అనంతగిరి నుంచే మూసీ ప్రక్షాళన చేపట్టాలి

• మాజీ మంత్రి సబితాఇంద్రారెడ్డి

వికారాబాద్‌, నవంబర్‌ 14 : వికారాబాద్‌ జిల్లా అనంతగిరిలో పుట్టిన మూసీ నది మూలం నుంచే ప్రక్షాళన చేయాలని మాజీ మంత్రి సబితా ఇంద్రారెడ్డి డిమాండ్‌ చేశారు. శనివారం వికారాబాద్‌ జిల్లా కేంద్రంలోని ఆలంపల్లి వద్ద ఉన్న మురుగు నీటి శుద్ధి కేంద్రం(ఎస్టీపీ)ని మాజీ ఎమ్మెల్యేలు ఆనంద్‌, మహేశ్‌రెడ్డి, బీఆర్‌ఎస్‌ నాయకులతో కలిసి పరిశీలించారు. ఈ సందర్భంగా ఆమె మాట్లాడుతూ..

మూడున్నర ఏండ్ల నుంచి మురుగు నీటి శుద్ధి కేంద్రం మరమ్మతులు చేయకుండా పడావు పట్టించారని మండిపడ్డారు. ఎస్టీపీకి మరమ్మతులు చేయాలని గతంలో అసెంబ్లీలో హరీశ్‌రావు చర్చించారని గుర్తు చేశారు.మూసీ నదిని రూ.1.50 లక్షల కోట్లతో సుందరీకరణ చేస్తామని ప్రగల్బాలు పలుకుతున్న సీఎం వికారాబాద్‌లో మూసీ పుట్టిన చోటే కలుషితం అవుతుంటే ఎందుకు పట్టించుకోవడంలేని ప్రశ్నించారు. మురుగు నీరు అంతా మూసీ ద్వారా గండిపేటకు చేరడంతో ఆనీరు తాగి ప్రజలు అనారోగ్యం పాలవుతున్నారని ఆవేదన వ్యక్తంచేశారు. వెంటనే ఎస్టీపీకి మరమ్మతులు చేసి, శుభ్రమైన నీటిని అందించాలని సూచించారు.