Father Kills Son | తల్లిదండ్రుల మధ్య గొడవను ఆపేందుకు యత్నం.. కొడుకును కొట్టి చంపిన తండ్రి

16 November 2026 - 23:30
0 0
Father Kills Son | తల్లిదండ్రుల మధ్య గొడవను ఆపేందుకు యత్నం.. కొడుకును కొట్టి చంపిన తండ్రి
Father Kills Son In Karnata

బెంగళూరు: తల్లిదండ్రుల మధ్య గొడవను ఆపేందుకు కుమారుడు ప్రయత్నించాడు. ఈ నేపథ్యంలో అతడ్ని గదిలో బంధించి, ఇనుప వస్తువుతో కొట్టి తండ్రి హత్య చేశాడు. అక్కడకు చేరుకున్న పోలీసులు ఆ వ్యక్తిని అరెస్ట్‌ చేశారు. ఈ సందర్భంగా స్థానికులు అతడిపై దాడి చేశారు. (Father Kills Son) కర్ణాటకలోని తుమకూరు జిల్లాలో ఈ సంఘటన జరిగింది. చౌడనాయకనపాళ్య గ్రామంలో నివసించే నంజే గౌడకు మద్యం సేవించే అలవాటు ఉన్నది. తాగి ఇంటికి వచ్చిన తర్వాత అతడు తరచుగా భార్యతో గొడవ పడేవాడు.

కాగా, ఆదివారం కూడా మద్యం సేవించి ఇంటికి వచ్చిన నంజే గౌడ తన భర్యతో గొడవపడ్డాడు. అయితే తల్లిదండ్రుల మధ్య గొడవను ఆపేందుకు వారి కుమారుడైన 16 ఏళ్ల సునీల్‌ జోక్యం చేసుకున్నాడు. దీంతో ఆగ్రహించిన నంజే గౌడ, తన భార్యను ఇంటి బయటకు పంపాడు. కుమారుడిని లోపల ఉంచి తలుపులు మూశాడు. ఇనుప పరికరంతో అతడ్ని కొట్టి చంపాడు.

మరోవైపు ఈ సమాచారం తెలుసుకున్న పోలీసులు సంఘటనా స్థలానికి చేరుకున్నారు. కుమారుడిని చంపిన తండ్రి నంజే గౌడ్‌ను అరెస్ట్‌ చేశారు. ఈ విషయం తెలిసి ఆగ్రహించిన స్థానికులు, పోలీసులు తీసుకెళ్తున్న సమయంలో అతడిపై దాడి చేశారు. సునీల్‌ మృతదేహాన్ని పోస్ట్‌మార్టం కోసం పోలీసులు తరలించారు. నిందితుడైన అతడి తండ్రిని జ్యుడీషియల్ కస్టడీకి తరలించారు. అతడిపై పలు సెక్షన్ల కింద కేసు నమోదు చేసి దర్యాప్తు చేస్తున్నట్లు పోలీస్‌ అధికారి తెలిపారు.

Comments (0)

User