Teen Tigada | ఆకట్టుకుంటున్న ‘టీన్ తిగడా’ వెబ్ సిరీస్ ట్రైలర్.. నవంబర్ 20 నుంచి జీ5లో స్ట్రీమింగ్!

Teen Tigada | ప్రేమ, కెరీర్, జీవితంలో ఏదో సాధించాలనే తపనతో పాటు యంగ్ ఏజ్లో ఎదురయ్యే ఊహించని మలుపులు, భావోద్వేగాల సమాహారంగా తెరకెక్కిన సరికొత్త వెబ్ సిరీస్ ‘టీన్ తిగడా’. సంగీతం మరియు క్రికెట్ బ్యాక్డ్రాప్లో సాగే ఈ కథ ప్రేక్షకులను అలరించేందుకు సర్వం సిద్ధం చేసుకుంది. స్ట్రీట్ల్యాంప్ మీడియా ఎంటర్టైన్మెంట్ ఎల్ఎల్పీ, ఐ స్క్రీమ్ డ్రీమ్స్ మీడియా ప్రైవేట్ లిమిటెడ్ సంస్థలు సంయుక్తంగా ఈ సిరీస్ను నిర్మించాయి. ప్రసన్న బిష్ట్, దనేష్ రజ్వీ, అర్చిక అరోరా, సమర్థ్ మెహతా, గ్రుషా కపూర్ తదితరులు కీలక పాత్రల్లో నటించారు. ఈ సిరీస్ నవంబర్ 20 నుంచి ప్రముఖ ఓటీటీ వేదిక జీ5లో హిందీలో స్ట్రీమింగ్ కానుంది.
ఈ సిరీస్ ట్రైలర్ యువత జీవితాలు, వారి కలలు, ఆశయాలను కళ్లకు కట్టేలా అందరిలోనూ విపరీతమైన ఆసక్తిని రేపుతోంది. అస్మాని అనే యువతి క్రికెటర్ కావాలని కలలు కంటుంటే, మానస్ అనే యువకుడు సింగర్గా తనకంటూ ప్రత్యేక గుర్తింపు తెచ్చుకోవాలని ప్రయత్నిస్తుంటాడు. ఈ క్రమంలో ఇద్దరి మధ్య ప్రేమ చిగురిస్తుంది. అంతా సాఫీగా సాగుతుందనుకున్న తరుణంలో వారు ఊహించని విధంగా తల్లిదండ్రులు కాబోతున్నామనే విషయం తెలుస్తుంది. ఈ అనూహ్య పరిణామం వారి జీవితాలను ఒక్కసారిగా మార్చేస్తుంది. ఓవైపు తమ కలలు, మరోవైపు ప్రేమ, మరోవైపు కొత్తగా ఎదురైన బాధ్యతలు వంటి ఎన్నో సవాళ్ల మధ్య ఈ జంట ఎలాంటి నిర్ణయాలు తీసుకుంది? వారి భవిష్యత్తు ఎలా మారింది? అనేది ఈ సిరీస్లో అత్యంత ఆసక్తికరంగా చూపించనున్నారు.
ట్రైలర్ విడుదల సందర్భంగా నటి ప్రసన్న బిష్ట్ మాట్లాడుతూ, ఈ కథ చాలా సహజంగా, ప్రతి ఒక్కరికీ కనెక్ట్ అయ్యే సబ్జెక్ట్తో తెరకెక్కిందని తెలిపారు. మనం ఆశించినట్లు జీవితం సాగనప్పుడు ఎలాంటి నిర్ణయాలు తీసుకుంటామనేది ఇందులో చూపించామని, ముఖ్యంగా యువత ఈ కథకు బాగా కనెక్ట్ అవుతారని ఆశిస్తున్నట్లు పేర్కొన్నారు. ప్రేమ, కామెడీ, సరదా సన్నివేశాలు, ఊహించని మలుపులతో ఈ సిరీస్ ఉంటుందని వెల్లడించారు.
అలాగే నటుడు దనేష్ రజ్వీ మాట్లాడుతూ, యువతలో ఉండే ప్రేమ, ఆశయాలు, జీవితంలో ఎదురయ్యే అనూహ్య పరిణామాల చుట్టూ ఈ కథ సాగుతుందని తెలిపారు. అనుకోని పరిస్థితులు ఎదురైనప్పుడు మనుషుల మధ్య సంబంధాలు ఎలా మారుతాయి, ఎలాంటి కఠినమైన నిర్ణయాలు తీసుకోవాల్సి వస్తుంది అనే అంశాలను ఇందులో అద్భుతంగా ఆవిష్కరించామని చెప్పారు. సరదా సన్నివేశాలతో పాటు భావోద్వేగాలకు కూడా ఇందులో మంచి ప్రాధాన్యత ఉందని, నవంబర్ 20 నుంచి జీ5లో స్ట్రీమింగ్ కానున్న ఈ సిరీస్ను ప్రేక్షకులు ఆదరించి విజయవంతం చేయాలని కోరారు.
Comments (0)