ఏకగ్రీవ నిర్ణయాలపై రికార్డులు ఏవి?

18 November 2026 - 03:00
0 0
ఏకగ్రీవ నిర్ణయాలపై రికార్డులు ఏవి?
Cc Jj
  • నిరూపించడంలో ఈసీఐ విఫలం 
  • సుప్రీంకోర్టులో పిటిషనర్‌ వాదన

న్యూఢిల్లీ, నవంబర్‌ 17: ఓటర్ల జాబితాల ప్రత్యేక సమగ్ర సమీక్ష(సర్‌)కు సంబంధించిన నిర్ణయాలు సామూహికమని పదేపదే నొక్కి చెప్పినప్పటికీ ఆ నిర్ణయాలను ముగ్గురు సభ్యులు ఏకగ్రీవంగా తీసుకున్నారని నిరూపించే రికార్డులను సమర్పించడంలో భారత ఎన్నికల సంఘం(ఈసీఐ) విఫలమైందని ప్రధాన ఎన్నికల కమిషనర్‌ జ్ఞానేశ్‌ కుమార్‌ పనితీరును సుప్రీంకోర్టులో సవాలు చేసిన పిటిషనర్‌ వాదించారు. సర్‌కు సంబంధించిన నిర్ణయాలు ఏకగ్రీవంగా తీసుకున్నవని పేర్కొంటూ ఈసీఐ దాఖలు చేసిన కౌంటర్‌ అఫిడవిట్‌, అనుబంధ అఫిడవిట్‌ను పిటిషనర్‌ రాకేష్‌ కుమార్‌ సింగ్‌ వ్యతిరేకించారు. ఆయన తరఫున న్యాయవాది ముదిత్‌ గుప్తా ప్రతివాద అఫిడవిట్‌ దాఖలు చేశారు.ఈసీఐ, ఇతర ఎన్నికల కమిషనర్ల(నియామకం, సర్వీసు నిబంధనలు, పదవీకాలం) చట్టం, 2023లోని సెక్షన్‌ 18కి అనుగుణంగా తీసుకున్న నిర్ణయాలను, తదుపరి దిద్దుబాటు చర్యలు గతించిన కాలానికి వర్తించేలా ధ్రువీకరించలేవని వాదించారు.

ఎన్నికల సంఘం అంతర్గత సంస్థాగత రికార్డులను సమర్పించకుండానే ఏకాభిప్రాయం కుదిరిందనే వాదనలపై ఆధారపడటాన్ని పిటిషనర్‌ సవాలు చేశారు. వివాదాస్పద నిర్ణయాలకు సంబంధించిన అజెండాలు, సమావేశాల మినిట్స్‌, ఫైల్‌ నోటింగ్స్‌, సర్క్యులేషన్‌ షీట్లు, తీర్మానాలు, ఎలక్ట్రానిక్‌ ఆమోదాలు, కమ్యూనికేషన్లను సమర్పించాలని పిటిషనర్‌ కోరారు. 2023 చట్టంలోని సెక్షన్‌ 18 ప్రకారం నిర్ణయాలను స్వయంగా ఎన్నికల సంఘం తీసుకుందా, లేక అధికారులు, పరిపాలనా విభాగాలు తగిన అనుమతిని చూపకుండానే సొంతంగా వ్యవహరించాయా అనే విషయం ఎన్నికల సంఘం సమర్పించిన అఫిడవిట్లలో స్పష్టం కాలేదని పిటిషనర్‌ తన ప్రత్యుత్తరంలో పేర్కొన్నారు. సర్‌ ప్రక్రియలో భాగంగా ఆన్‌లైన్‌ ఫామ్‌ 6 దరఖాస్తులో చేర్చిన అదనపు డిక్లరేషన్‌కు సంబంధించి ఎన్నికల సంఘం సమర్పించిన వాదనను కూడా పిటిషనర్‌ సవాలు చేశారు.

