పాత పథకాలకే కొత్త రంగులు

15 November 2026 - 05:30
0 0
పాత పథకాలకే కొత్త రంగులు
Cm

కొండంత రాగం తీసి పిచ్చి పాట పాడినట్టుంది కాంగ్రెస్‌ నాయకుడు రాహుల్‌ గాంధీ హైదరాబాద్‌ పర్యటన. గిగ్‌ కార్మికులకు సీఎం రేవంత్‌రెడ్డి వరాలు ప్రకటించారని కాంగ్రెస్‌ మద్దతుదారులు అంటున్నారు. కానీ గిగ్‌ వర్కర్ల కోసం ’గిగ్‌ స్టాప్‌’ పేరిట విశ్రాంతి కేంద్రాలు నిర్మించింది అమెజాన్‌. రాష్ట్రంలోని పేదలందరికీ ఆరోగ్యశ్రీ వర్తిస్తుంది. ప్రమాద బీమా కూడా కొద్దిపాటి ప్రీమియంతో అందరికీ అందుబాటులో ఉండేదే. మరి వీటిలో ప్రభుత్వం ప్రత్యేకంగా ప్రారంభించిందేంటో! పాత పుస్తకానికి కొత్త కవర్‌ ఏసి అమ్మినట్టున్నదే తప్ప కొత్త వరం ఒక్కటీ లేదు! ప్రభుత్వం చెప్తున్న ప్రకటనలతో తమకు కొత్తగా ఒరిగిందేమిటి? అని గిగ్‌ కార్మికులే ప్రశ్నిస్తున్నరు. గిగ్‌ కార్మికుల సంపాదనలో ఒక శాతం కోతపెట్టి ప్రత్యేక నిధి ఏర్పాటు చేస్తారట.

అందులోంచే మళ్లీ వాళ్లకు సాయం చేస్తారట. అంటే కుడిచేత్తో తీసుకొని ఎడమచేత్తో ఇచ్చినట్టే కదా! ఎడమ చేత్తో ఇచ్చేది కూడా నమ్మకం లేనిదే. ఇప్పటికే కార్మిక సంక్షేమ నిధుల నిర్వహణపై ఎన్ని ఆరోపణలో.. ఎన్ని విమర్శలో! ఆ నిధుల వినియోగంపై పారదర్శకత ప్రశ్నార్థకమే. ఢిల్లీ నుంచి నాయకులు ఎగేసుకొని రావడం, ఇక్కడోళ్లు పోటీపడి పరుగులు పెట్టడం.. చివరికి పాత పథకాలకే కొత్త పేర్లు పెట్టడం ఎందుకో మరి! ప్రచారానికి పెట్టిన శ్రద్ధలో సగమైనా కార్మికుల సంక్షేమంపై పెడితే.. కొండను తవ్విన కష్టానికి కనీసం ఎలుకైనా దొరికేది!

Comments (0)

User