Cyberabad Events | దావత్లపై ఆంక్షలు..! సైబరాబాద్లో పార్టీలు, ఫంక్షన్లకు చెక్!

- సైబరాబాద్లో పార్టీలు, ఫంక్షన్లకు చెక్!
- 100 మంది దాటితే ఆన్లైన్లో సమాచారం ఇవ్వాల్సిందే
- మూడు రోజుల ముందే సీపీసీబీ పోర్టల్లో నమోదుచేయాలి
- తడి, పొడి చెత్త వేరుచేసి మార్గదర్శకాలు పాటించాలని ఆదేశం
హైదరాబాద్ సిటీబ్యూరో, నవంబర్ 18 (నమస్తే తెలంగాణ): కాలుష్య నివారణ పేరిట దావత్లపై కొరడా ఝుళిపించేందుకు సైబరాబాద్ బల్దియా కమిషనర్ సిద్ధమయ్యారు. సైబరాబాద్ మున్సిపల్ కార్పొరేషన్ (సీఎంసీ) పరిధిలో భారీగా జరిగే వేడుకలు, బహిరంగ సభలు, సమావేశాలు, ఫంక్షన్ల నిర్వహణపై కమిషనర్ సృజన కీలక నిర్ణయం తీసుకున్నారు. వేడుకల పేరుతో ఎకడపడితే అకడ చెత్త వేసి చేతులు దులుపుకొనే నిర్వాహకుల తీరుకు అడ్డుకట్ట వేస్తూ కీలక మార్గదర్శకాలు జారీచేశారు. ఇకపై 100 మందికి పైగా పాల్గొనే ఎలాంటి కార్యక్రమం నిర్వహించాలన్నా.. కనీసం మూడు పని దినాల ముందే కేంద్ర కాలుష్య నియంత్రణ మండలి (సీపీసీబీ) పోర్టల్ ద్వారా స్థానిక సంస్థకు సమాచారం ఇవ్వాలని పేర్కొన్నారు. సాలిడ్ వేస్ట్ మేనేజ్మెంట్ (ఘన వ్యర్థాల నిర్వహణ) నిబంధనల్లోని రూల్ 5(1)(జే) ప్రకారం ఈ ఆదేశాలను పకాగా అమలు చేయాలని సీఎంసీ పరిధిలోని డిప్యూటీ కమిషనర్లను ఆదేశించారు. ముఖ్యంగా అనుమతులు లేని బహిరంగ ప్రదేశాల్లో జరిగే సమావేశాలు, ఈవెంట్లపై ప్రత్యేక దృష్టి సారించాలని పేర్కొన్నారు.
నిర్వాహకులు పాటించాల్సిన నాలుగు ప్రధాన సూత్రాలు
- ఏదైనా కార్యక్రమం జరగడానికి మూడు పని దినాల ముందే సీపీసీబీ ఈవెంట్ ఇంటిమేషన్ పోర్టల్లో పూర్తి వివరాలను నమోదు చేయాలి
- వేడుక జరిగే ప్రాంగణంలోనే తడి, పొడి చెత్తను నిర్దేశించిన మార్గదర్శకాల ప్రకారం తప్పనిసరిగా వేరు చేయాలి
- వేరు చేసిన వ్యర్థాలను కార్పొరేషన్ గుర్తించిన అధీకృత వ్యర్థాల సేకరణదారులు లేదా ఏజెన్సీలకు మాత్రమే అందించాలి.
- చెత్త సేకరణ, రవాణాతో పాటు శాస్త్రీయ పద్ధతిలో పారవేసే బాధ్యత పూర్తిగా నిర్వాహకులదే.
ఈ నిబంధనలపై తమ పరిధిలోని ఫంక్షన్ హాళ్ల యాజమాన్యాలు, ఈవెంట్ మేనేజ్మెంట్ సంస్థలు, నిర్వాహకులకు విస్తృతంగా అవగాహన కల్పించాలని డిప్యూటీ కమిషనర్లకు కమిషనర్ సూచించారు. పోర్టల్ వినియోగంపై అవగాహన కల్పించడంతోపాటు, శానిటేషన్ అధికారులు, క్షేత్రస్థాయి సిబ్బందితో సమన్వయం చేసుకుంటూ నిబంధనల అమలును నిరంతరం పర్యవేక్షించాలని స్పష్టంచేశారు. సీఎంసీ పరిధిలో పరిశుభ్రతను కాపాడేందుకు ఈ ఆదేశాలను కచ్చితంగా అమలు చేయాలని స్పష్టంచేశారు.
Comments (0)