‘రైతాంగ సమస్యలపై దేశవ్యాప్త పోరాటాలు’

– ఢిల్లీలో సీఐటీయూ మహాధర్నాకు ఏఐకేఎస్ సంపూర్ణ మద్దతు
– రైతులకు ఇచ్చిన హామీలను కాంగ్రెస్ సర్కార్ నెరవేర్చాలి
– ఎంఎస్ స్వామినాథన్ సిఫారసులు అమలు చేయాలి
– ఏఐకేఎస్ జాతీయ ప్రధాన కార్యదర్శి డాక్టర్ విజూ కృష్ణన్
రామగిరి, నవంబర్ 17 : దేశ వ్యాప్తంగా రైతాంగం, వ్యవసాయ కార్మికులు, కార్మికవర్గం ఎదుర్కొంటున్న సమస్యల పరిష్కారం కోసం ఐక్య ఉద్యమాలను మరింత ఉధృతం చేయనున్నట్లు అఖిల భారత కిసాన్ సభ (ఏఐకేఎస్) జాతీయ ప్రధాన కార్యదర్శి డాక్టర్ విజూ కృష్ణన్ తెలిపారు. కేంద్రంలోని మోదీ ప్రభుత్వం అనుసరిస్తున్న రైతాంగ, వ్యవసాయ వ్యతిరేక విధానాలను నిరసిస్తూ దేశవ్యాప్తంగా పెద్ద ఎత్తున పోరాటాలకు కార్యాచరణ రూపొందిస్తున్నట్లు చెప్పారు. సీఐటీయూ ఆధ్వర్యంలో 2026 డిసెంబర్ 1 నుండి 3వ తేదీ వరకు దేశ రాజధాని ఢిల్లీలో నిర్వహించనున్న మహాధర్నాకు ఏఐకేఎస్ సంపూర్ణ మద్దతు ప్రకటిస్తోందని వెల్లడించారు. కార్మిక, కర్షక వర్గాలు ఐక్యంగా పోరాడితేనే ప్రజా సమస్యల పరిష్కారం సాధ్యమవుతుందని ఆయన పేర్కొన్నారు. అదేవిధంగా ఈ నెల 26, 27 తేదీల్లో సంయుక్త కిసాన్ మోర్చా ఆధ్వర్యంలో రైతాంగ సమస్యల పరిష్కారం కోసం పోరాటాలు నిర్వహించనున్నట్లు తెలిపారు. కనీస మద్దతు ధరకు చట్టబద్ధమైన హామీ, ఉపాధి హామీ పథకం పరిరక్షణ, రైతులకు న్యాయమైన ధరలు, వ్యవసాయ కార్మికుల సమస్యల పరిష్కారం ప్రధాన డిమాండ్లుగా ఉద్యమాలు కొనసాగిస్తామన్నారు.
కార్పొరేట్ అనుకూల విధానాలతో రైతులకు నష్టం
కేంద్ర ప్రభుత్వం అదానీ, అంబానీ వంటి బడా కార్పొరేట్ సంస్థలకు అనుకూలంగా విధానాలు రూపొందిస్తూ సామాన్య ప్రజలు, రైతాంగం ఎదుర్కొంటున్న సమస్యలను నిర్లక్ష్యం చేస్తోందని విజూ కృష్ణన్ విమర్శించారు. ఆర్థిక సరళీకరణ విధానాల ప్రభావంతో వ్యవసాయ రంగం తీవ్ర సంక్షోభంలోకి నెట్టబడుతోందన్నారు. ఎరువులు, విత్తనాల ధరలు విపరీతంగా పెరగడంతో పేద, చిన్న, సన్నకారు రైతులు వ్యవసాయం కొనసాగించలేని పరిస్థితులు ఏర్పడుతున్నాయని ఆవేదన వ్యక్తం చేశారు. వ్యవసాయ రంగంలో ఎంఎస్ స్వామినాథన్ కమిషన్ సిఫారసులను అమలు చేయాలని, రైతులు పండించిన పంటలకు ఉత్పత్తి వ్యయంపై 50 శాతం అదనంగా కనీస మద్దతు ధర కల్పించాలని డిమాండ్ చేశారు. మద్దతు ధరకు చట్టబద్ధమైన హామీ ఇవ్వడంతో పాటు గరిష్ట భూమి పరిమితి చట్టాన్ని సమర్థవంతంగా అమలు చేయాలని కోరారు. అమెరికా వంటి దేశాల్లో పెద్ద విస్తీర్ణంలో వ్యవసాయం చేసే రైతులకు సైతం ప్రభుత్వాలు సబ్సిడీలు అందిస్తున్నాయని, భారతదేశంలో మాత్రం రైతులకు అవసరమైన మద్దతు అందడం లేదన్నారు. విదేశాల నుండి వ్యవసాయ ఉత్పత్తులు, పండ్లు, నిత్యావసర సరుకుల దిగుమతులు పెరిగితే దేశీయ రైతాంగం మరింత నష్టపోయే ప్రమాదం ఉందని ఆందోళన వ్యక్తం చేశారు.
