Vijayasai Reddy | ఏపీలో మరో రాజకీయ పార్టీ.. ‘పరివర్తన రాజనీతి పార్టీ’ని ప్రకటించిన విజయసాయిరెడ్డి!

Vijayasai Reddy | ఆంధ్రప్రదేశ్ రాజకీయాల్లో మరో కొత్త రాజకీయ పార్టీ ఆవిర్భవించింది. మాజీ రాజ్యసభ సభ్యుడు వి. విజయసాయిరెడ్డి ‘పరివర్తన రాజనీతి పార్టీ’ (PRP) పేరుతో నూతన రాజకీయ పార్టీని ప్రకటించారు. విజయవాడలోని ఏ-1 కన్వెన్షన్ సెంటర్‌లో బుధవారం ఉదయం 11 గంటల 11 నిమిషాలకు నిర్వహించిన కార్యక్రమంలో పార్టీ పేరు, జెండా, అజెండాను ఆవిష్కరించారు. రాష్ట్ర రాజకీయాల్లో కుటుంబ ఆధారిత రాజకీయాలకు ప్రత్యామ్నాయంగా తమ పార్టీ పనిచేస్తుందని ఈ సందర్భంగా విజయసాయిరెడ్డి ప్రకటించారు.

తెలుపు, కాషాయ రంగులతో పార్టీ జెండా

పరివర్తన రాజనీతి పార్టీ జెండాను తెలుపు, కాషాయ రంగులతో రూపొందించారు. జెండా మధ్యలో ధర్మచక్రాన్ని ఏర్పాటు చేశారు. పార్టీని సంక్షిప్తంగా PRPగా పిలవనున్నట్లు విజయసాయిరెడ్డి వెల్లడించారు. ప్రజా సమస్యల పరిష్కారం, అభివృద్ధి, సంక్షేమం తమ పార్టీ ప్రధాన లక్ష్యాలని వివరించారు.

రాష్ట్రంలో కొనసాగుతున్న కుటుంబ రాజకీయాలకు తమ పార్టీ ప్రత్యామ్నాయంగా నిలుస్తుందని విజయసాయిరెడ్డి తెలిపారు. రాజకీయాల్లో యువతకు 60 శాతం అవకాశాలు కల్పిస్తామని ప్రకటించారు. యువతకు నాయకత్వ బాధ్యతలు అప్పగిస్తూ.. రాజకీయాల్లో కొత్త తరానికి ప్రాధాన్యం ఇస్తామని చెప్పారు. విద్య, ఉపాధి, వ్యవసాయం, రాష్ట్ర సమగ్ర అభివృద్ధికి తమ పార్టీ ప్రాధాన్యం ఇస్తుందని విజయసాయిరెడ్డి పేర్కొన్నారు. రైతులకు ఉచిత విద్యుత్ అందించడం, నీటి నిల్వ సామర్థ్యాన్ని పెంచడం, ప్రజల ఆదాయాలు మెరుగుపరిచే చర్యలు తమ అజెండాలో కీలక అంశాలని వివరించారు. రాయలసీమ పౌరుషం, ఆత్మగౌరవాన్ని కాపాడుతూనే రాష్ట్రంలోని అన్ని ప్రాంతాల సమగ్ర అభివృద్ధికి కృషి చేస్తామని స్పష్టం చేశారు.

యువతలోనే నాయకుడిని గుర్తించి ముఖ్యమంత్రిని చేస్తా

తన రాజకీయ లక్ష్యాలపై విజయసాయిరెడ్డి కీలక వ్యాఖ్యలు చేశారు. తాను ముఖ్యమంత్రి కావాలనే ఆకాంక్ష లేదని స్పష్టం చేశారు. శక్తి, సామర్థ్యాలు, నాయకత్వ లక్షణాలు ఉన్న యువతలో సమర్థుడైన నాయకుడిని గుర్తించి ముఖ్యమంత్రిని చేస్తానని ప్రకటించారు. ఆంధ్రప్రదేశ్‌ను రెండు కుటుంబాలే పరిపాలించాలా? అని ప్రశ్నించారు. మంచి పని చేస్తే ఎవరైనా అభినందించాల్సిందేనని, తప్పు చేస్తే ఆధారాలతో ప్రశ్నించాల్సిందేనని విజయసాయిరెడ్డి అన్నారు. తాను చేసినా, చంద్రబాబు నాయుడు చేసినా, వైఎస్‌ జగన్‌మోహన్‌రెడ్డి చేసినా తప్పును తప్పుగానే ప్రశ్నించాలని పేర్కొన్నారు.

పరివర్తన రాజనీతి పార్టీ (PRP) పేరుతో విజయసాయి రెడ్డి కొత్త పార్టీ ప్రకటన https://t.co/vx4alslCCM

— Telugu Scribe (@TeluguScribe) November 11, 2026