పోక్సో చట్టం, బాలల హక్కులపై విద్యార్థినులకు అవగాహన

టేకులపల్లి, నవంబర్ 16 : బాల బాలికల రక్షణకు ప్రభుత్వం కల్పించిన చట్టాలపై ప్రతి ఒక్కరూ అవగాహన కలిగి ఉండాలని పారా లీగల్ వాలంటీర్ నరసింగం చరణ్ కుమార్ అన్నారు. సోమవారం టేకులపల్లి మండల కేంద్రంలోని కస్తూరిబా బాలికల పాఠశాల, కళాశాలలో జిల్లా న్యాయ సేవాధికార సంస్థ ఆదేశాల మేరకు సురక్షిత్ బచ్పన్ అభియాన్ ఫేజ్-2 కార్యక్రమంలో భాగంగా బాలల చట్టాలు, పోక్సో చట్టంపై అవగాహన కార్యక్రమం నిర్వహించారు. ఈ సందర్భంగా చరణ్ కుమార్ మాట్లాడుతూ… బాలికల రక్షణకు గర్భస్థ దశ నుండే చట్టాలు వర్తిస్తాయని వివరించారు. 18 ఏళ్లలోపు బాలికలు ఎదుర్కొంటున్న అక్రమాలు, వేధింపుల పట్ల అప్రమత్తంగా ఉండాలని, అలాంటి ఘటనలు ఎదురైనప్పుడు తీసుకోవాల్సిన జాగ్రత్తలు, చట్టపరమైన రక్షణ చర్యలను వివరించారు. చైల్డ్ హెల్ప్లైన్ 1098 సేవలను సద్వినియోగం చేసుకోవాలని సూచించారు. ఈ కార్యక్రమంలో సుమారు 270 మంది విద్యార్థినులు పాల్గొని తమ సందేహాలను నివృత్తి చేసుకున్నారు. స్పెషల్ ఆఫీసర్, అధ్యాపక సిబ్బంది పాల్గొన్నారు.
Comments (0)