Road accident | గ్యాస్ రిఫైన‌రీ ఉద్యోగుల బ‌స్సు బోల్తా.. 12 మంది దుర్మ‌ర‌ణం..!

Road accident : గ్యాస్ రిఫైన‌రీ (Gas Refinery) సంస్థ‌కు చెందిన ఉద్యోగుల‌తో వెళ్తున్న ఓ బ‌స్సు అదుపుత‌ప్పి బోల్తాప‌డింది. ఈ ప్ర‌మాదంలో 12 మంది ఉద్యోగులు దుర్మ‌ర‌ణం పాల‌య్యారు. మ‌రో 16 మంది తీవ్రంగా గాయ‌ప‌డ్డారు. వారంతా ప్ర‌స్తుతం ఆస్ప‌త్రిలో చికిత్స పొందుతున్నారు. ప‌శ్చిమ ఇరాన్ (West Iran) లోని ఇరాక్ స‌రిహ‌ద్దుకు స‌మీపంలో అబ్ద‌నాన్‌, డెహ్లోరాన్ (Abdanan, Dehloran) మ‌ధ్య ఈ ప్ర‌మాదం జ‌రిగింది.

ఈ ప్ర‌మాదం విష‌యాన్ని ఇరాన్ మీడియా వెల్ల‌డించింది. ఈ ప్ర‌మాదంపై ద‌ర్యాప్తు జ‌రుగుతున్న‌ద‌ని తెలిపింది. గాయాల తీవ్రత దృష్ట్యా మృతుల సంఖ్య పెరిగే అవకాశం ఉందని అక్క‌డి అధికారులు వెల్ల‌డించారు. కాగా ఇరాన్‌లో రహదారి భద్రత రికార్డు చాలా పేలవంగా ఉంది. మార్చి వరకు గడిచిన 12 నెలల్లో రోడ్డు ప్రమాదాల్లో దాదాపు 20 వేల‌ మంది ప్రాణాలు కోల్పోయారని అధికారిక ఇరానియన్ లీగల్ మెడిసిన్ ఆర్గనైజేషన్ జూన్‌లో తెలిపింది.