Brahmotsavams | సమష్టి కృషితో బ్రహ్మోత్సవాలు విజయవంతం.. హుండీకి రూ.28.94 కోట్లు ఆదాయం : టీటీడీ చైర్మన్

తిరుమల : శ్రీవారి సాలకట్ల బ్రహ్మోత్సవాలు ( Brahmotsavams ) సమష్టి కృషితో విజయవంతమయ్యాయని టీటీడీ చైర్మన్ బీ.ఆర్. నాయుడు ( TTD Chairman BR Naidu ) తెలిపారు. బుధవారం సాయంత్రం తిరుమల అన్నమయ్య భవన్‌లో నిర్వహించిన మీడియా సమావేశంలో టీటీడీ ఈవో ముద్దాడ రవిచంద్రతో కలిసి సాలకట్ల బ్రహ్మోత్సవాల వివరాలను వెల్లడించారు.

సెప్టెంబరు 15 నుంచి 22వ తేదీ వరకు ఎనిమిది రోజుల పాటు జరిగిన బ్రహ్మోత్సవాల్లో ప్రపంచం నలుమూలల నుంచి తరలివచ్చిన భక్తులకు వాహనసేవలతో పాటు శ్రీవారి మూలమూర్తి దర్శనం కల్పించినట్లు తెలిపారు. ఎనిమిది రోజుల బ్రహ్మోత్సవాల్లో మొత్తం 5.76 లక్షల మంది భక్తులు శ్రీవారిని దర్శించుకోగా హుండీకి రూ.28.94 కోట్ల ఆదాయం వచ్చిందన్నారు.

21.84 లక్షల మందికి అన్నప్రసాదాలు పంపిణీ చేశామని వివరించారు. 2.04 లక్షల మంది భక్తులు తలనీలాలు సమర్పించుకోగా 33 లక్షల లడ్డూలు విక్రయించామని చెప్పారు. తిరుమల, తిరుపతి ప్రాంతాల్లో పచ్చదనాన్ని మరింత పెంపొందించేందుకు వృక్ష గోవిందం కార్యక్రమాన్ని చేపట్టనున్నట్లు తెలిపారు. శ్రీవారి సేవ, శ్రీవారి వైద్యసేవలను మరింత బలోపేతం చేసేందుకు ప్రత్యేక ప్రణాళికలు రూపొందిస్తున్నట్లు చెప్పారు. టీటీడీ ఉద్యోగుల హౌసింగ్ కాలనీలో మౌలిక వసతుల కల్పనకు రూ.230 కోట్లు కేటాయించనున్నట్లు తెలిపారు.