రైతు ఆత్మహత్యలు కాదు.. ఐక్య పోరాటాలే పరిష్కారం
వ్యవసాయ రంగాన్ని సంక్షోభంలోకి నెట్టే విధానాలు, రైతులకు ఎదురవుతున్న ఆర్థిక ఇబ్బందుల కారణంగా దేశవ్యాప్తంగా ఇప్పటివరకు ఐదు లక్షలకు పైగా రైతులు, వ్యవసాయ కార్మికులు, వలస కార్మికులు ఆత్మహత్యలకు పాల్పడ్డారని ఆయన పేర్కొన్నారు. రైతులు ఆత్మహత్యలకు బదులుగా ఐక్యంగా ఉద్యమించి తమ హక్కులను సాధించుకోవాలన్న నినాదంతో ఏఐకేఎస్ దేశ వ్యాప్తంగా పోరాటాలు నిర్వహిస్తోందన్నారు. మహారాష్ట్రలో నిర్వహించిన ఉద్యమాల ద్వారా పలు సమస్యల పరిష్కారానికి కృషి చేసిన విషయాన్ని ఈ సందర్భంగా గుర్తు చేశారు.
కరువు మండుతున్నా ప్రభుత్వాల నుండి సహాయం లేదు
ఎల్నినో ప్రభావంతో దేశ వ్యాప్తంగా 345 జిల్లాల్లో కరువు పరిస్థితులు నెలకొన్నాయని, తెలంగాణలోని 33 జిల్లాల్లో 365 మండలాలు కరువు పరిస్థితులను ఎదుర్కొంటున్నాయని నివేదికలు వెల్లడించినట్లు విజూ కృష్ణన్ తెలిపారు. ఇలాంటి క్లిష్ట పరిస్థితుల్లో రైతాంగానికి అండగా నిలవాల్సిన కేంద్ర, రాష్ట్ర ప్రభుత్వాలు తగిన సహాయం అందించడం లేదని విమర్శించారు. తెలంగాణలో ముఖ్యమంత్రి రేవంత్ రెడ్డి ప్రభుత్వం సైతం రైతులకు అవసరమైన సహాయ సహకారాలు అందించడంలో విఫలమైందని ఆరోపించారు. రైతుల సమస్యల పరిష్కారం కోసం ఏఐకేఎస్ నిరంతరం సంఘటిత పోరాటాలు నిర్వహిస్తోందన్నారు.
