విద్యుత్ ఉపకేంద్రం నిర్మాణానికి ఎమ్మెల్యే పాయం వెంక‌టేశ్వ‌ర్లు భూమి పూజ

బూర్గంపహాడ్, అక్టోబర్ 16 : బూర్గంపహాడ్ మండల పరిధిలోని ముసలిమడుగు గ్రామంలో రూ.2.50 కోట్లతో 33/11 కేవీ విద్యుత్ ఉప కేంద్రం (సబ్ స్టేషన్) నిర్మాణ పనులకు ఎమ్మెల్యే పాయం వెంకటేశ్వర్లు సర్పంచ్, ట్రాన్స్‌కో అధికారులతో కలిసి శుక్రవారం భూమి పూజ చేశారు. ఈ సందర్భంగా ఆయన మాట్లాడుతూ.. గ్రామీణ ప్రాంతాల్లో విద్యుత్ మౌలిక సదుపాయాలను బలోపేతం చేయడం, ప్రజలకు నాణ్యమైన విద్యుత్ సరఫరా అందించడం లక్ష్యంగా ఈ సబ్ స్టేష‌న్ నిర్మాణం చేస్తున్నట్లు తెలిపారు. ఈ విద్యుత్ ఉపకేంద్రం అందుబాటులోకి వస్తే ముసలిమడుగు పంచాయతీతో పాటు పరిసర ప్రాంత ప్రజలకు, రైతులకు విద్యుత్ సరఫరా మరింత మెరుగుపడుతుందన్నారు. ఈ కార్యక్రమంలో తాసీల్దార్ కేఆర్కే ప్రసాద్, సర్పంచ్ పూనెం సురేందర్, భద్రాచలం ట్రాన్స్‌కో డీఈ జీవన్ కుమార్, ఏడీఈ నర్సింహారావు, సారపాక ట్రాన్స్‌కో ఏఈ గుర్రం ఉపేందర్‌తో పాటు మాజీ సొసైటీ చైర్మన్ పోతిరెడ్డి వెంకటేశ్వరరెడ్డి, లక్ష్మీపురం మాజీ ఉప సర్పంచ్ పోతిరెడ్డి వెంకటేశ్వరరెడ్డి, పూలపెల్లి సుధాకర్‌రెడ్డి, మారం వెంకటేశ్వరరెడ్డి, వారాల వేణు, పలు పంచాయతీల సర్పంచులు, ప్రజా ప్రతినిధులు, నాయకులు పాల్గొన్నారు.