‘యూత్ డిక్లరేషన్ పేరుతో యువతను మోసం చేసిన కాంగ్రెస్ ప్రభుత్వం’

17 November 2026 - 17:30
0 0
‘యూత్ డిక్లరేషన్ పేరుతో యువతను మోసం చేసిన కాంగ్రెస్ ప్రభుత్వం’
'యూత్ డిక్లరేషన్ పేరుతో యువతను మోసం చేసిన కాంగ్రెస్ ప్రభుత్వం'

– రెండేళ్లలోనే రెండు లక్షల ఉద్యోగాల హామీ ఏమైంది?
– జాబ్ క్యాలెండర్ ఎక్కడ?
– రెండు లక్షల ఉద్యోగాలు ఇస్తారా? రెండు ఎమ్మెల్సీలు ఓడగొట్టాలా?
– బీఆర్ఎస్ ఎమ్మెల్సీ అభ్య‌ర్థి ఏనుగుల రాకేశ్‌రెడ్డి

భద్రాద్రి కొత్తగూడెం, నవంబర్ 17 : యూత్ డిక్లరేషన్ పేరుతో యువతను మోసం చేసిన కాంగ్రెస్ ప్రభుత్వానికి తగిన బుద్ది చెప్పాలని బీఆర్ఎస్ రాష్ట్ర నాయకుడు రాకేష్ రెడ్డి పిలుపునిచ్చారు. భద్రాద్రి కొత్తగూడెం జిల్లా పర్యటనలో భాగంగా ఆయన అడిషనల్ కలెక్టర్ ద్వారా జిల్లా కలెక్టర్‌కు తెలంగాణ నిరుద్యోగ యువత, విద్యార్థుల సమస్యలపై వినతిపత్రం అందజేశారు. ఈ సందర్భంగా మీడియాతో మాట్లాడారు. ఎన్నికల ముందు యువతే లక్ష్యంగా యూత్ డిక్లరేషన్ ప్రకటించిన కాంగ్రెస్ పార్టీ, అధికారంలోకి వచ్చిన తర్వాత అదే యువతను విస్మరించడం దురదృష్టకరం అన్నారు. రెండు లక్షల ప్రభుత్వ ఉద్యోగాలు, ప్రతి సంవత్సరం జాబ్ క్యాలెండర్, నెలకు రూ.4,000 నిరుద్యోగ భృతి అంటూ హామీలు ఇచ్చి యువత ఓట్లను కోరిన కాంగ్రెస్ పార్టీ, అధికారంలోకి వచ్చాక ఆ హామీల అమలుపై స్పష్టమైన కార్యాచరణ చూపడం లేదని విమర్శించారు. ఎన్నికల సమయంలో గ్యారంటీ కార్డులు ఇచ్చి యువత భవిష్యత్‌పై ఆశలు కల్పించిన కాంగ్రెస్ ప్రభుత్వం, ఇప్పుడు ఆ హామీల అమలు గురించి ప్రశ్నిస్తే సమాధానం చెప్పాల్సిన బాధ్యత నుండి తప్పించుకోలేదన్నారు. రెండు లక్షల ఉద్యోగాలు ఇస్తామని చెప్పిన ప్రభుత్వం.. నిరుద్యోగులకు జాబ్ క్యాలెండర్ ఇవ్వలేని పరిస్థితిలో ఎందుకు ఉందని, ప్రతి సంవత్సరం ఉద్యోగాల నోటిఫికేషన్లు విడుదల చేస్తామని చెప్పిన హామీ ఏమైందని ఆయ‌న ప్రశ్నించారు.

రాష్ట్రంలో లక్షలాది మంది నిరుద్యోగులు సంవత్సరాల తరబడి పోటీ పరీక్షలకు సిద్ధమవుతున్నారని, తల్లిదండ్రులు అప్పులు చేసి పిల్లలకు కోచింగ్ ఇప్పిస్తున్నారని, కానీ ఉద్యోగాలపై స్పష్టత లేక యువత భవిష్యత్ అయోమయంలో పడిందని ఆవేదన వ్యక్తం చేశారు. ఒకవైపు నిరుద్యోగుల వయో పరిమితి దాటిపోతుంటే, మరోవైపు ప్రభుత్వ హామీలు మాత్రం కాగితాలకే పరిమితమవుతున్నాయని విమర్శించారు. నిరుద్యోగ యువతకు ఉద్యోగాలు కల్పించడం ప్రభుత్వ దయాదాక్షిణ్యం కాదని, ఎన్నికల సమయంలో ఇచ్చిన హామీకి సంబంధించిన బాధ్యత అని స్పష్టం చేశారు. గత బీఆర్ఎస్ ప్రభుత్వ హయాంలో తెలంగాణ రాష్ట్రం ఏర్పడిన తర్వాత ప్రభుత్వ ఉద్యోగ నియామకాల ప్రక్రియకు ప్రాధాన్యత ఇచ్చి లక్షలాది ఉద్యోగాల భర్తీకి చర్యలు చేపట్టిన విషయాన్ని గుర్తుచేశారు. ఉద్యోగ నియామకాలు, విద్యార్థుల సంక్షేమం, పోటీ పరీక్షలకు సిద్ధమయ్యే యువతకు మద్దతు వంటి అంశాల్లో ప్రభుత్వం తన పనితీరును ప్రజల ముందు ఉంచాలన్నారు.

