ఆరునెలలకో టెట్‌.. డీఎస్సీ హాంఫట్‌!

17 November 2026 - 03:30
0 0
ఆరునెలలకో టెట్‌.. డీఎస్సీ హాంఫట్‌!
Ttt
  • ఉపాధ్యాయ పోస్టుల భర్తీలో సర్కార్‌ జాప్యం
  • పాఠశాల విద్యాశాఖలో 14వేల ఖాళీలు
  • ఊసేలేని కొత్త డీఎస్సీ నోటిఫికేషన్‌

హైదరాబాద్‌, నవంబర్‌ 16 (నమస్తే తెలంగాణ) : ఆరునెలలకోసారి టెట్‌ నోటిఫికేషన్‌.. ఏటా రెండుసార్లు పరీక్షలు.. అభ్యర్థుల నుంచి వేలాది రూపాయల ఫీజు వసూళ్లు. ఇది రాష్ట్రంలోని కాంగ్రెస్‌ సర్కార్‌ డీఎడ్‌, బీఎడ్‌ అభ్యర్థులను మోసం చేస్తున్న తీరు. టెట్‌ నోటిపికేషన్లు ఠంచన్‌గా విడుదల చేస్తున్న సర్కార్‌.. టీచర్‌ పోస్టుల భర్తీ విషయానికి వచ్చేసరికి మాత్రం నిర్లక్ష్యంగా వ్యవహరిస్తున్నది. ఒక్క అడుగు ముందుకు పడటం లేదు. టెట్‌ నిర్వహణలో కనిపిస్తున్న వేగం.. డీఎస్సీ నోటిఫికేషన్‌ విడుదలలో కనిపించడంలేదు. ఇప్పటిదాకా కాంగ్రెస్‌ సర్కార్‌ ఐదు టెట్‌ పరీక్షలు నిర్వహించింది. రెండేండ్లుగా కొత్త డీఎస్సీ ప్రకటన లేకపోవడంతో లక్షలాది మంది అభ్యర్థుల్లో నైరాశ్యం అలుముకున్నది. మరోవైపు పాఠశాల విద్యాశాఖలో 14వేలకు పైగా టీచర్‌ పోస్టులు ఖాళీగా ఉన్నాయి. ఈ పోస్టుల భర్తీకి సర్కార్‌ చొరవ చూపడంలేదు. 2024 ఫిబ్రవరిలో జారీ చేసిన డీఎస్సీ నోటిఫికేషనే ఇప్పటివరకు చివరిది. ఆ తర్వాత కొత్తగా ఒక డీఎస్సీ ప్రకటన వెలువడలేదు. డీఎస్సీ లేకుండా వరుసగా టెట్‌లు నిర్వహించడం వల్ల ప్రయోజనమేందని నిరుద్యోగులు ప్రశ్నిస్తున్నారు.

ఫీజులు దండుకుంటున్న వైనం

ఏటా రెండు టెట్‌ పరీక్షలు నిర్వహిస్తున్న సర్కార్‌ వాటి ద్వారా పోగయ్యే ఫీజులతో ఖనాజా నింపుకొంటున్నది. టెట్‌ కోసం ఒక్కో అభ్యర్థి నుంచి పేపర్‌-1కు రూ.750, రెండు పేపర్లు రాస్తే రూ. వెయ్యి ఫీజు వసూలు చేస్తున్నది. ఎస్సీ, ఎస్టీలకు ఒక పేపర్‌కు రూ.700, రెండు పేపర్లకు రూ.950 ఫీజుగా తీసుకుంటున్నారు. ఒక్కో టెట్‌కు 1.5లక్షల మంది దరఖాస్తు చేసుకుంటున్నారు. డీఎస్సీలో 20 మార్కుల వెయిటేజీ ఉండటంతో టెట్‌లో మార్కులు పెరుగుతాయన్న ఆశతో నిరుద్యోగులు ప్రతిసారీ టెట్‌ పరీక్ష రాస్తున్నారు.

