భారత్‌ సమ్మిట్‌ అట్టర్‌ఫ్లాప్‌

• సర్కార్‌ సొమ్ముతో కాంగ్రెస్‌ పొలిటికల్‌ షో
• పెట్టుబడుల పేరుతో రాహుల్‌గాంధీ జపం
• ఆశించిన స్థాయిలో రాని విదేశీ ప్రతినిధులు
• వచ్చిన వారితోనే తూతూమంత్రంగా సదస్సు
• సమ్మిట్‌లో పెట్టుబడుల ఊసే ఎత్తని ప్రతినిధులు
• సదస్సు ఫ్లాప్‌తో రాష్ట్ర నేతల ఆశలపై నీళ్లు
• సమ్మిట్‌ నిర్వహణపై రాహుల్‌ తీవ్ర అసహనం
• రూ.కోట్లు వెచ్చించినా రాష్ర్టానికి ఒరిగింది సున్నా

హైదరాబాద్‌, నవంబర్‌ 14 (నమస్తే తెలంగాణ) : తెలంగాణకు అంతర్జాతీయ పెట్టుబడుల కోసం రోడ్‌మ్యాప్‌ తయారు చేస్తామంటూ రూ.50 కోట్ల ప్రజాధనం ఖర్చు చేసి ఏఐసీసీ, కాంగ్రెస్‌ ప్రభుత్వం నిర్వహించిన ‘భారత్‌ సమ్మిట్‌’ అట్టర్‌ఫ్లాప్‌ అయ్యింది. ‘పేరు పెట్టుబడుల మంత్రం.. చేసింది మాత్రం రాహుల్‌గాంధీ జపం’ అని విమర్శలు వెల్లువెత్తుతున్నాయి. హైదరాబాద్‌లోని హెచ్‌ఐసీసీ వేదికగా రెండు రోజులపాటు నిర్వహించిన భారత్‌ సమ్మిట్‌ శనివారం ముగిసింది.

‘ప్రపంచ వ్యాప్తంగా ప్రగతిశీల రాజకీయ శక్తుల మధ్య అంతర్జాతీయ సంబంధాలను బలోపేతం చేయడం, తెలంగాణ అభివృద్ధి, పెట్టుబడుల అవకాశాలు, ప్రభుత్వ విధానాలను అంతర్జాతీయ ప్రతినిధులకు పరిచయం చేయడం’ లక్ష్యంగా సాగిన ఈ సదస్సు పూర్తిగా రాజకీయ ప్రసంగాలకే పరిమితమైందని ఆరోపిస్తున్నారు. కాంగ్రెస్‌ అగ్రనేత రాహుల్‌ను అంతర్జాతీయంగా ప్రొజెక్ట్‌ చేయాలనే ఉద్దేశంతోనే ఈ సదస్సు నిర్వహించారు తప్ప.. పెట్టుబడుల ఊసేలేదని విమర్శిస్తున్నారు. ప్రభుత్వ యంత్రాంగాన్ని, ప్రజాధనాన్ని వినియోగించి నిర్వహించిన ఈ సదస్సుతో చివరికి రాజకీయంగానూ ఆశించిన ఫలితం దక్కలేదనే అభిప్రాయాలు వ్యక్తమవుతున్నాయి. కోట్లాది రూపాయల ప్రజాధనం వెచ్చించి నిర్వహించిన ఈ సదస్సుతో తెలంగాణకు ఒరిగిందేమిటో ప్రభుత్వం వెల్లడించాలని డిమాండ్‌ చేస్తున్నారు.

Bharath Summit

విదేశీ ప్రతినిధుల కన్నా.. కాంగ్రెస్‌ నేతలే ఎక్కువ
భారత్‌ సమ్మిట్‌కు 70కి పైగా దేశాల నుంచి వివిధ రంగాల నిపుణులు, విధానకర్తలు, రాజకీయ ప్రముఖులు, మేధావులు కలిపి వెయ్యి మంది దాకా ప్రతినిధులు హాజరవుతారని సీఎం రేవంత్‌రెడ్డి, నిర్వాహకులు భారీగా ప్రచారం చేశారు. కానీ క్షేత్రస్థాయిలో పరిస్థితి మాత్రం పూర్తి భిన్నంగా కనిపించింది. అంతర్జాతీయ నిపుణులు, మేధావుల సంగతేమో గానీ.. సదస్సు మొత్తం జాతీయ, రాష్ట్ర కాంగ్రెస్‌ నేతలతో నిండిపోయింది. ఎక్కడచూసినా వారే కనిపించారు. ఏ ప్యానెల్‌ చర్చలో పరిశీలించినా వారే ఉన్నారు. ఒక సందర్భంలో వేదికపై గ్రూప్‌ ఫొటో దిగే సమయంలో 25 మంది ఉంటే.. అందులో 13 మంది కాంగ్రెస్‌ నేతలు ఉండటం గమనార్హం. వీరిలో స్పీకర్‌, మండలి చైర్మన్‌, సీఎం, ఆరుగురు మంత్రులు ఉన్నారు.

