Nasal Congestion | చలికాలంలో ముక్కు దిబ్బడ సమస్య ఎందుకు ఎక్కువవుతుంది.. తగ్గేందుకు ఏం చేయాలి..?

Nasal Congestion | చలికాలంలో ముక్కు మూసుకుపోవడం, ముఖం చుట్టూ ఒత్తిడిగా లేదా నొప్పిగా అనిపించడం, ముక్కులో దిబ్బడ వంటి సమస్యలు చాలామందిని ఇబ్బంది పెడుతుంటాయి. వీటిని సాధారణ జలుబుగా భావించి నిర్లక్ష్యం చేస్తుంటారు. అయితే అన్ని సందర్భాల్లోనూ ఇవి జలుబు వల్లే రావు. వైరల్ ఇన్ఫెక్షన్లతోపాటు దుమ్ము, బూజు, పెంపుడు జంతువుల నుంచి వచ్చే వెంట్రుకలు, ఇతర అలర్జీ కారకాలు కూడా ఈ సమస్యలకు కారణమవుతాయి. గాలి నాణ్యత తగ్గడం, పొగమంచు, కాలుష్య కారకాలు ముక్కులోని మార్గాలను చికాకు పెట్టి పొడిబారడం, వాపు, దిబ్బడకు దారితీస్తాయి. సమస్యకు అసలు కారణం ఏమిటో తెలుసుకోవడం ముఖ్యం. ఎందుకంటే సాధారణ జలుబు కొద్ది రోజుల్లో దానంతట అదే తగ్గిపోతుంది. కానీ అలర్జీ వల్ల వచ్చే లక్షణాలు అదే అలర్జీ కారకాలకు మళ్లీ గురైనప్పుడు తిరిగి కనిపిస్తాయి. దుమ్ము, కాలుష్యం, పొడి గాలి కూడా ముక్కు, సైనస్ భాగాలను నిరంతరం ఇబ్బంది పెడతాయి. లక్షణాలు ఎప్పుడు మొదలవుతున్నాయి, వాటిని ఏ అంశాలు ప్రేరేపిస్తున్నాయి అనే విషయాలను గమనిస్తే సమస్యను నియంత్రించుకోవడం సులభమవుతుంది.
కారణాలు ఏమిటి..?
చలికాలంలో సైనస్ సమస్యలు పెరగడానికి పలు కారణాలు ఉన్నాయి. ఈ సమయంలో చాలామంది ఎక్కువసేపు ఇంట్లోనే గడుపుతారు. ఇళ్లలో పేరుకుపోయే దుమ్ము, బూజు, ఇతర అలర్జీ కారకాలకు ఎక్కువగా గురయ్యే అవకాశం ఉంటుంది. చల్లని, పొడి గాలి ముక్కులోని లోపలి పొరలను పొడిబారేలా చేసి చికాకు కలిగిస్తుంది. దీనికి కాలుష్యం కూడా తోడవుతుంది. గాలి నాణ్యత తక్కువగా ఉన్నప్పుడు పొగమంచు, ఇతర కాలుష్య పదార్థాలు ముక్కు, సైనస్ లోపలి పొరలను ప్రభావితం చేసి వాపు, దిబ్బడ, అసౌకర్యాన్ని పెంచుతాయి. వాయు కాలుష్యానికి అలర్జీ సంబంధిత పై శ్వాసనాళ సమస్యలు, అలర్జిక్ రైనైటిస్, దీర్ఘకాలిక సైనసైటిస్ వంటి పరిస్థితులకు సంబంధం ఉందని 64 అధ్యయనాలు, దాదాపు 1.2 కోట్ల మంది వివరాలను పరిశీలించిన పరిశోధనలు సూచించాయి. అందువల్ల తరచూ ముక్కు, సైనస్ సమస్యలు ఎదుర్కొనేవారు కాలుష్యానికి గురికావడాన్ని తగ్గించుకోవాలి. ముక్కు నిరంతరం మూసుకుపోవడం, బుగ్గలు, కళ్ల చుట్టూ లేదా నుదుటి భాగంలో ఒత్తిడి, నొప్పి, తలనొప్పి, గొంతులోకి ముక్కు స్రావాలు చేరడం, తరచూ గొంతు సవరించుకోవాల్సి రావడం వంటి లక్షణాలు కనిపిస్తాయి. ముక్కు ద్వారా సౌకర్యంగా శ్వాస తీసుకోవడం కష్టమవుతుంది. ఈ సమస్యలు నిద్రకు, రోజువారీ పనులకు ఆటంకం కలిగిస్తాయి.
