రుణాలపై పెరిగిన వడ్డీలు

20 November 2026 - 05:30
0 0
రుణాలపై పెరిగిన వడ్డీలు
Intrate
  • హెచ్‌డీఎఫ్‌సీ బ్యాంక్‌, పీఎన్‌బీ సహా పలు బ్యాంకుల ఎంసీఎల్‌ఆర్‌ సవరణలు

న్యూఢిల్లీ, నవంబర్‌ 19: రుణాలు తీసుకోవాలనుకునే వారికి ప్రధాన బ్యాంకులు షాకిచ్చాయి. మార్జినల్‌ కాస్ట్‌ ఆఫ్‌ ఫండ్స్‌ బేస్డ్‌ లెండింగ్‌ రేటు(ఎంసీఎల్‌ఆర్‌)ని ఏకంగా 80 బేసిస్‌ పాయింట్ల వరకు సవరించాయి. గత నెల సమీక్షలో రిజర్వుబ్యాంక్‌ రేపోరేటును పావు శాతం పెంచడంతో రెపోరేటు 5.25 శాతం నుంచి 5.50 శాతానికి సవరించినప్పటీ నుంచి పలు బ్యాంక్‌లు వడ్డీరేట్లను పెంచేశాయి. దీంట్లోభాగంగా ప్రస్తుత నెలలో ఏకంగా అర డజన్‌కు పైగా బ్యాంక్‌లు తమ రుణాలపై వడ్డీరేట్లను పెంచాయి.

బ్యాంక్‌ ఆఫ్‌ మహారాష్ట్ర
బ్యాంక్‌ ఆఫ్‌ మహారాష్ట్ర వివిధ కాలపరిమితుల ఎంసీఎల్‌ఆర్‌లను గరిష్ఠంగా 80 బేసిస్‌ పాయింట్ల వరకు పెంచింది. ఒక్కరోజు కాలపరిమితి కలిగిన రుణాలపై ఎంసీఎల్‌ఆర్‌ను 6.95 శాతం నుంచి 7.75 శాతానికి, ఒక నెల రుణాలపై 7.80 శాతం నుంచి 8.30 శాతానికి పెంచింది. అలాగే మూడు నెలల ఎంసీఎల్‌ఆర్‌ను 8.35 శాతం నుంచి 8.60 శాతానికి, ఆరు నెలల ఎంసీఎల్‌ఆర్‌ను 8.65 శాతం నుంచి 8.85 శాతానికి పెంచింది.

సౌత్‌ ఇండియన్‌ బ్యాంక్‌
సౌత్‌ ఇండియన్‌ బ్యాంక్‌ ఒక్కరోజు రుణాలపై ఎంసీఎల్‌ఆర్‌ 8.20 శాతం నుంచి 8.25 శాతానికి, నెల రుణాలపై రేటును 8.55 శాతం నుంచి 8.60 శాతానికి పెంచింది. మూడు నెలల ఎంసీఎల్‌ఆర్‌ 9.25 శాతం నుంచి 9.30 శాతానికి, ఆరు నెలల ఎంసీఎల్‌ఆర్‌ని 9.30 శాతం నుంచి 9.35 శాతానికి సవరించింది. ఏడాది ఎంసీఎల్‌ఆర్‌ను కూడా 9.50 శాతం నుంచి 9.55 శాతానికి పెంచింది.

హెచ్‌డీఎఫ్‌సీ బ్యాంక్‌
హెచ్‌డీఎఫ్‌సీ బ్యాంక్‌ ఎంసీఎల్‌ఆర్‌ని 15 బేసిస్‌ పాయింట్ల వరకు సవరించింది. దీంతో ఒక్క రోజు రుణాలపై ఎంసీఎల్‌ఆర్‌ 7.80 శాతం నుంచి 7.85 శాతానికి చేరగా, మూడు నెలల ఎంసీఎల్‌ఆర్‌ను 7.95 శాతం నుంచి 8.05 శాతానికి, నెల ఎంసీఎల్‌ఆర్‌ను 7.75 శాతం నుంచి 7.85 శాతానికి పెంచింది. వీటితోపాటు ఆరు నెలల ఎంసీఎల్‌ఆర్‌ను 8.30 శాతానికి, ఏడాది ఎంసీఎల్‌ఆర్‌ను 8.45 శాతానికి పెంచింది. రెండేండ్లు, మూడేండ్ల ఎంసీఎల్‌ఆర్‌లను కూడా 15 బేసిస్‌ పాయింట్ల చొప్పున పెంచి వరుసగా 8.55 శాతం, 8.70 శాతానికి చేర్చింది.

బ్యాంక్‌ ఆఫ్‌ బరోడా
బ్యాంక్‌ ఆఫ్‌ బరోడా కూడా ఎంసీఎల్‌ఆర్‌ని 10 బేసిస్‌ పాయింట్లు సవరించింది. కానీ ఒక్కరోజు రుణాలపై ఎంసీఎల్‌ఆర్‌ 7.85 శాతం వద్ద మార్పు లేకుండా ఉంచింది. నెల ఎంసీఎల్‌ఆర్‌ 7.95 శాతం నుంచి 8 శాతానికి పెంచిన బ్యాంక్‌.. మూడు నెలల ఎంసీఎల్‌ఆర్‌ 8.30 శాతం నుంచి 8.50 శాతానికి, ఆరు నెలల ఎంసీఎల్‌ఆర్‌ను 8.50 శాతం నుంచి 8.70 శాతానికి పెంచింది. ఏడాది కాలపరిమితి కలిగిన 10 బేసిస్‌ పాయింట్లు పెంచి 8.85 శాతానికి సవరించినట్టు పేర్కొంది.

పంజాబ్‌ నేషనల్‌ బ్యాంక్‌
పంజాబ్‌ నేషనల్‌ బ్యాంక్‌ కూడా ఎంసీఎల్‌ఆర్‌ని పది బేసిస్‌ పాయింట్ల చొప్పున సవరించింది. దీంతో ఒక్కరోజు ఎంసీఎల్‌ఆర్‌ 8.10 శాతానికి చేరుకోగా.. నెల 8.35 శాతానికి పెరిగాయి. అలాగే మూడు నెలల ఎంసీఎల్‌ఆర్‌ను 8.60 శాతానికి, ఆరు నెలల రుణాలపై ఎంసీఎల్‌ఆర్‌ను 8.75 శాతానికి పెంచింది. ఏడాది ఎంసీఎల్‌ఆర్‌ 8.90 శాతానికి, మూడేండ్ల ఎంసీఎల్‌ఆర్‌ నుంచి 9.20 శాతానికి పెరిగాయి.

కెనరా బ్యాంక్‌
కెనరా బ్యాంక్‌ అన్ని కాలపరిమితుల ఎంసీఎల్‌ఆర్‌లను 10 బేసిస్‌ పాయింట్ల చొప్పున పెంచింది. దీంతో ఒక్కరోజు ఎంసీఎల్‌ఆర్‌ 8.05 శాతానికి, నెల ఎంసీఎల్‌ఆర్‌ను 8.15 శాతానికి పెంచింది. ఆరు నెలల ఎంసీఎల్‌ఆర్‌ 8.75 శాతానికి, మూడు నెలల ఎంసీఎల్‌ఆర్‌ 8.40 శాతానికి పెరిగాయి.

Comments (0)

User