పగలు చదువు, రాత్రి కొలువు

ప్రభుత్వ ఖజానా ఖాళీ అయిందట, భూములన్నీ అయిపోయినయట… ఇక సంక్షేమానికి పైసా లేదని సీఎం రేవంత్‌రెడ్డి జాతీయ విద్యా ఉత్సవాల వేదికగా సెలవిచ్చిన మాటలు వింటే ముక్కున వేలేసుకోవాల్సిందే! ఎన్నికలప్పుడు హామీల గంగాళాలు చూయించినోళ్లు… ఇప్పుడు చిల్లులువడ్డ సంచులు చూపెడుతుండ్రు. ఇక ఓల్డ్‌ సిటీ పిల్లలకు సీఎం సలహా మరీ చిత్రంగా ఉన్నది. పొద్దంతా పుస్తకాలతో కుస్తీ పట్టాలె… రాత్రంతా మూసీ ఒడ్డున నైట్‌ ఎకానమీలో పనులు చేసుకోవాలట! అంటే పగలు చదువు…

రాత్రి కొలువు. మరి నిద్రపోవుడు ఎప్పుడు, ఆ పిల్లల ఆరోగ్యం సంగతి ఏంది? చదివి ఉద్యోగం సంపాదించాల్నా లేక పనిచేసుకుంటూ చదువును పక్కన పెట్టాల్నా? రెక్కాడితే గానీ డొక్కాడని పేద పిల్లల బతుకుల మీద ఇలాంటి ప్రయోగాలెందుకో అని అడుగుతుండ్రు ఓల్డ్‌ సిటీ ప్రజలు. ప్రజలకు సంక్షేమ పథకాలు ఇచ్చుటానికి పైసల్లేవ్‌, అభివృద్ధికి భూముల్లేవ్‌… కానీ ఉత్సవాలకు, ఆర్భాటాలకు నిధులు కుమ్మరిస్తున్నరు. వీళ్ల యవ్వారం చూస్తుంటే పేదోడి ఇంట్లో శివరాత్రి పండుగ… పెద్దోడి ఇంట్లో సంక్రాతి విందులు అనే సామెత గుర్తుకొస్తున్నది. ఓట్లు అడుక్కున్నప్పుడు భవిష్యత్తుకు భరోసా అని అంటారు, కానీ ఆ ఓట్లతో గద్దెనెక్కాక ఎవరి బతుకులు వాళ్ల ఇష్టం అంటే ఎట్లా?