12 మంది మాత్రమే విదేశీ ప్రతినిధులు ఉండగా, వారు కూడా చిన్న చిన్న దేశాలకు సంబంధించిన వారే. సదస్సులో పాల్గొనబోయే వెయ్యి మందిలో 315 మంది వరకు విదేశీ ప్రతినిధులు ఉంటారని నిర్వాహకులు ప్రచారం చేశారు. కానీ ఆ స్థాయిలో రాలేదని, 115 మంది మాత్రమే హాజరైనట్టు సమాచారం. వారి స్థానాన్ని కాంగ్రెస్‌ నేతలతో భర్తీ చేసినట్టు చెప్తున్నారు. కేంద్ర ప్రభుత్వం విదేశీ ప్రతినిధుల వీసాలు రద్దు చేయడమే ఇందుకు కారణమని కాంగ్రెస్‌ ఆరోపిస్తున్నది. కానీ విదేశీ ప్రతినిధులు ఆసక్తి లేకపోవడం వల్లే సదస్సుకు హాజరుకాలేదని విశ్వసనీయంగా తెలిసింది. ఈ నిజం బయటకు తెలిస్తే పరువు పోతుందనే ఉద్దేశంతోనే హడావుడిగా ఒక్కరోజు ముందు ప్రెస్‌మీట్‌ పెట్టి కేంద్ర ప్రభుత్వంపై విమర్శలు చేస్తూ, వీసాల రద్దు అంటూ వింత వాదన తెరపైకి తెచ్చారని అంటున్నారు. ఒకవేళ అదే నిజమైతే ఫలానా వ్యక్తి వీసాను రద్దు చేశారని ఎందుకు వివరాలు వెల్లడించలేదని ప్రశ్నిస్తున్నారు.

పెట్టుబడులు సున్నా.. రాజకీయమే మిన్న
‘తెలంగాణ అభివృద్ధి, పెట్టుబడుల అవకాశాలు, ప్రభుత్వ విధాలను అంతర్జాతీయ ప్రతినిధులకు పరిచయం చేయడం’ లక్ష్యంగా ఈ సదస్సు నిర్వహిస్తున్నట్టు కాంగ్రెస్‌ ప్రభుత్వం ప్రకటించింది. అయితే వాస్తవ పరిస్థితి మాత్రం అందుకు పూర్తి భిన్నంగా సాగిందనే విమర్శలున్నాయి. పెట్టుబడులపై చర్చ కన్నా.. రాజకీయ ప్రసంగాలు, విమర్శలకే ప్రాధాన్యం ఇచ్చారని ఆరోపణలు వెల్లువెత్తుతున్నాయి. సాధారణంగా అంతర్జాతీయ పెట్టుబడుల సదస్సుల్లో వివిధ దేశాల పారిశ్రామికవేత్తలు, పెట్టుబడిదారులు, కంపెనీల ప్రతినిధులతో చర్చలు జరుగడం, ఒప్పందాలు కుదరడం, కొత్త పరిశ్రమల ఏర్పాటుకు మార్గం సుగమం కావడం సహజం. కానీ భారత్‌ సమ్మిట్‌లో ఆ దిశగా సాధించిన ఫలితాలపై స్పష్టత లేదు.