తెలంగాణ రైతులకు కాంగ్రెస్ ఇచ్చిన హామీలు అమలు చేయాలి
తెలంగాణలో గత ఎన్నికల సమయంలో కాంగ్రెస్ ప్రభుత్వం, ముఖ్యమంత్రి రేవంత్ రెడ్డి రైతాంగానికి, వ్యవసాయ రంగానికి ఇచ్చిన హామీలను అమలు చేయడంలో విఫలమయ్యారని విజూ కృష్ణన్ అన్నారు. రైతులకు ఇచ్చిన హామీలను రాబోయే రెండు నెలల్లో పరిష్కరించాలని ఇప్పటికే ప్రభుత్వాన్ని హెచ్చరించినట్లు తెలిపారు. నిర్ణీత గడువులోగా సమస్యలు పరిష్కరించకపోతే సూర్యాపేట జిల్లా కేంద్రం నుంచి హైదరాబాద్ వరకు లక్ష మంది రైతులతో భారీ మహాప్రదర్శన నిర్వహిస్తామని స్పష్టం చేశారు. తెలంగాణలో రైతాంగ సమస్యలపై ఏఐకేఎస్ ప్రత్యేక దృష్టి సారిస్తోందని, రాష్ట్రవ్యాప్తంగా రైతులను సంఘటితం చేసి హక్కుల సాధన కోసం ఉద్యమాలను బలోపేతం చేస్తామని పేర్కొన్నారు.
ఎఫ్సీఐ ప్రైవేటీకరణ ప్రయత్నాలను వ్యతిరేకిస్తాం
కేంద్ర ప్రభుత్వం ఆహార భద్రతకు కీలకమైన భారత ఆహార సంస్థ (ఎఫ్సీఐ) వంటి సంస్థలను ప్రైవేటీకరణ దిశగా తీసుకెళ్లేందుకు ప్రయత్నిస్తోందని విజూ కృష్ణన్ ఆరోపించారు. శాంతకుమారి కమిషన్ నివేదిక నేపథ్యంలో ఎఫ్సీఐ వంటి సంస్థల భవిష్యత్పై ఆందోళనలు వ్యక్తమవుతున్నాయని తెలిపారు. ప్రభుత్వ రంగ సంస్థలను పరిరక్షించడంతో పాటు రైతాంగ ప్రయోజనాలను కాపాడాల్సిన అవసరం ఉందన్నారు.
రాష్ట్రాల వారీగా తీర్మానాలు.. దేశవ్యాప్త ఉద్యమ కార్యాచరణ
దేశవ్యాప్తంగా వివిధ రాష్ట్రాల్లో రైతులు ఎదుర్కొంటున్న సమస్యలపై ఏఐకేఎస్ ప్రత్యేకంగా చర్చలు జరుపుతోందని తెలిపారు. ఇప్పటికే పది రాష్ట్రాల్లో రైతాంగ సమస్యలపై సమీక్షించి తీర్మానాలు చేసినట్లు వెల్లడించారు. తెలంగాణతో పాటు మిగిలిన రాష్ట్రాల సమస్యలపై కూడా మహాసభలో చర్చించి తీర్మానాలు చేయనున్నట్లు వెల్లడించారు. రైతులు, వ్యవసాయ కార్మికులు, కార్మికులు, సామాన్య ప్రజల సమస్యల పరిష్కారం కోసం ఏఐకేఎస్ నిరంతరం ప్రజల పక్షాన నిలిచి పోరాటాలు కొనసాగిస్తుందని విజూ కృష్ణన్ స్పష్టం చేశారు. కేంద్ర, రాష్ట్ర ప్రభుత్వాలు అనుసరిస్తున్న విధానాలపై ప్రజలను చైతన్యపరుస్తూ భవిష్యత్లో మరిన్ని బలమైన ఐక్య ఉద్యమాలు నిర్వహించి హక్కుల సాధనకు కృషి చేస్తామని తెలిపారు. ఈ సమావేశంలో తెలంగాణ రైతు సంఘం రాష్ట్ర అధ్యక్షుడు పోతినేని సుదర్శన్ రావు, రాష్ట్ర ప్రధాన కార్యదర్శి తీగల సాగర్, నల్లగొండ జిల్లా రైతు సంఘం అధ్యక్షుడు ముదిరెడ్డి సుధాకర్ రెడ్డి, జిల్లా ప్రధాన కార్యదర్శి వెంకటేశ్వర్లు, రాష్ట్ర మహిళా రైతు సంఘం కన్వీనర్ కందాల ప్రమీల పాల్గొన్నారు.
Comments (0)