ట్రిపుల్‌ ఐటీలో మురుగునీరే దిక్కు

ముథోల్‌, నవంబర్‌ 10: నిర్మల్‌ జిల్లా ముథోల్‌ మండలంలోని బాసర ట్రిపుల్‌ ఐటీలో విద్యార్థులను మురుగు నీటి సమస్య వెంటాడుతున్నది. ప్రస్తుతం పీయూసీ-1, పీయూసీ-2 విద్యార్థులు దాదాపు మూడు వేల మందికిపైగా ఉండగా.. వచ్చే వారం నుంచి ఈ-1 విద్యార్థులు రానుండటంతో సమస్య మరింత జఠిలం కానున్నది.

గంగా, యమున వసతి గృహాల్లో కొన్నిరోజులుగా నల్లాల నుంచి మురుగు నీరు వస్తున్నదని, పలుమార్లు అధికారుల దృష్టికి తీసుకెళ్లినా పట్టించుకోవడం లేదని విద్యార్థులు ఆరోపిస్తున్నారు. ఈ నీటిని వాడటం వల్ల ఇన్‌ఫెక్షన్‌తో చర్మవ్యాధులు వస్తున్నాయని ఆవేదన చెందుతున్నారు. ట్రిపుల్‌ ఐటీలో నెలకొన్న సమస్యలను పరిష్కరించడంలో అధికారులు నిర్లక్ష్యంగా వ్యవహరిస్తున్నారని విద్యార్థుల తల్లిదండ్రులు మండిపడుతున్నారు. నీటి సమస్యను శాశ్వతంగా పరిష్కరించాలని కోరుతున్నారు.