Cyclone Akvan | ఏపీకి మ‌రో తుపాను గండం.. తీరంవైపు క‌దులుతున్న‌ వాయుగుండం..!

Cyclone Akvan : ఆంధ్ర‌ప్ర‌దేశ్ రాష్ట్రానికి మ‌రో తుపాను గండం పొంచి ఉన్న‌ది. బంగాళాఖాతంలో ఏర్పడిన వాయుగుండం క్రమంగా బలపడుతూ తీరంవైపు దూసుకొస్తున్న‌ది. రెండు రోజులుగా ఆగ్నేయ బంగాళాఖాతంలో కొనసాగిన తీవ్ర అల్పపీడనం వాయుగుండంగా మారి ప్రస్తుతం ఆగ్నేయ, ఆ ప‌క్క‌నే నైరుతి బంగాళాఖాతం ప్రాంతంలో కేంద్రీకృతమై ఉన్న‌ది. ఈ వాయుగుండం ఉత్తర-వాయవ్య దిశగా కదులుతూ మరింత బలపడనుందని భారత వాతావరణ కేంద్రం తెలిపింది.

ఐఎండీ వెల్ల‌డించిన వివ‌రాల ప్ర‌కారం.. ఈ వాయుగుండం రేప‌టికి (నవంబర్ 16 నాటికి) తుపానుగా మారనుంది. ఆ తర్వాత నవంబర్ 17 నాటికి పశ్చిమ మధ్య బంగాళాఖాతంలో తీవ్ర తుపానుగా బలప‌డుతుంది. ఆ త‌ర్వాత‌ మరింత తీవ్రరూపం దాల్చి రాగల రెండు రోజుల్లో వాయవ్య దిశగా కదులుతూ ఆంధ్రప్రదేశ్ తీరం వైపు దూసుకురానుంది. ఇది తుపానుగా మారితే దీనిని ‘అక్వాన్’ తుపానుగా పిలువనున్నారు. ఈ తుపాను ప్రభావంతో నవంబర్ 19, 20 తేదీల్లో కోస్తాంధ్ర, యానాంలలోని ప‌లు ప్రాంతాల్లో భారీ నుంచి అతి భారీ వర్షాలు కుర‌వ‌నున్నాయి.

కొన్నిచోట్ల అత్యంత భారీ వర్షాలు కురిసే అవకాశం ఉన్న‌ది. నవంబర్ 18 నుంచే కోస్తాంధ్రలో అక్కడక్కడ భారీ వర్షాలు ప్రారంభం కానున్నాయి. రాయలసీమలో నవంబర్ 19, 20 తేదీల్లో భారీ వర్షాలు కురిసే సూచనలు ఉన్నాయి. తెలంగాణలోనూ నవంబర్ 20న పలుచోట్ల భారీ వర్షాలు కురిసే అవకాశం ఉందని అధికారులు తెలిపారు. పొరుగు రాష్ట్రాలైన తమిళనాడులో నవంబర్ 18, 19 తేదీల్లో భారీ నుంచి అతిభారీ వర్షాలు, ఒడిశాలో నవంబర్ 19 నుంచి 21 వరకు భారీ వర్షాలు ప‌డే ఛాన్స్ ఉంది.