట్టారు.

కార్మికుల పొట్ట కొట్టొద్దు..

కూకట్‌ పల్లి ట్రక్‌ పారింగ్‌ వద్ద నిత్యం వెయ్యి కంటైనర్లు లోడ్‌ అవుతాయని, వేలాది మంది కార్మికులు దీనిపై ఆధారపడి జీవిస్తున్నారని హరీశ్‌ రావు తెలిపారు. శేరిలింగంపల్లి, కూకట్‌ పల్లి, కుత్బుల్లాపూర్‌ నియోజకవర్గాల మధ్య ఉన్న ఈ కీలక ప్రాంతంలో ట్రాఫిక్‌ పోలీస్‌ స్టేషన్‌, ఆర్టీఏ కార్యాలయం, ఎమ్మెల్యే క్యాంప్‌ ఆఫీస్‌ ఉన్నాయని, వీటన్నింటిని అమ్మేస్తారా అని ప్రశ్నించారు. ‘రాహుల్‌ గాంధీ ఒకవైపు ప్రభుత్వ ఆస్తులు, భూములు అమ్మొద్దని చెబుతుంటే, రేవంత్‌ రెడ్డి అందుకు విరుద్ధంగా వ్యవహరిస్తున్నారని అన్నారు.

వేలాన్ని రద్దు చేయాలి..

ప్రభుత్వం తక్షణమే ట్రక్‌ పారింగ్‌ భూమి వేలాన్ని రద్దు చేయాలని అఖిలపక్షం తరఫున డిమాండ్‌ చేస్తున్నట్లు హరీశ్‌ రావు తెలిపారు. లేనిపక్షంలో ఈ నెల 22, 23 తేదీల్లో జరిగే నిరాహార దీక్షల్లో, 25న తలపెట్టిన హెచ్‌ఎండీఏ ముట్టడిలో సీపీఐ, సీపీఎం సహా అన్ని వామపక్షాలతో కలిసి బీఆర్‌ఎస్‌ ప్రత్యక్షంగా పాల్గొంటుందని ప్రకటించారు.ఈ వేలం ప్రక్రియను తక్షణమే రద్దు చేయాలని తీర్మానించారు.ఈ సమావేశంలో సీపీఎం రాష్ట్ర కార్యదర్శి జాన్‌వెస్లీ, జిల్లా కార్యదర్శి సత్యం, బీఆర్‌ఎస్‌ ఎమ్మెల్యేలు మాధవరం కృష్ణారావు, కొత్త ప్రభాకర్‌ రెడ్డి, సీపీఐ రంగారెడ్డి జిల్లా కార్యదర్శి ఉమామహేశ్వర్‌, బీఆర్‌ఎస్‌ నేత ఎర్రోళ్ల శ్రీనివాస్‌ తదితరులు పాల్గొన్నారు.

Comments (0)

User