Imran Khan: ఇమ్రాన్ ఖాన్ కంటికి చికిత్స‌.. ఆస్ప‌త్రికి త‌ర‌లింపు

ఇస్లామాబాద్‌: పాకిస్థాన్ మాజీ ప్ర‌ధాని ఇమ్రాన్ ఖాన్‌(Imran Khan)ను కంటి చికిత్స కోసం ఆస్ప‌త్రికి తీసుకెళ్లారు. పాకిస్థాన్ తెహ్రీక్ ఇన్సాఫ్ పార్టీ వ్య‌వ‌స్థాప‌కుడైన ఇమ్రాన్ ఖాన్ 2023 నుంచి జైలులో ఉంటున్న విష‌యం తెలిసిందే. సుమారు 100కుపైగా కేసులు ఆయ‌న‌పై ఉన్నాయి. అవినీతి, హింస‌ను ప్రేరేపించిన కేసుల్లో ఇమ్రాన్ నిందితుడు. రావ‌ల్పిండిలోని అడియాలా జైలులో అత‌న్ని నిర్బంధించారు. అయితే జ‌న‌వ‌రి నుంచి ఇమ్రాన్ ఖాన్ త‌న కుడి క‌న్నుకు చికిత్స చేయించుకుంటున్నారు. చూపు మంద‌గించిన‌ట్లు ఫిర్యాదు చేయ‌డంతో చికిత్స ప్రారంభ‌మైంది. పాకిస్థాన్ ఇన్స్‌టిట్యూట్ ఆఫ్ మెడిక‌ల్ సైన్సెస్‌కు ఇమ్రాన్‌ను ప‌రీక్ష‌ల కోసం తీసుకెళ్తారు. ఇమ్రాన్ ఖాన్‌కు చికిత్స అందిస్తున్న కంటి డాక్ట‌ర్ సూచ‌న మేర‌కు అత‌నికి ప‌రీక్ష‌లు చేసిన‌ట్లు పీఐఎంఎస్ అధికారి పేర్కొన్నారు. చికిత్స స‌మ‌యంలో ఇమ్రాన్‌కు ఇంట్రావిట్రియ‌ల్ యాంటీ వీఈజీఎఫ్ ఇంజెక్ష‌న్ ఇచ్చారు. 2018లో ఇమ్రాన్ ప్ర‌ధాని అయ్యారు. అయితే 2022లో జ‌రిగిన అవిశ్వాస తీర్మానంలో ఆయ‌న ఓడారు.