దీంతో ప్రతిసారీ రూ. వెయ్యి చెల్లించాల్సి వస్తున్నది. మీ సేవలో దరఖాస్తుకు రూ.వంద తీసుకుంటున్నారు. సొంత జిల్లాల్లో టెట్‌ పరీక్ష సెంటర్లు వేయడం లేదు. కరీంనగర్‌ అభ్యర్థులకు ఖమ్మంలో.. ఖమ్మం అభ్యర్థులకు నిజామాబాద్‌లో సెంటర్లు వేస్తున్నారు. దీంతో ప్రయాణఖర్చులు, తిండిఖర్చులు తడిసిమోపెడవుతున్నాయి. ఆర్థికభారం పెరుగుతున్నా.. ఉద్యోగం వచ్చే అవకాశాల్లేక నిరుద్యోగులంతా ఉసూరుమంటున్నారు.

Tt1

ఆరు వేల పోస్టులంటూ..

నిరుద్యోగులు ఉద్యమిస్తే 6 వేల పోస్టులతో డీఎస్సీ అంటూ లీకులిచ్చారు. అది కూడా విడుదల చేయలేదు. ఏడాదికి ఐదారువేల మంది టీచర్లు రిటైర్‌ అవుతున్నారు. దీంతో ఖాళీ టీచర్‌ పోస్టుల సంఖ్య పెరుగుతున్నది. రాష్ట్రంలో1.10లక్షల డీఎడ్‌, 2.40లక్షల మంది బీఎడ్‌ అభ్యర్థులున్నారు. 3.5 లక్షల అభ్యర్థుల్లో ఇప్పటికే మూడు లక్షల మంది టెట్‌ పాసయ్యారు. వీరంతా డీఎస్సీ నోటిఫికేషన్‌ కోసం గంపెడాశతో ఎదురుచూస్తున్నారు. కోచింగ్‌ సెంటర్లల్లో శిక్షణ పొందుతున్నారు. సర్కార్‌ మాత్రం ప్రతి ఆరు నెలలకు ఒకసారీ టెట్‌ నోటిఫికేషన్‌ జారీచేస్తున్నది. ప్రభుత్వం పదివేల టీచర్‌ పోస్టులతో డీఎస్సీ నోటిఫికేషన్‌ విడుదల చేయాలని డీఎడ్‌, బీఎడ్‌ టీచర్ల సంఘం నాయకుడు రావుల రామ్మోహన్‌రెడ్డి కోరారు. మ్యానిఫెస్టోలో హామీ ఇచ్చినట్టు టెట్‌ పరీక్ష ఫీజు మినహాయించాలని విజ్ఞప్తిచేశారు.

మెగా డీఎస్సీ పేరిట దగా..

అధికారంలోకి రాగానే 25వేల టీచర్‌ పోస్టులతో మెగా డీఎస్సీ నోటిఫికేషన్‌ ఇస్తామని కాంగ్రెస్‌ ప్రకటించింది. కానీ ఐదు వేల పోస్టులకే 2024లో నోటిఫికేషన్‌ ఇచ్చింది. 2023లో బీఆర్‌ఎస్‌ సరార్‌ 5,089 పోస్టుల భర్తీకి నోటిఫికేషన్‌ జారీచేయగా, ఈ నోటిఫికేషన్‌ రద్దుచేసి, అదనంగా 5,973 పోస్టులు కలిపి మొత్తం 11,062 పోస్టుల భర్తీకి నోటిఫికేషన్‌ జారీచేసింది.

వీటిలో 10,006 పోస్టులు మాత్రమే భర్తీ అయ్యాయి. మరో 1,056 పోస్టుల ఇంకా పెండింగ్‌లోనే ఉన్నాయి. జాబ్‌ క్యాలెండర్‌ ప్రకారం 2025 ఫిబ్రవరిలో డీఎస్సీ నోటిఫికేషన్‌ జారీచేస్తామన్నారు. జాబ్‌క్యాలెండర్‌ జాడలేకుండా పోయింది. మెగా డీఎస్సీ దగా డీఎస్సీ అయ్యింది.

Comments (0)

User