హరీశ్రావు తండ్రి సంవత్సరీకానికి కేసీఆర్

- సత్యనారాయణరావు చిత్రపటానికి ఘన నివాళి
హైదరాబాద్, నవంబర్ 15 (నమస్తే తెలంగాణ) : బీఆర్ఎస్ఎల్పీ డిప్యూటీ లీడర్, మాజీ మంత్రి హరీశ్రావు తండ్రి తన్నీరు సత్యనారాయణరావు సంవత్సరీకానికి బీఆర్ఎస్ అధినేత కే చంద్రశేఖర్రావు హాజరయ్యారు. ఆదివారం మధ్యాహ్నం 12:30 గంటల ప్రాంతంలో ఎర్రవల్లిలోని తన నివాసం నుంచి బయల్దేరిన కేసీఆర్.. హైదరాబాద్ కోకాపేటలోని హరీశ్రావు నివాసానికి చేరుకున్నారు. ఈ సందర్భంగా సత్యనారాయణరావు చిత్రపటానికి పూలమాలలు వేసి ఘనంగా నివాళులర్పించారు. అనంతరం వారి కుటుంబసభ్యులతో కొద్దిసేపు ముచ్చటించారు.
తదనంతరం వారితో కలిసి భోజనం చేశారు. సత్యనారాయణరావుతో ఉన్న అనుబంధాన్ని నెమరువేసుకున్నారు. కేసీఆర్ సతీమణి శోభమ్మ, బీఆర్ఎస్ వర్కింగ్ ప్రెసిడెంట్ కేటీఆర్, ఆయన సతీమణి శైలిమ, కొడుకు హిమాన్షు, రాజ్యసభ సభ్యుడు, ‘నమస్తే తెలంగాణ’ సీఎండీ దీవకొండ దామోదర్రావు తదితరులు హాజరై సత్యనారాయణరావు చిత్రపటానికి నివాళులర్పించారు.
Comments (0)