యువతకు రుణాలు ఉత్తముచ్చటే!

22 November 2026 - 06:30
0 0
యువతకు రుణాలు ఉత్తముచ్చటే!
Study
  • 19న ఇస్తామని అట్టహాసంగా ప్రకటన
  • ఏడాదిన్నర క్రితమే దరఖాస్తుల స్వీకరణ
  • గడువు సమీపించినా అర్హుల ఎంపిక శూన్యం

హైదరాబాద్‌, నవంబర్‌ 21 (నమస్తే తెలంగాణ): రాజీవ్‌ యువవికాసం పథకం కింద రుణాల మంజూరు ఉత్తముచ్చటేనని అధికారవర్గాలు వెల్లడిస్తున్నాయి. ఈ నెల 19 నుంచి రుణాలు మంజూరు చేస్తామని చేసిన ప్రకటన వట్టిదేనని తెలుస్తున్నది. అర్హుల ఎంపికకు సంబంధించి క్షేత్రస్థాయిలో ఇప్పటికీ ఎలాంటి కదలిక లేకపోవడమే ఇందుకు నిదర్శనమని అధికారులు వివరిస్తున్నారు. మరోవైపు ఏడాదిన్నరగా రుణాల కోసం యువత ఎదురుచూస్తున్నది. రాజీవ్‌ యువవికాసం పథకం కింద యువతకు సబ్సిడీ రుణాలు ఇస్తామని కాంగ్రెస్‌ ప్రభుత్వం గత ఏడాది ఫిబ్రవరిలో అసెంబ్లీ వేదికగా ప్రకటించింది.

పథకం కోసం రూ.6వేల కోట్లు కేటాయిస్తున్నట్టు వెల్లడించింది. ప్రతి నియోజకవర్గంలో 5000 మంది యువతకు రుణాలు మంజూరు చేస్తామని ఊదరగొట్టింది. రూ.50 వేల నుంచి రూ.4 లక్షల వరకు 10 నుంచి 30 శాతం వరకు సబ్సిడీ కల్పిస్తామంటూ దరఖాస్తులను స్వీకరించింది. రాష్ట్రవ్యాప్తంగా 16,27,584 మంది దరఖాస్తు చేసుకున్నారు. కాగా లబ్ధిదారులను ఎంపిక చేసి ఐదు దశల్లో రుణాలు మంజూరు చేస్తామని షెడ్యూల్‌ ప్రకటించింది. మొత్తంగా 4,93,234 మందికి రూ.6250.50 కోట్లను సబ్సిడీ రుణాలను విడుదల చేస్తామని పత్రికా ప్రకటనలను సైతం జారీచేసింది. బడ్జెట్లో నిధులను కేటాయించి హడావుడి చేసింది. కానీ ఇప్పటివరకు ఆ పథకం ఒక్క అడుగు కూడా ముందుకు పడలేదు.. పైసా కూడా విదల్చలేదు.

ఈ నెల 19 నుంచే ఇస్తామని ప్రకటన..
అర్హులందరికీ రుణాలిస్తామని ఊదరగొట్టిన సర్కార్‌ ఇటీవల మాటమార్చింది. కేవలం లక్ష వరకు ఉన్న యూనిట్లనే మంజూరు చేయాలని నిర్ణయించింది. పథకం కోసం వచ్చిన దరఖాస్తుల్లో దాదాపు 75శాతానికి పైగా అర్జీలు కేవలం 4 లక్షల యూనిట్‌కే పెట్టున్నట్టు అధికారిక గణాంకాలు వివరిస్తున్నాయి. అంటే ప్రతి 10 మందిలో కేవలం ముగ్గురికే రుణాలు ఇవ్వాలని సూత్రప్రాయంగా నిర్ణయించినట్టు సమాచారం. అదీగాక 2, 3, 4 లక్షల యూనిట్లను ఎత్తివేయడంతోపాటు ఆ దరఖాస్తులను రూ.50 వేల నుంచి లక్ష యూనిట్‌కు మార్పు చేయాలని ఆదేశాలు జారీచేసినట్టు అధికారులు చెప్తున్నారు. ఎంపీడీవోలు ఇప్పటికే యూనిట్ల మార్పును చేపట్టారు.

ఈ నేపథ్యంలో గురువారం నుంచి రాజీవ్‌ యువ వికాసం పథకం కింద లక్ష లోపు రుణాల పంపిణీ చేస్తామని ప్రభుత్వం ప్రకటించింది. నేరుగా అర్హుల ఖాతాల్లోకి నిధులు జమ చేస్తామని మంత్రి మల్లు భట్టి విక్రమార్క గత అక్టోబర్‌లోనే ప్రకటించారు. ఇందుకు మరో రెండు రోజుల గడువు మాత్రమే మిగిలి ఉన్నది. కానీ ఇప్పటికీ రుణాల పంపిణీ అంశంపై ప్రభుత్వం నుంచి ఎలాంటి ఉలుకూపలుకు లేకుండా పోయింది. దీంతో రుణాల మంజూరు ఉత్తముచ్చటేనని తేలిపోయింది.

అర్హులనే ఎంపిక చేయలె!
ఆర్‌వైవీ పథకం అర్హుల ఎంపికకు ప్రభుత్వం 2025 ఫిబ్రవరిలోనే మార్గదర్శకాలు జారీచేసింది. ప్రభుత్వ మార్గదర్శకాలు, జనాభా దామాషా, క్యాటగిరీల వారీగా మంజూరైన యూనిట్లకు తొలుత అర్హులను మండలస్థాయి కమిటీ ఎంపిక చేయాలి. ఆ జాబితాను జిల్లా కమిటీలకు పంపాలి. ఆ జిల్లా కమిటీలు తుది జాబితాను సిద్ధం చేసి, ఇన్‌చార్జి మంత్రికి పంపాలి. ఇన్‌చార్జి మంత్రి ఆమోదంతో లబ్ధిదారులను ప్రకటించాలి. కానీ ఇప్పటికీ అర్హుల జాబితాను ఎక్కడా ప్రకటించలేదు. ఏడాదిన్నరగా ఎక్కడి గొంగళి అక్కడే అనే చందంగా ఉన్నదని అధికారులు సైతం వివరిస్తున్నారు. ప్రభుత్వం తీరుతో సబ్సిడీ రుణం అందని ద్రాక్షగానే మిగిలిందని యువత మండిపడుతున్నది.

యువవికాసం కోసం వచ్చిన దరఖాస్తులు..
వర్గం : వచ్చిన మొత్తం దరఖాస్తులు
ఎస్సీ : 3,65,132
ఎస్టీ : 1,74,865
బీసీ : 7,30,229
ఈబీసీ : 32,998
మైనార్టీ : 1,82,186
క్రిస్టియన్‌ మైనార్టీ : 3,712
మొత్తం : 16,27,584

Print

Comments (0)

User