Vemulawada | వేములవాడ రాజన్న ఆలయ క్యూలైన్‌ వద్ద అగ్నిప్రమాదం.. భక్తులు లేకపోవడంతో తప్పిన ముప్పు!

Vemulawada | వేములవాడ టౌన్ : ప్రముఖ పుణ్యక్షేత్రమైన వేములవాడ శ్రీరాజరాజేశ్వర స్వామి ఆలయ పరిసరాల్లో అగ్నిప్రమాదం చోటుచేసుకుంది. శనివారం రాత్రి ఆలయం ముందు ఉన్న ప్రచార రథం వద్ద భక్తులు వెలిగించిన దీపాలు ప్రమాదవశాత్తు పక్కనే ఉన్న ఖాళీ స్థలంలో పడటంతో ఒక్కసారిగా మంటలు చెలరేగాయి. అయితే ఆ సమయంలో అక్కడ భక్తులు లేకపోవడంతో పెను ప్రమాదం తప్పింది.

కార్తీక మాసం కావడంతో రాజన్న దర్శనానికి వచ్చిన భక్తులు క్యూలైన్‌ వద్ద దీపాలు వెలిగించారు. ఈ క్రమంలో కొన్ని దీపాలు ప్రమాదవశాత్తు ఆలయ నిర్మాణం వైపు ఉన్న ఖాళీ స్థలంలో పడటంతో మంటలు వ్యాపించాయి. దీంతో ఆలయ పరిసరాల్లో కొద్దిసేపు ఆందోళన నెలకొంది. మంటలు చెలరేగిన విషయాన్ని తెలుసుకున్న ఆలయ అధికారులు వెంటనే అక్కడికి చేరుకున్నారు. మంటలను అదుపులోకి తీసుకొచ్చారు. ఘటన జరిగిన సమయంలో ఆ ప్రాంతంలో భక్తులు లేకపోవడంతో ఎలాంటి ప్రాణనష్టం జరగలేదు. దీంతో అందరూ ఊపిరిపీల్చుకున్నారు.