Ram Gopal Varma | ‘రామాయణం 2’ కలెక్షన్లు పార్ట్1 కంటే పదింతలు ఎక్కువ ఉంటాయి: రామ్ గోపాల్ వర్మ

Ram Gopal Varma | రామాయణం సినిమాపై ప్రముఖ దర్శకుడు రామ్ గోపాల్ వర్మ మరోసారి ప్రశంసల వర్షం కురిపించారు. రూ. 1,200 కోట్ల వసూళ్ల మైలురాయిని దాటిన ఈ సినిమాకు సంబంధించి నిర్మాత నమిత్ మల్హోత్రా ఆర్థిక వ్యూహాన్ని వర్మ సమర్థించారు. అంతేకాకుండా, ఈ చిత్రానికి రాబోయే సీక్వెల్ (‘రామాయణం పార్ట్ 2’) మొదటి భాగం కంటే పదింతలు ఎక్కువ వసూలు చేస్తుందని ఆయన సంచలన జోస్యం చెప్పారు.

ఈ సినిమాను తాను రెండుసార్లు చూశానని, ఇది భారతీయ సిని చరిత్రలోనే అతిపెద్ద హిట్‌గా నిలుస్తుందని వర్మ ఎక్స్ వేదికగా పేర్కొన్నారు. కొందరు ఈ చిత్ర బడ్జెట్ సుమారు రూ. 2,000 కోట్లు ఉంటుందని విమర్శిస్తున్నారని, అయితే మొదటి భాగం అసలు ఖర్చు రూ. 800 కోట్ల లోపే ఉంటుందని ఆయన స్పష్టం చేశారు. విజువల్ ఎఫెక్ట్స్, భారీ సెట్లు వంటి వాటి కోసం చేసిన ఖర్చు భవిష్యత్తులో సీక్వెల్‌కు, గేమింగ్ మరియు ఇతర వెంచర్లకు ప్రధాన ఆస్తులుగా మారుతాయని ఆయన అభిప్రాయపడ్డారు.

తొలి భాగం సాధిస్తున్న భారీ వసూళ్లతో నిర్మాత నమిత్ మల్హోత్రా రెండు భాగాల ఖర్చును మొదటి భాగంతోనే రికవరీ చేస్తారని వర్మ జోస్యం చెప్పారు. కెజీఎఫ్‌తో పోలిస్తే కెజీఎఫ్‌2 ఏ విధంగా ఐదింతలు ఎక్కువ వసూలు చేసిందో, అలాగే రామాయణం పార్ట్ 1తో పోలిస్తే రామాయణం పార్ట్ 2 పదింతలు ఎక్కువ వసూలు చేస్తుందని ఆయన ధీమా వ్యక్తం చేశారు. రాముడి వారసత్వ యుద్ధం, లంకా దహనం, హనుమంతుని విన్యాసాలు, రావణ వధ వంటి భారీ యాక్షన్ సన్నివేశాలతో రెండవ భాగం మరింత అద్భుతంగా ఉంటుందని పేర్కొన్నారు. నితీశ్ తివారీ దర్శకత్వంలో రణ్‌బీర్ కపూర్, యశ్ ప్రధాన పాత్రల్లో నటిస్తున్న ఈ చిత్రం రెండో భాగం 2028 దీపావళికి విడుదల కానుంది.