పింఛన్ల పంపిణీలో కాంగ్రెస్ గూండాగిరీ!

- సిద్దిపేట జిల్లా చేర్యాలలో ఘటన
- ఉడుత ఊపులకు భయపడేదిలేదు
- ఎమ్మెల్యే పల్లా రాజేశ్వర్రెడ్డి
చేర్యాల, నవంబర్ 17 : అధికార కాంగ్రెస్ నాయకులు గూండాగిరీతో పెన్షన్ల పంపిణీ రసాభాసగా మారిన ఘటన సిద్దిపేట జిల్లా చేర్యాలలో మంగళవారం చోటుచేసుకున్నది. రేణుక గార్డెన్స్లో చేర్యాలటౌన్, చేర్యాల, కొమురవెల్లి, మద్దూరు, ధూళిమిట్ట మండలా ల లబ్ధిదారులకు చేయూత పెన్షన్లు అందించే కార్యక్రమాన్ని అధికారులు చేపట్టారు. పెన్షన్లు పంపిణీ చేసేందుకు ఎంపీ చామల కిరణ్కుమార్రెడ్డి, ఎమ్మెల్యే పల్లా రాజేశ్వర్రెడ్డి వస్తున్నట్టు తెలియడంతో ఇరుపార్టీల నాయకులు, కార్యకర్తలు తరలివచ్చారు. ఎమ్మెల్యే పల్లా వేదిక వద్దకు వచ్చి లబ్ధిదారులకు అభివాదం చేస్తున్న క్రమంలో చేర్యాల ఏఎంసీ చైర్మన్ కొమ్మూరి ప్రశాంత్రెడ్డి వేదికపైకి ఎక్కడంతో పాటు తనకు సంబంధించిన వారిని పైకి రా వాలని ఆహ్వానించారు.
దీంతో బీఆర్ఎస్ ప్రజాప్రతినిధులు ప్రొటోకాల్ లేని వ్యక్తులను స్టేజీ పైకి ఎందుకు పిలుస్తున్నారని, అసలు ఎమ్మెల్యే, ఎంపీ ఉన్న సమయంలో ఏఎంసీ చైర్మన్ పెన్షన్లు ఎలా పంపిణీ చేస్తారని ప్రశ్నించారు. ఎమ్మెల్యే పల్లా బీఆర్ఎస్ శ్రేణులను సముదాయిస్తున్న సమయంలో ఏఎంసీ చైర్మన్, తదితరులు వాగ్వాదానికి దిగారు. ఎంపీ చామల వేదిక వద్దకు చేరుకుని ఇరువర్గాలు శాంతియుతంగా ఉండాలని కోరినప్పటికీ కాంగ్రెస్ శ్రేణులు వినకపోగా గొడవ చేసేందుకు యత్నించడంతో పోలీసులు లాఠీలకు పనిచెప్పారు.
ఈ సందర్భంగా ఎమ్మెల్యే మాట్లాడుతుండగా అడ్డుకునేందుకు కాంగ్రెస్ శ్రేణులు యత్నించినా ఆయన బెదరకుండా మాట్లాడారు. 6 గ్యారంటీలు, 420 హామీలు ఎప్పుడు అమలు చేస్తారని ప్రశ్నించారు. ఎంపీ మాట్లాతుండగా కాంగ్రెస్ శ్రేణులు నినాదాలు కొనసాగిస్తుండటంతో ఆయన సైతం పెన్షన్లు ఇవ్వకుండా వెళ్లిపోయారు. అనంతరం పెన్షన్ల పంపిణీ కార్యక్రమాన్ని అధికారులు పూర్తి చేశారు.
Comments (0)