1960 ఓటర్ల నమోదు నిబంధనల ప్రకారం సూచించిన ఫారమ్‌ 6కు సంబంధిత సవరణ చేయకుండానే దరఖాస్తుదారుడి తల్లిదండ్రులు లేదా తాతముత్తాలకు సంబంధించిన సమాచారంతో సహా చారిత్రక ఓటర్ల జాబితా మ్యాపింగ్‌ ఆవశ్యకతను ఈ డిక్లరేషన్‌ ప్రవేశపెట్టిందని పిటిషనర్‌ వాదించారు.రిట్‌ పిటిషన్‌ దాఖలు చేసిన తర్వాత ఎన్నికల సంఘం చేపట్టిన దిద్దుబాటు చర్యలు అసలు ఈ నిర్ణయాలు ఏ అధికారంతో తీసుకున్నారనే అంశంపై తాము చేసిన ఆరోపణలకు సమాధానం ఇవ్వడం లేదని ఆయన పేర్కొన్నారు. ఈఆర్‌వో ప్రకారం ఓటర్ల జాబితాలో చేర్చడానికి అర్హులైనప్పటికీ ఈసీఐనెట్‌ పోర్టల్‌ ద్వారా ఫామ్‌ 6 దరఖాస్తు ప్రక్రియను పూర్తి చేయలేని గోవాలోని 97 మంది ఓటర్ల కేసును కూడా పిటిషనర్‌ తన రిజాయిండర్‌లో ప్రస్తావించారు. ఈ ఓటర్ల పేర్లను చేర్చాలని పదేపదే విజ్ఞప్తులు వెళ్లినప్పటికీ వారిని ఓటర్ల జాబితాలో చేర్చడంలో ఎన్నికల సంఘం విఫలమైందని కూడా పిటిషనర్‌ ఆరోపించారు.

డిసెంబర్‌ 9న సర్‌పై విచారణ

ఓటరు జాబితాల ప్రత్యేక సమగ్ర సమీక్ష (సర్‌)లో భారీగా ఓటర్ల పేర్లు తొలగించారని, అక్రమాలు జరిగాయని కాంగ్రెస్‌ నేత రాహుల్‌ గాంధీతో పాటు ఇండియా కూటమి నేతలు దాఖలు చేసిన పిటిషన్లపై విచారణను సుప్రీంకోర్టు డిసెంబర్‌ 9కి వాయిదా వేసింది. ప్రధాన న్యాయమూర్తి సూర్యకాంత్‌, న్యాయమూర్తులు జస్టిస్‌ జోయ్‌మాల్య బాగ్చీ, జస్టిస్‌ మోహనలతో కూడిన ధర్మాసనం మంగళవారం ఈ పిటిషన్లను విచారించాల్సి ఉన్నది. అయితే, మధ్యాహ్న భోజన విరామం తర్వాత ఇప్పటికే పాక్షికంగా విచారణ జరిగిన మరో కేసును చేపట్టాలని నిర్ణయించడంతో విచారణను వాయిదా వేసింది. సర్‌పై ఎన్నికల కమిషన్‌ను విచారించేందుకు అనుమతించాలని కోరుతూ 48 ప్రశ్నలతో ఇండియా కూటమి నేతలు ఈ పిటిషన్‌ దాఖలు చేశారు. ‘ఎన్నికల కమిషన్‌ను కొన్ని ప్రశ్నలు అడిగేందుకు మేం అనుమతి కోరుతున్నాం.

ఈలోగా వారు వాటికి సమాధానం ఇవ్వవచ్చు’ అని పిటిషనర్‌ తరపు న్యాయవాది సిబల్‌ తెలిపారు. ‘ఒక తేదీ నిర్ణయిస్తాం. లిఖిత ప్రశ్నలకు సంబంధించిన మీ దరఖాస్తును కూడా విచారించి, తర్వాత నిర్ణయం తీసుకుంటాం’ అని ప్రధాన న్యాయమూర్తి తెలిపారు. ఉప ఎన్నికల కమిషనర్‌ భాను ప్రకాశ్‌ యేతురు, ప్రధాన ఎన్నికల కమిషనర్‌ జ్ఞానేశ్‌ కుమార్‌, ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి, ఎన్నికల కమిషన్‌ డైరెక్టర్‌ జనరల్‌ (ఐటీ) నుంచి ప్రమాణపూర్వక సమాధానాలు కోరాలని పిటిషనర్లు తమ దరఖాస్తులో న్యాయస్థానాన్ని అభ్యర్థించారు.

Comments (0)

User