యంగ్‌ టాలెంట్‌ వల్లే విజయాలు

18 November 2026 - 03:00
0 0
యంగ్‌ టాలెంట్‌ వల్లే విజయాలు
Itlu Arjunaa

‘నిజమైన సక్సెస్‌ అంటే ఏమిటో ఇక్కడి టీమ్‌ ఉత్సాహాన్ని చూస్తుంటే తెలుస్తున్నది. హీరో అనీశ్‌ చాలా అదృష్టవంతుడు. ఎందుకంటే ఓ డెబ్యూ హీరోకి ఇండస్ట్రీలోని పెద్ద హీరోలందరూ సపోర్ట్‌ చేయడం చాలా గొప్ప విషయం. మా మిత్రుడు, అనీశ్‌ తండ్రి అయిన మహేశ్‌ రెడ్డి మైనింగ్‌ బిజినెస్‌లో ఉన్నప్పటికీ ఆయనకు సినిమాలపై ఆసక్తి ఎక్కువ. నాగార్జునతో ‘షిరిడీ సాయి’ తీశారాయన. గొప్ప ఆధ్యాత్మిక భావాలున్న మహేశ్‌రెడ్డి అబ్బాయి హీరోగా నటించిన సినిమా కాబట్టి ఇండస్ట్రీలోని పెద్ద హీరోలందరూ మద్దతుగా నిలిచారు’ అన్నారు అగ్ర నటుడు చిరంజీవి. మంగళవారం జరిగిన ‘ఇట్లు అర్జున’ థాంక్స్‌మీట్‌కి చిరంజీవి, నాగార్జున ముఖ్య అతిథులుగా హాజరయ్యారు. అనీశ్‌, అనస్వర రాజన్‌ జంటగా నటించిన ఈ చిత్రానికి మహేశ్‌ దర్శకత్వం వహించారు. వెంకీ కుడుముల నిర్మాత. ఇటీవలే ప్రేక్షకుల ముందుకొచ్చింది. ఈ సందర్భంగా చిరంజీవి మాట్లాడుతూ ‘ గత రెండేళ్లుగా కొత్తదనం ఉన్న సినిమాలను తెలుగు ప్రేక్షకులు ఆదరిస్తున్నారు. యంగ్‌ టాలెంట్‌ వల్లే అది సాధ్యమవుతున్నది.

వాళ్లు పరిశ్రమకు కొత్త ఊపునిస్తున్నారు. మళ్లీ థియేటర్లకు ఆడియెన్స్‌ వస్తున్నారంటే అందుక్కారణం యంగ్‌ టాలెంట్‌. ఈ రోజు సినిమా చూశా. అనీశ్‌ మాట్లాడకుండానే తన హావభావాలతో ఆకట్టుకున్నారు. ఓ కొత్త నటుడు మూగవాడి పాత్రలో నటించడం చాలా కష్టం. ఇలాంటి ఛాలెంజింగ్‌ రోల్‌ని తొలి సినిమాకే చేయడం చాలా గ్రేట్‌. అనీశ్‌ ఇలాంటి విభిన్నమైన పాత్రలతో కెరీర్‌ను తీర్చిదిద్దుకోవాలని కోరుకుంటున్నా’ అన్నారు. ఈ సినిమాకు తాను ప్రజెంటర్‌గా వ్యవహరించానని, విజయం పట్ల చాలా ఆనందంగా ఉందని నాగార్జున పేర్కొన్నారు.

Comments (0)

User