Man Throws Sons Into Canal | ఇద్దరు కుమారులను కాలువలోకి విసిరేసిన తండ్రి.. అడ్డుకునేందుకు ప్రయత్నించిన వారిపై రాళ్ల దాడి

18 November 2026 - 21:30
0 0
Man Throws Sons Into Canal | ఇద్దరు కుమారులను కాలువలోకి విసిరేసిన తండ్రి..   అడ్డుకునేందుకు ప్రయత్నించిన వారిపై రాళ్ల దాడి
Man Throws Sons Into Canal

ముంబై: చాక్లెట్లు కొనిస్తానని చెప్పి ఒక వ్యక్తి తన ఇద్దరు పిల్లలను స్కూటర్‌పై కాలువ వద్దకు తీసుకెళ్లాడు. వారిని నీటిలోకి తోసేశాడు. అక్కడున్న కొందరు రైతులు అతడ్ని అడ్డుకునేందుకు ప్రయత్నించగా వారిపై రాళ్లతో దాడి చేశాడు. కాలువలో గల్లంతైన పిల్లల కోసం ఈతగాళ్ల సహాయంతో పోలీసులు గాలిస్తున్నారు. (Man Throws Sons Into Canal) మహారాష్ట్రలోని ఛత్రపతి శంభాజీనగర్‌ జిల్లాలో ఈ సంఘటన జరిగింది. పైఠాన్ పట్టణానికి చెందిన 40 ఏళ్ల సోమనాథ్ దామోదర్ రోడ్గే దారుణానికి పాల్పడ్డాడు. సోమవారం సాయంత్రం తన ఇద్దరు కుమారులైన 7 ఏళ్ల ఆర్యన్, 5 ఏళ్ల శ్యామ్‌లకు చాక్లెట్లు, వడా పావ్ కొనిస్తానని చెప్పి స్కూటర్‌పై బయటకు తీసుకెళ్లాడు. కాలువలోకి వారిని విసిరేసేందుకు సిద్ధం కాగా, ఆ పిల్లలు భయంతో వణికిపోయారు. ‘నాన్నా, మేము చనిపోతాం, దయచేసి అలా చేయకండి’ అని వారు వేడుకున్నారు. ఏమాత్రం పట్టించుకోని సోమనాథ్‌ తన ఇద్దరు పిల్లలను కాలువలోకి తోసేశాడు.

కాగా, ఆ సమయంలో అక్కడ ఉన్న కొందరు రైతులు సోమనాథ్‌ను అడ్డుకునేందుకు ప్రయత్నించారు. అయితే అతడు వారిపై రాళ్లు రువ్వడంతో పాటు అసభ్య పదజాలంతో దూషించాడు. ఆ రైతులు స్థానిక పోలీసులకు సమాచారం ఇచ్చారు. దీంతో వారు అక్కడకు చేరుకున్నారు. ఇద్దరు కుమారులను కాలువలోకి విసిరేసిన తండ్రి సోమనాథ్‌ను అరెస్ట్‌ చేశారు. గల్లంతైన ఇద్దరు పిల్లల కోసం ఈతగాళ్ల సహాయంతో సోమవారం రాత్రి నుంచి ఆ కాలువలో గాలింపు చర్యలు చేపట్టారు. అయితే ఇప్పటి వరకు వారి ఆచూకీ లభించలేదు.

 

Comments (0)

User