యాసిన్ సాహసం స్ఫూర్తిదాయకం : ఈఎంసీ చైర్‌ప‌ర్స‌న్ పి.అనిత

ఖమ్మం రూరల్, న‌వంబ‌ర్ 14 : ఇటీవల మురుసు తుఫాన్ ప్రభావంతో ఖమ్మం జిల్లా సత్తుపల్లి మండలం బేతుపల్లి చెరువులో చిక్కుకున్న జాలర్లను కాపాడడంలో కీలక ఎస్‌డీఆర్ఎఫ్ సిబ్బందిలో ఒకరైన ఫేక్ యాసిన్ చూపిన సాహసం ప్రతి ఒక్కరికి స్ఫూర్తిదాయకం అని ఈఎంసీ చైర్‌ప‌ర్స‌న్ పి.అనిత అన్నారు. ఏదులాపురం మున్సిపాలిటీ పరిధి వాసి అయిన షేక్ యాసిన్‌ను శనివారం ఈఎంసీ కార్యాలయంలో ఘనంగా సత్కరించారు. ఈఎంసీ చైర్ పర్సన్ ఆధ్వర్యంలో జరిగిన ఈ కార్యక్రమంలో పలువురు కౌన్సిలర్లు పాల్గొన్నారు. తొలుత యాసిన్‌కు పుష్పగుచ్చాలు అందించిన చైర్‌ప‌ర్స‌న్ అనంతరం కౌన్సిలర్లతో కలిసి శాలువాలతో ఘనంగా సత్కరించారు. ఈ సందర్భంగా చైర్‌ప‌ర్స‌న్ మాట్లాడుతూ.. విధి నిర్వహణలో ప్రాణాలకు తెగించి జాలర్లను రక్షించిన యాసిన్ నేడు ప్రతి ఒక్కరికి స్ఫూర్తిదాయకంగా నిలిచారన్నారు. తోటి వ్యక్తులు ప్రమాదంలో ఉన్న సమయంలో తన ప్రాణాన్ని పణంగా పెట్టి కాపాడడంలో చూపిన తెగువ యువతకు ఎంతో ప్రేరణ ఇచ్చిందన్నారు. యాసిన్ ఈఎంసీ వాసి కావడం మన అందరికీ గర్వకారణమని ఆమె పేర్కొన్నారు. ఈ కార్యక్రమంలో మున్సిపల్ కమిషనర్ ఆళ్ల శ్రీనివాస్ రెడ్డి, కౌన్సిలర్లు నాగేంద్ర ప్రసాద్, బుర్ర మహేశ్‌, కడవ నవీన్, దివ్య పాల్గొన్నారు.