ఐటీ, పారిశ్రామికాభివృద్ధి, ఆర్థిక అసమానతలు, వాతావరణ మార్పులు, ప్రజాస్వామ్యం వంటి అంశాలపై చర్చలు జరిగినా, వాటిని రాష్ట్రానికి పెట్టుబడులుగా మలిచే కార్యాచరణ ఏమిటన్నది ప్రభుత్వం వెల్లడించలేదు. సదస్సు ఆద్యంతం కేంద్ర ప్రభుత్వంపై, ప్రధాని మోదీ, పారిశ్రామికవేత్త ఆదానీలపై విమర్శలు గుప్పించేందుకే రాహుల్‌ గాంధీ, కాంగ్రెస్‌ నేతలు ప్రాధాన్యమిచ్చారు. సీఎం రేవంత్‌రెడ్డి మాత్రం ఈ సదస్సును డిసెంబర్‌ 7, 8, 9 తేదీల్లో జరుగనున్న ఇన్వెస్ట్‌ తెలంగాణ గ్లోబల్‌ సమ్మిట్‌కు ముందస్తు వేదికగా అభివర్ణించారు. ఒకవేళ అదే నిజమైతే ప్రత్యేకంగా కాంగ్రెస్‌ రాజకీయ ఎజెండాతో సదస్సు నిర్వహించాల్సిన అవసరమేమిటన్న ప్రశ్నలు తలెత్తుతున్నాయి. మొత్తంగా రాష్ట్ర ప్రభుత్వం ప్రజాధనాన్ని ఖర్చు చేసి కాంగ్రెస్‌ రాజకీయ ఎజెండాను ప్రచారం చేసిందని ప్రతిపక్షాలు, రాజకీయ విశ్లేషకులు మండిపడుతున్నారు.

సదస్సు నిర్వహణపై రాహుల్‌ సీరియస్‌!
సదస్సు ఏర్పాట్లు, అంతర్జాతీయ ప్రతినిధులను రప్పించడంలో రాష్ట్ర నాయకత్వం, నిర్వాహకుల వైఫల్యంపై రాహుల్‌ గాంధీ తీవ్ర అసంతృప్తి వ్యక్తం చేసినట్టు పార్టీ వర్గాల్లో చర్చ జరుగుతున్నది. సదస్సు పూర్తయిన తర్వాత పార్టీ నేతలపై ఆయన సీరియస్‌ అయ్యారని సమాచారం. అంతర్జాతీయ స్థాయి సదస్సు అని చెప్పి కనీస సమన్వయం లేకుండా వ్యవహరించడంపై ఆయన వారిపై మీద మండిపడ్డారట. విదేశాల నుంచి అంతర్జాతీయ స్థాయి వ్యక్తులను రప్పించడంలో ఎందుకు విఫలమయ్యారని ప్రశ్నించినట్టు తెలిసింది. స్థాయికి తగిన విదేశీ ప్రతినిధులు లేకుండా ఇంత పెద్ద సదస్సు నిర్వహించి ప్రయోజనం ఏమిటని నిలదీసినట్టు సమాచారం. సదస్సులో విదేశీ ప్రతినిదుల కన్నా కాంగ్రెస్‌ నేతలు, కార్యకర్తలే ఎక్కువ కనిపించారని, ఈ మాత్రం దానికి అంతర్జాతీయ సదస్సు అని పేరు పెట్టాలా? అంటూ ఆగ్రహం వ్యక్తం చేసినట్టు తెలిసింది.

రాహుల్‌ రాజకీయ ఎజెండాకే ప్రాధాన్యం!
భారత్‌ సమ్మిట్‌ నిర్వహణ వెనుక రాష్ర్టానికి పెట్టుబడుల కన్నా.. కాంగ్రెస్‌ రాజకీయ లక్ష్యాలకే ఎక్కువ ప్రాధాన్యం ఉన్నదనే విమర్శలు వ్యక్తమయ్యాయి. మరీ ముఖ్యంగా కేవలం రాహుల్‌ గాంధీని వచ్చే లోక్‌సభ ఎన్నికల సమయానికి ప్రధాని అభ్యర్థిగా, ఒక బలమైన నాయకుడిగా నిలబెట్టే ప్రయత్నంలో భాగంగానే ఈ సదస్సు నిర్వహించారనే విమర్శలున్నాయి. సదస్సు ప్రధాన ఉద్దేశాల్లో రాహుల్‌ ప్రపంచ దృక్పథాన్ని అంతర్జాతీయ సమాజానికి పరిచయం చేయడం కూడా ఉన్నదని కాంగ్రెస్‌ సీనియర్‌ నేత సల్మాన్‌ ఖుర్షీద్‌ ముందుగానే వెల్లడించారు. 2029 తర్వాత కాంగ్రెస్‌ అధికారంలోకి రావడం, పార్టీ నేతలు కీలక రాజ్యాంగ పదవుల్లోకి రావాలనే ఆకాంక్షను సైతం ఆయన వ్యక్తం చేశారు. ఈ నేపథ్యంలో సదస్సు అంతర్జాతీయ అంశాలపై చర్చించే వేదికగా మాత్రమే కాకుండా, కాంగ్రెస్‌ రాజకీయ ఆలోచనలను ప్రపంచానికి పరిచయం చేసే వేదికగా మారిందన్న విశ్లేషణలు జరుగుతున్నాయి.

