‘రజక సంక్షేమ భవన కమిటీలు రద్దు’

16 November 2026 - 23:30
0 0
‘రజక సంక్షేమ భవన కమిటీలు రద్దు’
'రజక సంక్షేమ భవన కమిటీలు రద్దు'

– ఎన్నికల నిర్వహణకు స్టీరింగ్ కమిటీ ఏర్పాటు
– కన్వీనర్‌గా రెడ్డిపల్లి సాగర్

నల్లగొండ రూరల్, నవంబర్ 16 : నల్లగొండ జిల్లా కేంద్రంలోని సాగర్‌ రోడ్డులో ఉన్న రజక సంక్షేమ భవనానికి సంబంధించి గతంలో కొనసాగుతున్న 19 మంది సభ్యుల పాత కమిటీతో పాటు, ఇటీవల ఏర్పాటు చేసిన 31 మంది సభ్యుల కొత్త కమిటీలను రద్దు చేసినట్లు ఎన్నికల స్టీరింగ్ కమిటీ కన్వీనర్ రెడ్డిపల్లి సాగర్ తెలిపారు. సోమవారం నల్లగొండలో విడుదల చేసిన ప్రకటనలో ఆయన ఈ విషయాన్ని వెల్లడించారు. రజక సంక్షేమ భవన కమిటీని ప్రజాస్వామ్యబద్ధంగా ఎన్నికల ద్వారా ఎన్నుకోవాలనే ఉద్దేశంతో కార్యవర్గ సమావేశం, సాధారణ సభకు హాజరైన మెజారిటీ సభ్యుల ఆమోదంతో రెండు కమిటీలను రద్దు చేసినట్లు పేర్కొన్నారు.

ఎన్నికల నిర్వహణకు అవసరమైన నిబంధనలు, సభ్యత్వ రుసుము, విధివిధానాలతో కూడిన చట్టబద్ధమైన నియమావళిని రూపొందించాలని సమావేశంలో నిర్ణయించినట్లు తెలిపారు. ఎన్నికల నిర్వహణ బాధ్యతలను స్టీరింగ్ కమిటీకి అప్పగించగా, కన్వీనర్‌గా రెడ్డిపల్లి సాగర్‌తోపాటు కొండూరు సత్యనారాయణ, చిక్కుళ్ల రాములు, దూదిగామ సత్తయ్య, ఆకునూరి లక్ష్మయ్య, చిలుకరాజు చెన్నయ్యలను ఎంపిక చేసినట్లు వెల్లడించారు. ఎన్నికలను సామరస్య పూర్వకంగా, నిబంధనలకు అనుగుణంగా నిర్వహించడంతోపాటు రజక సంక్షేమ భవనం అభివృద్ధికి కృషి చేస్తానని సాగర్ పేర్కొన్నారు.

ఈ కార్యక్రమంలో తెలంగాణ రజక సేవా సంఘం రాష్ట్ర అధ్యక్షుడు, బీఆర్‌ఎస్‌ నాయకుడు కొండూరు సత్యనారాయణ, ఎన్‌ఆర్‌ఐ బీసీ విభాగం జాతీయ అధ్యక్షుడు దూదిగామ కిరణ్‌కుమార్, రజక సంఘాల నాయకులు, కాంగ్రెస్‌ జిల్లా కార్యదర్శి నల్పరాజు శ్రీనివాస్, బీజేపీ పట్టణ నాయకుడు ఆకునూరి సత్యనారాయణ, సీపీఎం నాయకుడు చెరుకు పెద్దులు, చింతల వెంకన్న, దామెర వేణు, ఎలిజాల సత్తయ్య, చిక్కుళ్ల అంజయ్య, అక్కెనపల్లి లక్ష్మయ్య, దూదిగామ స్వామి, చిలుకరాజు సతీష్, నాగిళ్ల యాదయ్య, వట్టికోటి కాశయ్య, జంజీరాల శేఖర్, భీమనపల్లి శంకర్, ఐతరాజు లక్ష్మణ్, దామెర సైదులు, పగిళ్ల వెంకన్న పాల్గొన్నారు.

Comments (0)

User