Nitin Gadkari | అవ‌న్నీ త‌ప్పుడు క‌థ‌నాలు, నేను ప‌నిచేస్తూనే ఉంటా.. రిటైర్‌మెంట్ వార్త‌ల‌పై నితిన్ గ‌డ్క‌రీ..!

Nitin Gadkari : కేంద్ర మంత్రి (Union Minister) నితిన్ గ‌డ్క‌రీ (Nitin Gadkari) రాజ‌కీయాల నుంచి త‌ప్పుకుంటున్నారంటూ వ‌స్తున్న వార్త‌ల‌ను ఆయ‌న తీవ్రంగా ఖండించారు. అవన్నీ తప్పుడు కథనాలని, ఆ క‌థ‌నాల్లో ఎలాంటి నిజం లేదని అన్నారు. తన వ్యాఖ్యలను మీడియా వర్గాలు తప్పుగా అర్థం చేసుకున్నాయని పేర్కొన్నారు. ‘నేను త‌ర‌చూ యువతను ముందుకు తీసుకురావలని అంటుంటాను. దాని అర్థం నేను పదవి నుంచి, రాజకీయాల నుంచి తప్పుకుంటాన‌ని కాదు. ముందు తరాల వారు మ‌న‌కు బాధ్యతలు ఎలాగైతే అప్పజెప్పారో.. అదేవిధంగా మనం కూడా మన తర్వాత తరాల వారికి బాధ్యతలు అందిద్దాం అనేది నా ఉద్దేశం’ అని గ‌డ్క‌రీ స్ప‌ష్టంచేశారు.

ప్రస్తుతం ఉన్న జర్నలిస్టుల స్థానంలో ఇంతకుముందు వేరే వాళ్లు ఉండేవారని, ఇప్పుడు మీరు విలేకరులుగా చేస్తున్నారని గ‌డ్క‌రీ మీడియా ప్ర‌తినిధుల‌ను ఉద్దేశించి అన్నారు. మీలాగే నేను కూడా ప్రభుత్వం తరఫున పని చేస్తూనే ఉంటాన‌ని, గతంలో నేను చేసిన వ్యాఖ్యలకు రాజకీయాలతో ఎలాంటి సంబంధం లేదని చెప్పారు. అప్పుడు మాట్లాడింది నాగ్‌పుర్‌లో తాను ఏర్పాటుచేసిన లక్ష్మణ్‌రావ్‌ మన్కర్‌ ట్రస్ట్ గురించని తెలిపారు. ఆ ట్ర‌స్టు కింద ఆదివాసీ ప్రాంతాల్లో విద్యాసంస్థలు నడుస్తున్నాయని అన్నారు.

ట్ర‌స్టు విషయంలో మునుపటిలా బాధ్యతలు నిర్వహించలేనని, అందుకే యువతరానికి అవకాశం ఇవ్వాలని ట్ర‌స్టు సభ్యులకు సూచించానని గ‌డ్క‌రీ చెప్పారు. కానీ మీడియా ఛానళ్లు ఆ వ్యాఖ్యలను రాజకీయాలతో ముడిపెట్టాయని అన్నారు.