Response | నమస్తే తెలంగాణ కథనానికి స్పందన.. కాల్వకు మరమ్మతులు ప్రారంభం

మాగనూరు : నమస్తే తెలంగాణ దినపత్రిక ( Namaste Telangana) లో ప్రచురితమైన కథనానికి ఎట్టకేలకు స్పందన (Response) లభించింది. కాల్వకు (Canal Repairs ) గండి పడి సాగునీరు వృథాగా పోతున్నా సంబంధిత అధికారులు పట్టించుకోవడం లేదంటూ ప్రచురితమైన కథనం ప్రజాప్రతినిధులు, అధికారుల్లో కదలిక తీసుకొచ్చింది. దీంతో మంత్రి వాకిటి శ్రీహరి ఆదేశాల మేరకు శనివారం కాల్వ మరమ్మతు పనులు ప్రారంభమయ్యాయి.

కాల్వకు పడిన గండిని పూడ్చే పనులతో పాటు కాల్వలో పేరుకుపోయిన పూడికను తొలగించే కార్యక్రమానికి శ్రీకారం చుట్టారు. మండల అధ్యక్షుడు శివరాం రెడ్డి సమక్షంలో జేసీబీ యంత్రాల సహాయంతో పనులు చేపట్టారు. కాల్వకు పడిన గండి కారణంగా నీరు వృథాగా పోతుండటంతో సాగునీటి కోసం ఎదురుచూస్తున్న రైతులు తీవ్ర ఇబ్బందులు ఎదుర్కొంటున్నారు. ఈ సమస్యపై నమస్తే తెలంగాణ దినపత్రికలో ‘ నీటి వృథా కనిపించదా..?’ అనే శీర్షికతో కథనం ప్రచురితమైంది.

సాగునీటి కాల్వల నిర్వహణలో నిర్లక్ష్యం, గండి పూడ్చడంలో జాప్యం, రైతులకు ఎదురవుతున్న ఇబ్బందులను కథనం ద్వారా వెలుగులోకి తీసుకువచ్చారు. వార్త ప్రచురితమైన అనంతరం మంత్రి వాకిటి శ్రీహరి స్పందించి సమస్య పరిష్కారానికి చర్యలు తీసుకోవాలని ఆదేశించారు. పనులు ప్రారంభం కావడంతో స్థానిక రైతులు హర్షం వ్యక్తం చేస్తున్నారు.ప్రజా సమస్యలపై ప్రచురితమైన కథనం అధికార యంత్రాంగంలో కదలిక తీసుకురావడమే కాకుండా సమస్య పరిష్కారానికి దోహదపడటంతో స్థానికంగా నమస్తే తెలంగాణ కథనంపై హర్షం వ్యక్తమవుతోంది.