Woman Arrested In Track Blast | రైల్వే ట్రాక్‌ పేలుడు కేసులో మహిళ, మరో వ్యక్తి అరెస్ట్‌.. పాక్‌తో సంబంధాలు

చండీగఢ్: రైలు పట్టాలను పేల్చేసిన కేసులో ఒక మహిళ, ఒక వ్యక్తిని పోలీసులు అరెస్ట్‌ చేశారు. ఆమె నుంచి రెండు ఆయుధాలు, 46 కాట్రిడ్జ్‌లు, కొంత నగదును స్వాధీనం చేసుకున్నారు. ఆ మహిళకు పాకిస్థాన్‌తో సంబంధాలున్నట్లు పోలీస్‌ దర్యాప్తులో తేలింది. (Woman Arrested In Track Blast) నవంబర్ 3న రాత్రి 9:45 గంటల సమయంలో రాజస్థాన్‌లోని శ్రీ గంగానగర్ జిల్లా రామ్‌సింగ్‌పూర్ సమీపంలోని రైలు పట్టాలపై పేలుడు సంభవించింది. పేలుడు ధాటికి రెండు రైల్వే స్లీపర్లు ధ్వంసం కావడంతో పాటు రెండున్నర అడుగుల లోతులో ఒక గొయ్యి ఏర్పడింది. అక్కడి రైలు పట్టాలకు నష్టం వాటిల్లింది. ఈ పేలుడుకు 75 నిమిషాల ముందు అనూప్‌గఢ్-సూరత్‌గఢ్ ప్యాసింజర్ రైలు ఈ ట్రాక్‌పై ప్రయాణించింది. నిందితులు ఈ రైలును పేల్చేందుకు కుట్ర పన్నినట్లు పోలీసులు అనుమానించారు.

కాగా, రాజస్థాన్ ఉగ్రవాద నిరోధక దళం (ఏటీఎస్), శ్రీ గంగానగర్ పోలీసులు, పంజాబ్ పోలీసులు సంయుక్తంగా దీనిపై దర్యాప్తు చేపట్టారు. పాకిస్థాన్‌తో సంబంధాలున్న 21 ఏళ్ల మహాక్‌దీప్ కౌర్, ఆమెకు సహకరించిన 22 ఏళ్ల దవీందర్ సింగ్‌ను పంజాబ్‌లోని గురుదాస్‌పూర్ జిల్లాలో అరెస్ట్‌ చేశారు. ప్రస్తుతం మాదకద్రవ్యాల అక్రమ రవాణా కేసులో జైలులో ఉన్న భర్త నుంచి విడిపోయిన కౌర్‌ వేరుగా నివసిస్తున్నదని పోలీస్‌ అధికారి తెలిపారు. పాకిస్థాన్‌లోని ఇద్దరు హ్యాండ్లర్లతో ఆమెకు సంబంధాలున్నాయని చెప్పారు. వారిలో ఒకరిని ‘చాచా’ అని, మరొకరిని ‘షా’ అని పిలుస్తారని వివరించారు.

మరోవైపు పాకిస్థాన్‌కు చెందిన ఐఎస్‌ఐ హ్యాండ్లర్లు కౌర్‌తో ప్రేమపూర్వక సంభాషణలలో పాల్గొని, ఆమెను ట్రాప్‌ చేసినట్లు పోలీస్‌ అధికారి తెలిపారు. రైల్వే ట్రాక్‌పై పేలుడు జరిపేందుకు పాక్‌ హ్యాండ్లర్ల నుంచి ఆమె డబ్బు తీసుకున్నట్లుగా విచారణలో వెల్లడైనట్లు చెప్పారు. కౌర్‌ నుంచి రెండు ఆయుధాలు, 46 కాట్రిడ్జ్‌లు, రూ. 30,000 స్వాధీనం చేసుకున్నట్లు వివరించారు. నిందితులకు వసతి, బైక్‌, నేర స్థలానికి రవాణా సౌకర్యం కల్పించి సహకరించిన మరో ముగ్గురిని కూడా పోలీసులు అదుపులోకి తీసుకున్నట్లు వెల్లడించారు.