'యూత్ డిక్లరేషన్ పేరుతో యువతను మోసం చేసిన కాంగ్రెస్ ప్రభుత్వం'

‘యూత్ డిక్లరేషన్ పేరుతో యువతను మోసం చేసిన కాంగ్రెస్ ప్రభుత్వం’

డిమాండ్లు

– కాంగ్రెస్ హామీ ఇచ్చిన రెండు లక్షల ప్రభుత్వ ఉద్యోగాలను భర్తీ చేయాలి
– ప్రతి సంవత్సరం ముందుగానే వార్షిక జాబ్ క్యాలెండర్ విడుదల చేయాలి
– అర్హులైన నిరుద్యోగ యువతకు నెలకు ₹4,000 నిరుద్యోగ భృతి అందించాలి
– TGPSCను ప్రక్షాళన చేసి పరీక్షల నిర్వహణలో పారదర్శకత తీసుకురావాలి
– ప్రతి జిల్లాలో స్కిల్ డెవలప్‌మెంట్ సెంటర్లు ఏర్పాటు చేయాలి
– ప్రైవేట్ రంగంలో తెలంగాణ యువతకు 75 శాతం ఉద్యోగ అవకాశాలు కల్పించేలా చట్టబద్ధమైన విధానం తీసుకురావాలి
– స్వయం ఉపాధి కోసం యువతకు రూ.10 లక్షల వరకు వడ్డీలేని రుణాలు అందించాలి
– పెండింగ్ ఫీజు రీయింబర్స్‌మెంట్ బకాయిలు విడుదల చేసి పూర్తి ఫీజు రీయింబర్స్‌మెంట్ అమలు చేయాలి
– ప్రతి కాలేజీ విద్యార్థినికి ఎలక్ట్రిక్ స్కూటర్ అందించే పథకాన్ని అమలు చేయాలి
– ప్రభుత్వ శాఖల్లో పెండింగ్‌లో ఉన్న బ్యాక్‌లాగ్ పోస్టులను భర్తీ చేయాలి
– ఎస్సీ, ఎస్టీ బ్యాక్‌లాగ్ పోస్టులకు ప్రత్యేక నియామక డ్రైవ్ చేపట్టాలి
– పోలీస్ ఉద్యోగాల దేహ దారుఢ్య పరీక్షల్లో లాంగ్ జంప్ అర్హత ప్రమాణాన్ని 3.6 మీటర్లకు తగ్గించాలి.

యువత భవిష్యత్‌తో రాజకీయాలు చేయొద్దు

యువత ఎన్నికల సమయంలో ఓట్లు వేసే యంత్రాలు కాదు.. తెలంగాణ భవిష్యత్‌ను నిర్మించే శక్తి. వారి జీవితాలతో, ఉద్యోగాల ఆశలతో రాజకీయాలు చేయడం మానుకోవాలి. యూత్ డిక్లరేషన్‌లో ఇచ్చిన హామీల అమలుపై ప్రభుత్వం శ్వేతపత్రం విడుదల చేయాలని, ప్రతి హామీకి సంబంధించిన ప్రస్తుత స్థితి, అమలు గడువును ప్రజలకు వెల్లడించాలని ఏనుగుల రాకేష్ రెడ్డి డిమాండ్ చేశారు. ప్రభుత్వం ఇచ్చిన హామీలను నెరవేర్చే వరకు నిరుద్యోగ యువత తరఫున ప్రశ్నిస్తూనే ఉంటామని, వారి హక్కుల కోసం ప్రజాస్వామ్యబద్ధంగా పోరాటం కొనసాగిస్తామని స్పష్టం చేశారు. ఎన్నికల ముందు యువతకు ఇచ్చిన హామీలకు ఇప్పుడు సమాధానం చెప్పాల్సిన సమయం వచ్చింది. మాటలు కాదు.. ఉద్యోగాలు కావాలి. హామీలు కాదు.. అమలు కావాలి అన్నారు. ఈ కార్యక్రమంలో రాష్ట్ర నాయకులు కిలారీ నాగేశ్వర్ రావు, బాలకృష్ణ, డిష్ నాయుడు, అనుదీప్, కార్పొరేటర్లు రాంబాబు, మల్లెల స్వప్న, మందు చందు, గుణ చరిత్, రాజశేఖర్, ముత్యాల ప్రవీణ్, దాసరి నాగేశ్వర రావు, కంచర్ల రామారావు, గణేష్, తెలంగాణ సురేష్, ఆనంద్, వీరన్న, దాబా శంకర్ పాల్గొన్నారు.

Comments (0)

User