మావోయిస్టు నుంచి మోడలింగ్‌ వైపు

• ర్యాంప్‌ వాక్‌ చేసిన మాజీ మహిళా మావోయిస్టులు

రాయ్‌పూర్‌, ఆగస్టు 13: ఛత్తీస్‌గఢ్‌ అడవుల్లో తిరుగుబాటు జీవితాన్ని గడిపిన మహిళా మావోయిస్టులు..ఆయుధాల్ని వదిలి సరికొత్త జీవితాన్ని ఎంచుకుంటున్నారు. రాయ్‌పూర్‌లో నిర్వహించిన చేనేత దినోత్సవం-2026 కార్యక్రమంలో పాల్గొన్న మహిళా మావోయిస్టులు..తమదైన ప్రత్యేకత చాటుకున్నారు. బస్తర్‌కు చెందిన మహిళా మావోయిస్టులు సంప్రదాయ చేనేత వస్ర్తాలను ధరించి మోడల్స్‌గా మారారు.

వేదికపై ర్యాంప్‌ వాక్‌ చేస్తూ అందర్నీ ఆకట్టుకున్నారు. కోసా సిల్క్‌ వస్త్రాలను ధరించి వారంతా నడుచుకుంటూ వస్తుంటే ఆడిటోరియం చప్పట్లతో మార్మోగింది. మహిళలు కొత్త అవకాశాలను అందిపుచ్చుకొని జీవితంలో ముందుకు నడిచేందుకు ఈ కార్యక్రమం వారికి దోహదపడింది. ఆయుధాల్ని వదిలిన వాళ్లలో కొంతమంది ఇప్పుడు మోడలింగ్‌ వైపు దృష్టిసారించారు. నేటి సమాజంతో కలిసిపోవడానికి ఫ్యాషన్‌ షోలో కూడా పాల్గొంటున్నారు.