తగినంత నీరు తాగితే..
సైనస్ సమస్యల నుంచి ఉపశమనం పొందేందుకు కొన్ని సాధారణ జాగ్రత్తలు పాటించవచ్చు. తగినంత నీరు తాగడం వల్ల ముక్కులోని శ్లేష్మం పలుచగా ఉండి సులభంగా బయటకు వెళ్లేందుకు సహాయపడుతుంది. ఇంట్లో గాలి మరీ పొడిగా ఉంటే హ్యూమిడిఫయర్ ఉపయోగించవచ్చు. సెలైన్ నాసల్ స్ప్రేలు లేదా ముక్కును శుభ్రం చేసే సెలైన్ ద్రావణాలు వాడడం వల్ల దుమ్ము, అలర్జీ కారకాలు, కాలుష్య పదార్థాలు తొలగించేందుకు సహాయపడతాయి. బెడ్షీట్లు, కార్పెట్లు, కర్టెన్లను క్రమం తప్పకుండా శుభ్రం చేయడం ద్వారా ఇంట్లో పేరుకుపోయే అలర్జీ కారకాలను తగ్గించవచ్చు. కాలుష్యం ఎక్కువగా ఉన్న రోజుల్లో బయట ఎక్కువసేపు గడపకుండా ఉండడం మంచిది. ముక్కు దిబ్బడ తగ్గించే స్ప్రేలను వైద్యులు లేదా ఉత్పత్తిపై సూచించిన వ్యవధి కంటే ఎక్కువకాలం ఉపయోగించకూడదు. ఎక్కువకాలం వాడితే కొన్నిసార్లు దిబ్బడ మరింత పెరిగే అవకాశం ఉంటుంది. తుమ్మును బలవంతంగా ఆపుకోవడం కూడా మంచిది కాదు. ముక్కు, చెవులు, సైనస్ భాగాలపై ఒత్తిడి పెరిగే ప్రమాదం ఉంటుంది.
ఈ లక్షణాలు కనిపిస్తే వైద్యులను సంప్రదించాలి..
లక్షణాలు పది రోజులకు మించి కొనసాగినా, తరచూ సైనస్ సమస్యలు తిరిగి వస్తున్నా, ముఖంలో తీవ్రమైన నొప్పి లేదా ఒత్తిడి ఉన్నా వైద్యులను సంప్రదించాలి. నిద్ర, పని లేదా రోజువారీ కార్యకలాపాలకు ఆటంకం కలిగించేంతగా లక్షణాలు పెరిగినా, ఇంట్లో తీసుకునే జాగ్రత్తలతో తగ్గకపోయినా వైద్య పరీక్షలు అవసరం. సమస్యకు అసలు కారణం ఏమిటో ముందుగానే గుర్తిస్తే తగిన చికిత్స అందించడం సులభమవుతుంది. చలికాలంలో వచ్చే ప్రతి ముక్కు దిబ్బడను సాధారణ జలుబుగా భావించకుండా, లక్షణాలు ఎంతకాలం కొనసాగుతున్నాయి, ఏ పరిస్థితుల్లో పెరుగుతున్నాయి అనే విషయాలను గమనించాలి. ముఖ్యంగా పొగమంచు, దుమ్ము, పొడి గాలి వల్ల ఇబ్బంది పెరుగుతున్నవారు వాటికి గురికావడాన్ని తగ్గించుకోవడం ద్వారా సైనస్ సమస్యలను కొంతవరకు నియంత్రించుకోవచ్చని నిపుణులు తెలియజేస్తున్నారు.
Comments (0)