ప్రజాధనంతో పార్టీ ప్రచారమా?
రాష్ట్ర ఆర్థిక పరిస్థితి అంతంత మాత్రంగా ఉన్నదని, రైతులకు పంట నష్టపరిహారం అందించడంలో, సంక్షేమ పథకాల అమల్లోనూ ప్రభుత్వం ఆర్థిక ఇబ్బందులు ఎదురొంటున్నదని స్వయంగా ముఖ్యమంత్రి రేవంత్‌రెడ్డి పదే పదే చెప్తున్నారు. ఇలాంటి సమయంలో అంతర్జాతీయ సదస్సు పేరుతో భారీ ఏర్పాట్లు చేయడం, ప్రచార కార్యక్రమాలు నిర్వహించడంపై విమర్శలు వెల్లువెత్తుతున్నాయి. భారత్‌ సమ్మిట్‌ కోసం ప్రభుత్వం ఏకంగా రూ.50 కోట్లు ఖర్చు చేసినట్టు విశ్వసనీయంగా తెలిసింది. ఇంకా ఎక్కువగా అయ్యిందని సమాచారం. తెలంగాణకు, తెలంగాణ ప్రజలకు ఎలాంటి ఉపయోగం లేని సదస్సు కోసం రూ.50 కోట్ల సొమ్మును మంచినీళ్ల ప్రాయంగా ఖర్చు చేయడంపై విమర్శలు వ్యక్తమవుతున్నాయి. రైతులకు పంట నష్టం సాయం చేసేందుకు నిధులు ఉండవు కానీ ఇలా పార్టీ కార్యక్రమాల కోసం ఖర్చు చేయడానికి మాత్రం కోట్లకు కోట్ల నిధులు సిద్ధంగా ఉంటాయా? అంటూ రాష్ట్ర ప్రజలు మండిపడుతున్నారు. తెలంగాణ ప్రజల సొమ్ముతో రాహుల్‌ గాంధీని, కాంగ్రెస్‌ ప్రచారం చేయిస్తారా? అంటూ మండిపడుతున్నారు.

తెలంగాణకు ఒరిగిందేమిటి?
భారత్‌ సమ్మిట్‌ను హైదరాబాద్‌లో నిర్వహించడం ద్వారా నగరానికి అంతర్జాతీయ గుర్తింపు తీసుకొచ్చామని ప్రభుత్వం చెప్పుకోవచ్చు. వెయ్యి మందికిపైగా ప్రతినిధులు, 70 దేశాల భాగస్వామ్యం నమోదైనట్లు ప్రచారం చేసుకోవచ్చు. కానీ ఇంతటి భారీ కార్యక్రమం నిర్వహించిన తర్వాత రాష్ట్రానికి వచ్చిన స్పష్టమైన ప్రయోజనాలను ప్రజల ముందుంచాల్సిన అవసరం ఉన్నది. పెట్టుబడుల ఒప్పందాలు, కొత్త పరిశ్రమలు, ఉద్యోగాల కల్పన, అంతర్జాతీయ సంస్థల భాగస్వామ్యం వంటి అంశాల్లో సాధించిన పురోగతిని వెల్లడించకుండా కేవలం సదస్సు ఘనంగా జరిగిందని చెప్పుకోవడం వల్ల ప్రయోజనం ఏమిటన్న విమర్శలు వినిపిస్తున్నాయి. కాంగ్రెస్‌కు రాజకీయంగా ప్రచారం లభించి ఉండొచ్చు, రాహుల్‌గాంధీకి అంతర్జాతీయ వేదికపై ప్రసంగించే అవకాశం వచ్చి ఉండొచ్చు, కానీ తెలంగాణ ప్రజలకు, రాష్ట్ర ఆర్థిక వ్యవస్థకు దకిన ప్రయోజనం ఏమిటన్నదే ఇప్పుడు కీలకంగా మారింది.