తెలంగాణ ఆత్మగౌరవం ఢిల్లీకి తాకట్టు

16 November 2026 - 09:00
0 0
తెలంగాణ ఆత్మగౌరవం ఢిల్లీకి తాకట్టు
01
  • కాంగ్రెస్‌, బీజేపీ నేతల తీరు రాష్ట్రానికి అవమానం
  • గాంధీలకు బాడీగార్డులా సీఎం రేవంత్‌రెడ్డి
  • అమిత్‌షా చెప్పులు మోసిన బండి సంజయ్‌
  • ‘ఎక్స్‌’ వేదికగా కేటీఆర్‌ తీవ్ర విమర్శలు

హైదరాబాద్‌, నవంబర్‌ 15 (నమస్తే తెలంగాణ) : కాంగ్రెస్‌, బీజేపీ నేతలు తెలంగాణ ఆత్మగౌరవాన్ని ఢిల్లీ పెద్దలకు తాకట్టు పెడుతున్నారని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ విమర్శించారు. వారు వ్యవహరించిన తీరు రాష్ర్టానికి తీరని అవమానమని ఆదివారం ‘ఎక్స్‌’ వేదికగా వ్యాఖ్యానించారు. టీ కాంగ్రెస్‌, బీజేపీ నేతల్లో ఉన్నత పదవులకు ఉండాల్సిన హుందాతనం కరువైందని దుయ్యబట్టారు. గాంధీలకు బాడీగార్డులా సీఎం రేవంత్‌రెడ్డి వ్యవహరించడం, రాహుల్‌గాంధీ బైక్‌ వెంట మంత్రులు, పీసీసీ అధ్యక్షుడు పనివాళ్ల మాదిరిగా పరుగులు తీయడం అవమానకరమని మండిపడ్డారు. అమిత్‌షా కాళ్లు మొక్కుతూ, ఆయన వెంట పరుగెడుతూ, చెప్పులు తీసుకెళ్లిన బీజేపీ రాష్ట్ర అధ్యక్షుడి ప్రవర్తనను చూసి తెలంగాణ ప్రజలు అసహ్యించుకున్నారని చెప్పారు. ఢిల్లీ పార్టీల రాష్ట్ర నాయకుల వ్యవహారశైలి సిగ్గుచేటంటూ కేటీఆర్‌ ఘాటు వ్యాఖ్యలు చేశారు. తెలంగాణ ఆవిర్భావమే ఆత్మగౌరవ పునాదులపై ఏర్పాటైందని గుర్తుచేశారు. ఆ రెండు జాతీయ పార్టీలకు ఆ విలువ ఎప్పటికీ అర్థంకాదని పునరుద్ఘాటించారు.

యువత భవిష్యత్తుకు అండగా బీఆర్‌ఎస్‌ : కేటీఆర్‌

హైదరాబాద్‌, నవంబర్‌ 15 (నమస్తే తెలంగాణ) : తెలంగాణ యువత భవిష్యత్తుకు బీఆర్‌ఎస్‌ అండగా ఉంటుందని ఆ పార్టీ వర్కింగ్‌ ప్రెసిడెంట్‌ కే తారక రామారావు చెప్పారు. నిరుద్యోగ యువత కష్టానికి తగిన ఫలితం దకాలని, వారు ప్రభుత్వ ఉద్యోగం సాధించి తమ కుటుంబాల ఆశయాలను నెరవేర్చుకోవాలని ఆయన ఆకాంక్షించారు. వివిధ ప్రభుత్వ పోటీ పరీక్షలకు సిద్ధమవుతున్న యువత కోసం రూపొందించిన కరెంట్‌ అఫైర్స్‌ స్టడీ మెటీరియల్‌ను కేటీఆర్‌ తన నివాసంలో ఆదివారం ఆవిష్కరించారు. ఈ మెటీరియల్‌ విద్యార్థుల ప్రిపరేషన్‌కు ఎంతగానో ఉపయోగపడుతుందని ఆశాభావం వ్యక్తం చేశారు. ఉద్యోగార్థులకు కేవలం మాటలతో భరోసా ఇవ్వడమే కాకుండా, వారి లక్ష్యసాధనకు అవసరమైన విద్యావనరులను అందించే ప్రయత్నం చేస్తున్న బీఆర్‌ఎస్‌ నేత రాకేశ్‌రెడ్డిని కేటీఆర్‌ అభినందించారు. ‘యువత విజయం మన లక్ష్యం.. వారి భవిష్యత్తుకు అండగా నిలువడం మన బాధ్యత’ అని పేర్కొన్నారు.

Comments (0)

User